ਅੰਮ੍ਰਿਤਸਰ (ਸਸਸ) :- ਪੰਜਾਬ ਪੁਲਿਸ ਨੇ ਬਠਿੰਡੇ ਦੇ ਇਕ ਮੁੰਡਿਆਂ ਦੇ ਪੀਜੀ ਤੋਂ ਦੋ ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਨ੍ਹਾਂ ਦਾ ਸਬੰਧ ਅੰਮ੍ਰਿਤਸਰ ਗ੍ਰਨੇਡ ਹਮਲੇ ਤੋਂ ਦੱਸਿਆ ਜਾ ਰਿਹਾ ਹੈ। ਖ਼ਬਰ ਦੇ ਮੁਤਾਬਕ ਐਤਵਾਰ ਨੂੰ ਹਮਲੇ ਤੋਂ ਬਾਅਦ ਪੁਲਿਸ ਹਮਲਾਵਰਾਂ ਦੀ ਤਲਾਸ਼ ਵਿਚ ਜੁਟੀ ਹੋਈ ਹੈ। ਇਸ ਕ੍ਰਮ ਵਿਚ ਮੰਗਲਵਾਰ ਨੂੰ ਬਠਿੰਡੇ ਦੇ ਇਕ ਮੁੰਡਿਆਂ ਵਾਲੇ ਪੀਜੀ 'ਚ ਪੁਲਿਸ ਨੇ ਛਾਪਾ ਮਾਰਿਆ ਅਤੇ ਕੁੜੀਆਂ ਦੇ ਪੀਜੀ ਦੀ ਵੀ ਤਲਾਸ਼ੀ ਲਈ।

ਪੁਲਿਸ ਨੇ ਹਮਲੇ ਦੀ ਸ਼ੁਰੂਆਤੀ ਜਾਂਚ ਵਿਚ ਇਸ ਦੇ ਅਤਿਵਾਦੀ ਹਮਲਾ ਹੋਣ ਤੋਂ ਇਨਕਾਰ ਨਹੀਂ ਕੀਤਾ ਹੈ। ਇਹ ਸ਼ੱਕ ਇਸ ਲਈ ਵੀ ਹੈ ਕਿਉਂਕਿ ਹਮਲੇ ਦੇ ਦੋ ਦਿਨ ਪਹਿਲਾਂ ਹੀ ਅਤਿਵਾਦੀ ਜਾਕੀਰ ਮੂਸਾ ਨੂੰ ਅੰਮ੍ਰਿਤਸਰ ਵਿਚ ਦੇਖਿਆ ਗਿਆ ਸੀ, ਉਥੇ ਹੀ ਪੁਲਿਸ ਨੂੰ ਫਿਰੋਜ਼ਪੁਰ ਤੋਂ ਪੰਜਾਬ ਵਿਚ ਛੇ - ਸੱਤ ਅਤਿਵਾਦੀਆਂ ਦੇ ਘੁਸਪੈਠ ਦੀ ਵੀ ਖਬਰ ਮਿਲੀ ਸੀ, ਜਿਸ ਤੋਂ ਬਾਅਦ ਪੂਰੇ ਪੰਜਾਬ ਵਿਚ ਹਾਈ ਅਲਰਟ ਐਲਾਨ ਕਰ ਦਿੱਤਾ ਗਿਆ ਸੀ। ਦੱਸ ਦਈਏ ਕਿ ਐਤਵਾਰ ਨੂੰ ਅੰਮ੍ਰਿਤਸਰ ਦੇ ਰਾਜਾਸਾਂਸੀ ਪਿੰਡ ਸਥਿਤ ਨਿਰੰਕਾਰੀ ਭਵਨ ਵਿਚ ਗ੍ਰਨੇਡ ਅਟੈਕ ਹੋਇਆ ਸੀ।

ਇਸ ਧਮਾਕੇ ਵਿਚ ਉੱਥੇ ਧਾਰਮਿਕ ਸਮਾਰੋਹ ਵਿਚ ਮੌਜੂਦ 250 ਲੋਕਾਂ ਵਿਚੋਂ 3 ਲੋਕਾਂ ਦੀ ਮੌਤ ਹੋ ਗਈ ਜਦੋਂ ਕਿ 20 ਲੋਕ ਜਖ਼ਮੀ ਹੋਏ ਸਨ। ਚਸ਼ਮਦੀਦਾਂ ਨੇ ਦੱਸਿਆ ਸੀ ਕਿ ਮੋਟਰ ਸਾਈਕਲ ਸਵਾਰ 2 ਲੋਕ ਆਏ ਅਤੇ ਉਨ੍ਹਾਂ ਨੇ ਧਾਰਮਿਕ ਡੇਰੇ ਵਿਚ ਵਿਸਫੋਟਕ ਸੁੱਟਿਆ ਅਤੇ ਫਰਾਰ ਹੋ ਗਏ। ਉਨ੍ਹਾਂਨੇ ਕਿਹਾ ਕਿ ਹਮਲਾਵਰਾਂ ਨੇ ਭੱਜਣ ਦੇ ਕ੍ਰਮ 'ਚ ਉਨ੍ਹਾਂ ਨੂੰ ਪਿਸਟਲ ਦਿਖਾ ਕੇ ਡਰਾਉਣ ਦੀ ਵੀ ਕੋਸ਼ਿਸ਼ ਕੀਤੀ।