Photo

ਚੰਡੀਗੜ: ਆਮ ਆਦਮੀ ਪਾਰਟੀ (ਆਪ) ਪੰਜਾਬ ਦੇ ਸੂਬਾ ਪ੍ਰਧਾਨ ਅਤੇ ਸੰਸਦ ਮੈਂਬਰ ਭਗਵੰਤ ਮਾਨ ਨੇ ਪ੍ਰਧਾਨ ਮੰਤਰੀ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਉਹ ਆਰ.ਬੀ.ਆਈ ਰਾਹੀਂ ਸਾਰੇ ਕੌਮੀ, ਖੇਤਰੀ, ਨਿੱਜੀ ਬੈਂਕਾਂ ਅਤੇ ਹੋਰ ਸੰਸਥਾਗਤ ਅਤੇ ਗੈਰ-ਸੰਸਥਾਗਤ ਵਿੱਤੀ ਅਦਾਰਿਆਂ ਨੂੰ ਕਰਜ਼ ਦੀਆਂ ਕਿਸ਼ਤਾਂ/ਲੈਣਦਾਰੀਆਂ 30 ਸਤੰਬਰ 2020 ਤੱਕ ਬਿਨਾ ਵਿਆਜ ਮੁਲਤਵੀ ਕਰਨ ਬਾਰੇ ਦਿਸ਼ਾ-ਨਿਰਦੇਸ਼ ਜਾਰੀ ਕਰਨ।

‘ਆਪ’ ਹੈੱਡਕੁਆਟਰ ਤੋਂ ਜਾਰੀ ਪੱਤਰ ਅਨੁਸਾਰ ਭਗਵੰਤ ਮਾਨ ਨੇ ਪ੍ਰਧਾਨ ਮੰਤਰੀ ਨੂੰ ਸੰਬੋਧਿਤ ਹੁੰਦਿਆਂ ਕਿਹਾ ਕਿ ਵਿਸ਼ਵ-ਵਿਆਪੀ ਆਫ਼ਤ ਵਜੋਂ ਚੁਣੌਤੀ ਬਣੇ ਨੋਬਲ ਕੋਰੋਨਾ-ਵਾਇਰਸ (ਕੌਵਿਡ-19) ਨਾਲ ਨਿਪਟਣ ਲਈ ਆਪ ਜੀ ਦੀ ਕੇਂਦਰ ਅਤੇ ਸੂਬਾ ਸਰਕਾਰਾਂ ਵੱਲੋਂ ਉਠਾਏ ਜਾ ਰਹੇ ਕਦਮਾਂ ਨਾਲ ਅੱਜ ਪੂਰਾ ਦੇਸ਼ ਡਟ ਕੇ ਖੜਾ ਹੈ। ਇਹ ਕੌਮੀ ਏਕਤਾ ਹਰ ਨਾਗਰਿਕ ਦੇ ਮਨ ਨੂੰ ਤਸੱਲੀ ਅਤੇ ਮਜ਼ਬੂਤੀ ਦੇ ਰਹੀ ਹੈ। ਸਰਕਾਰਾਂ ਦੇ ਨਾਲ-ਨਾਲ ਆਮ ਜਨ ਦੇ 100 ਪ੍ਰਤੀਸ਼ਤ ਸਾਥ ਬਗੈਰ ਇਸ ਭਿਅੰਕਰ ਚੁਣੌਤੀ ਨਾਲ ਨਿਪਟਣਾ ਸੰਭਵ ਨਹੀਂ ਹੈ।

ਮਾਨ ਨੇ ਕਿਹਾ ਕਿ ਅਜਿਹੇ ਹਾਲਾਤ ‘ਚ ਦੇਸ਼ ਦੇ ਹਰ ਨਾਗਰਿਕ ਦਾ ਹੌਸਲਾ ਅਤੇ ਮਨੋਬਲ ਉੱਚਾ ਰੱਖਣ ਲਈ ਆਪ ਜੀ ਤੋਂ ਮੰਗ ਕਰਦੇ ਹਾਂ ਕਿ ਕੇਂਦਰ ਸਰਕਾਰ ਭਾਰਤੀ ਰਿਜ਼ਰਵ ਬੈਂਕ ਰਾਹੀਂ ਦੇਸ਼ ਦੇ ਕੌਮੀ, ਜਨਤਕ (ਪਬਲਿਕ ਸੈਕਟਰ), ਖੇਤਰੀ ਅਤੇ ਪ੍ਰਾਈਵੇਟ ਬੈਂਕਾਂ ਸਮੇਤ ਵਿੱਤੀ ਲੈਣ-ਦੇਣ ਵਾਲੇ ਤਮਾਮ ਸੰਸਥਾਗਤ ਅਤੇ ਗੈਰ=ਸੰਸਥਾਗਤ ਅਦਾਰਿਆਂ ਨੂੰ ਤੁਰੰਤ ਪ੍ਰਭਾਵ ਦਿਸ਼ਾ-ਨਿਰਦੇਸ਼ ਜਾਰੀ ਕਰੇ।

ਅਗਲੇ 6 ਮਹੀਨਿਆਂ (30 ਸਤੰਬਰ 2020) ਤੱਕ ਹਰ ਸ਼੍ਰੇਣੀ ਦੇ ਛੋਟੇ-ਵੱਡੇ ਕਰਜ਼ਿਆਂ (ਲੋਨ) ਜਾਂ ਲੈਣਦਾਰੀਆਂ ਨੂੰ ਮੁਲਤਵੀ ਕੀਤਾ ਜਾਵੇ ਅਤੇ ਇਸ ਚੁਣੌਤੀ ਭਰੇ ਕਾਲ (ਡਿਊਰੇਸ਼ਨ) ਦੌਰਾਨ ਬਣਦੇ ਵਿਆਜ ‘ਤੇ 100 ਪ੍ਰਤੀਸ਼ਤ ਛੋਟ ਦੇਣ ਤਾਂ ਕਿ ਹਰ ਤਬਕੇ ਦੇ ਨਾਗਰਿਕਾਂ ਨੂੰ ਉਨਾਂ ਦੇ ਹਾਊਸਿੰਗ, ਵਪਾਰਕ, ਵਹੀਕਲ, ਖੇਤੀਬਾੜੀ, ਕਾਰੋਬਾਰੀ ਜਾਂ ਕਲਿਆਣਕਾਰੀ (ਵੈੱਲਫੇਅਰ) ਸਕੀਮਾਂ ਤਹਿਤ ਚੁੱਕੇ  ਕਰਜ਼ ਦੀਆਂ ਮਹੀਨਾਵਾਰੀ ਜਾਂ ਛਿਮਾਹੀ ਕਿਸ਼ਤਾਂ ਦੀ ਦੇਣਦਾਰੀ ਮਾਨਸਿਕ ਅਤੇ ਆਰਥਿਕ ਤੌਰ ‘ਤੇ ਪਰੇਸ਼ਾਨ ਨਾ ਕਰੇ, ਕਿਉਂਕਿ ਕੌਵਿਡ-19 ਨਾਲ ਲੜਨ ਅਤੇ ਜਿੱਤਣ ਲਈ ਨਿਰਾਸ਼ਾ ਮੁਕਤ ਅਤੇ ਉੱਚੇ ਮਨੋਬਲ ਦੀ ਬੇਹੱਦ ਜ਼ਰੂਰਤ ਹੈ।

ਭਗਵੰਤ ਮਾਨ ਨੇ ਕਿਹਾ ਕਿ ਅਸੀਂ ਉਮੀਦ ਕਰਦੇ ਹਾਂ ਕਿ ਆਪ ਜੀ ਦੀ ਸਰਕਾਰ ਇਸ ਬਾਬਤ ਤੁਰੰਤ ਲੋੜੀਂਦੇ ਕਦਮ ਚੁੱਕੇਗੀ ਅਤੇ ਪੂਰਾ ਦੇਸ਼ ਇੱਕਜੁੱਟ ਹੋ ਕੇ ਇਸ ਮਹਾਂਮਾਰੀ ‘ਤੇ ਛੇਤੀ ਫ਼ਤਿਹ ਹਾਸਲ ਕਰੇਗਾ।