CSK beat RCB in opening match of 12 IPL

ਚੰਡੀਗੜ੍ਹ: ਇੰਡੀਅਨ ਪ੍ਰੀਮੀਅਰ ਲੀਗ ਦੇ 12ਵੇਂ ਸੀਜ਼ਨ ਦਾ ਆਰੰਭ ਸ਼ਨੀਵਾਰ ਰਾਤ ਹੋ ਗਿਆ। ਟੂਰਨਾਮੈਂਟ ਦਾ ਪਹਿਲਾ ਮੈਚ ਮਹੇਂਦਰ ਸਿੰਘ ਧੋਨੀ ਅਤੇ ਵਿਰਾਟ ਕੋਹਲੀ ਦੀ ਅਗਵਾਈ ਵਾਲੀਆਂ ਚੇਨੰਈ ਸੁਪਰ ਕਿੰਗਜ਼ ਤੇ ਰੌਇਲ ਚੈਲੰਜਰਜ਼ ਬੈਂਗਲੋਰ ਦਰਮਿਆਨ ਖੇਡਿਆ ਗਿਆ। ਹਰਭਜਨ ਸਿੰਘ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਬਦੌਲਤ ਸੀਐਸਕੇ ਨੇ ਆਰਸੀਬੀ ਨੂੰ ਸੱਤ ਵਿਕਟਾਂ ਨਾਲ ਕਰਾਰੀ ਮਾਤ ਦਿੱਤੀ।
 

ਹਰਭਜਨ ਸਿੰਘ ਨੇ ਚਾਰ ਓਵਰਾਂ ਵਿਚ 20 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ ਅਤੇ ਆਰਸੀਬੀ ਨੂੰ 17.1 ਓਵਰਾਂ ਵਿਚ 70 ਦੌੜਾਂ ’ਤੇ ਢੇਰ ਕਰ ਦਿੱਤਾ। ਚੇਨੱਈ ਦੀ ਟੀਮ ਨੇ ਇਹ ਟੀਚਾ 17.4 ਓਵਰਾਂ ਵਿਚ ਪੂਰਾ ਕਰ ਲਿਆ। ਚੇਨੱਈ ਦੇ ਬੱਲੇਬਾਜ਼ ਸੁਰੇਸ਼ ਰੈਣਾ (19 ਦੌੜਾਂ) ਨੇ ਦੌੜਾਂ ਤਾਂ ਨਹੀਂ ਬਣਾਈਆਂ, ਪਰ ਆਈਪੀਐਲ ਵਿਚ 5,000 ਦੌੜਾਂ ਪੂਰੀਆਂ ਕਰ ਲਈਆਂ, ਅਜਿਹਾ ਕਰਨ ਵਾਲਾ ਪਹਿਲਾ ਬੱਲੇਬਾਜ਼ ਬਣ ਗਿਆ।

ਸੀਐਸਕੇ ਲਈ ਗੇਂਦਬਾਜ਼ ਇਮਰਾਨ ਤਾਹਿਰ ਨੇ ਤਿੰਨ ਓਵਰਾਂ ਵਿਚ ਨੌਂ ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਝਟਕਾਈਆਂ। ਰਵਿੰਦਰ ਜਡੇਜਾ ਨੇ ਵੀ 15 ਦੌੜਾਂ ਦੇ ਕੇ ਦੋ ਵਿਕਟਾਂ ਲਈਆਂ। ਕਪਤਾਨ ਮਹਿੰਦਰ ਸਿੰਘ ਧੋਨੀ ਦਾ ਹਰਭਜਨ ਸਿੰਘ ਤੋਂ ਗੇਂਦਬਾਜ਼ੀ ਕਰਵਾਉਣ ਦਾ ਫ਼ੈਸਲਾ ਸਹੀ ਸਾਬਿਤ ਹੋਇਆ, ਜਿਸ ਨੇ ਵਿਰੋਧੀ ਕਪਤਾਨ ਵਿਰਾਟ ਕੋਹਲੀ (ਛੇ ਦੌੜਾਂ) ਨੂੰ ਚੌਥੇ ਹੀ ਓਵਰ ਵਿਚ ਬਾਹਰ ਦਾ ਰਸਤਾ ਵਿਖਾਇਆ। ਬੰਗਲੌਰ ਦੀ ਟੀਮ ਇਸ ਝਟਕੇ ਤੋਂ ਉਭਰ ਨਹੀਂ ਸਕੀ।

ਹਰਭਜਨ ਸਿੰਘ ਨੇ ਕੋਹਲੀ ਤੋਂ ਇਲਾਵਾ ਮੋਈਨ ਅਲੀ ਅਤੇ ਏਬੀ ਡਿਵਿਲੀਅਰਜ਼ (ਨੌਂ) ਨੂੰ ਆਊਟ ਕਰਕੇ ਮਹੱਤਵਪੂਰਨ ਵਿਕਟਾਂ ਲਈਆਂ। ਹਾਲਾਂਕਿ ਡਿਵਿਲੀਅਰਜ਼ ਨੂੰ ਤਾਹਿਰ ਨੇ ਜੀਵਨਦਾਨ ਵੀ ਦਿੱਤਾ, ਪਰ ਉਹ ਅਗਲੀ ਹੀ ਗੇਂਦ ’ਤੇ ਜਡੇਜਾ ਨੂੰ ਕੈਚ ਦੇ ਬੈਠਾ। ਆਰਸੀਬੀ ਵਿਚੋਂ ਸਿਰਫ਼ ਪਾਰਥਿਵ ਪਟੇਲ ਹੀ 29 ਦੌੜਾਂ ਬਣਾ ਸਕੇ, ਕਪਤਾਨ ਕੋਹਲੀ ਸਮੇਤ ਬਾਕੀ ਸਾਰੀ ਟੀਮ ਦਹਾਈ ਦਾ ਅੰਕੜਾ ਵੀ ਨਾ ਪਾਰ ਕਰ ਸਕੀ ਅਤੇ 18ਵੇਂ ਓਵਰ ਵਿਚ 70 ਦੌੜਾਂ 'ਤੇ ਸਿਮਟ ਗਈ ਸੀ।