Navjot Sidhu

ਚੰਡੀਗੜ੍ਹ : ਮੋਦੀ ਸਰਕਾਰ ਵਲੋਂ ਪਿਛਲੇ ਦਿਨਾਂ 'ਚ ਸੰਸਦ ਵਿਚ ਪਾਸ ਕਰਵਾਏ ਤਿੰਨ ਖੇਤੀ ਬਿੱਲਾਂ ਦੇ ਵਿਰੋਧ 'ਚ ਪੰਜਾਬ ਵਿਚ ਕਿਸਾਨਾਂ ਵਲੋਂ ਵਿੱਢੇ ਸੰਘਰਸ਼ ਦੌਰਾਨ ਸਾਬਕਾ ਮੰਤਰੀ ਨਵਜੋਤ ਸਿੱਧੂ ਮੁੜ ਸਿਆਸੀ ਚਰਚਾ ਦੇ ਕੇਂਦਰ ਬਿੰਦੂ ਵਿਚ ਆ ਗਏ ਹਨ। ਪਹਿਲੀ ਵਾਰ ਸਿੱਧੇ ਤੌਰ 'ਤੇ ਕਿਸਾਨਾਂ ਨੂੰ ਸਿਆਸੀ ਪਿੜ 'ਚ ਆਉਣ ਦਾ ਸੱਦਾ ਦੇਣ ਤੋਂ ਬਾਅਦ ਆਗਾਮੀ ਵਿਧਾਨ ਸਭਾ ਚੋਣਾਂ ਦੌਰਾਨ ਨਵੇਂ ਬਣਨ ਵਾਲੇ ਸਮੀਕਰਨ ਦਿਖ਼ਾਈ ਦੇਣ ਲੱਗੇ ਹਨ।

ਬੇਸ਼ੱਕ ਅੱਜ ਇਕ ਵਿਸ਼ੇਸ਼ ਇੰਟਰਵਿਊ ਵਿਚ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਰਾਵਤ ਨੇ ਸ੍ਰੀ ਸਿੱਧੂ ਨੂੰ ਪਾਰਟੀ ਦਾ ਚਿਹਰਾ ਦਸਿਆ ਹੈ ਪ੍ਰੰਤੂ ਸਿਆਸੀ ਮਾਹਰਾਂ ਮੁਤਾਬਕ ਪਾਰਟੀ ਅੰਦਰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਚੱਲ ਰਹੇ ਛੱਤੀ ਦੇ ਅੰਕੜੇ ਮੁਤਾਬਕ ਬਿਨ੍ਹਾਂ ਕਿਸੇ ਵੱਡੀ ਜ਼ਿੰਮੇਵਾਰੀ ਦੇ ਉਕਤ ਆਗੂ ਦਾ ਪਾਰਟੀ ਅੰਦਰ ਸਰਗਰਮ ਹੋਣਾ ਕਾਫ਼ੀ ਸ਼ੱਕੀ ਜਾਪ ਰਿਹਾ ਹੈ।

ਹਾਲਾਂਕਿ ਅਕਾਲੀਆਂ ਦੇ ਭਾਜਪਾ ਨਾਲੋਂ ਵੱਖ ਹੋਣ ਤੋਂ ਬਾਅਦ ਨਵਜੋਤ ਸਿੱਧੂ ਦੇ ਮੁੜ ਭਾਜਪਾ 'ਚ ਸ਼ਾਮਲ ਹੋਣ ਦੀਆਂ ਚੱਲ ਰਹੀਆਂ ਕਿਆਸਅਰਾਈਆਂ ਦੌਰਾਨ ਉਨ੍ਹਾਂ ਵਲੋਂ ਕਿਸਾਨਾਂ ਦੇ ਹੱਕ 'ਚ ਲਏ ਸਪੱਸ਼ਟ ਸਟੈਂਡ ਤੋਂ ਬਾਅਦ ਪੰਜਾਬ ਦੀ ਸਿਆਸਤ ਵਿਚ ਨਵੇਂ ਸਿਆਸੀ ਸਮੀਕਰਨ ਬਣਨ ਦੀ ਸੰਭਾਵਨਾ ਪੈਦਾ ਹੋ ਗਈ ਹੈ। ਸਿਆਸੀ ਮਾਹਰਾਂ ਨਾਲ ਗੱਲਬਾਤ ਕਰਨ ਤੋਂ ਬਾਅਦ ਇਹ ਗੱਲ ਸਾਹਮਣੇ ਆਈ ਹੈ ਕਿ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ 'ਚ ਹੁਣ ਤਕ ਦੀ ਸਥਿਤੀ ਮੁਤਾਬਕ ਨਵਜੋਤ ਸਿੱਧੂ ਹੀ ਕੇਂਦਰੀ ਧੁਰਾ ਬਣੇ ਰਹਿ ਸਕਦੇ ਹਨ। ਉਨ੍ਹਾਂ ਦੀ ਅਗਵਾਈ ਵਾਲੀ ਪਾਰਟੀ ਨੂੰ ਕਰਤਾਰਪੁਰ ਸਾਹਿਬ ਦਾ ਲਾਂਘਾ ਖੁੱਲਣ ਤੋਂ ਬਾਅਦ ਮਿਲੀ ਲੋਕਪ੍ਰਿਅਤਾ ਚੋਣਾਂ ਜਿੱਤਣ ਵਿਚ ਵੱਡੀ ਭੂਮਿਕਾ ਨਿਭਾ ਸਕਦੀ ਹੈ।

ਮਾਹਰਾਂ ਮੁਤਾਬਕ ਪਿਛਲੇ ਸਾਢੇ ਤਿੰਨ ਸਾਲਾਂ ਦੌਰਾਨ ਸਿੱਧੂ ਦੀ ਸਿਆਸੀ ਸਥਿਤੀ ਕਾਂਗਰਸ ਅੰਦਰ ਰਹੀ ਹੈ, ਉਸ ਨੂੰ ਵਾਚਣ ਤੋਂ ਬਾਅਦ ਇਹ ਗੱਲ ਹਕੀਕਤ ਵਿਚ ਬਦਲਦੀ ਨਜ਼ਰ ਆਉਂਦੀ ਹੈ ਕਿ ਉਨ੍ਹਾਂ ਵਲੋਂ ਇਕ ਨਵਾਂ ਪਲੇਟਫ਼ਾਰਮ ਦਿਤਾ ਜਾ ਸਕਦਾ ਹੈ। ਉਂਜ ਇਸ ਪਲੇਟਫ਼ਾਰਮ ਦਾ ਇਸ਼ਾਰਾ ਉਨ੍ਹਾਂ ਵਲੋਂ ਅਪਣਾ ਯੂ-ਟਿਊਬ ਚੈਨਲ 'ਜਿੱਤੇਗਾ ਪੰਜਾਬ' ਨੂੰ ਸ਼ੁਰੂ ਕਰਨ ਤੋਂ ਵੀ ਮਿਲਦਾ ਹੈ। ਇਸ ਪਲੇਟਫ਼ਾਰਮ ਵਿਚ ਨਾ ਸਿਰਫ਼ ਆਪ ਦੇ ਬਾਗੀ ਗਰੁੱਪ ਖਹਿਰਾ ਅਤੇ ਬੈਂਸ ਭਰਾ ਸ਼ਾਮਲ ਹੋ ਸਕਦੇ ਹਨ, ਬਲਕਿ ਅੰਦਰਖ਼ਾਤੇ ਅਸੰਤੁਸ਼ਟ ਬੈਠੇ ਕਾਂਗਰਸ ਦੇ ਕਰੀਬ ਦੋ ਦਰਜਨ ਵਿਧਾਇਕ ਵੀ ਸਮਾਂ ਆਉਣ 'ਤੇ ਪਲਟੀ ਮਾਰ ਸਕਦੇ ਹਨ। ਇਸੇ ਤਰ੍ਹਾਂ ਆਮ ਆਦਮੀ ਪਾਰਟੀ ਵੀ ਕਿਸੇ ਹੱਦ ਤੱਕ ਸਿੱਧੂ ਦੇ ਨਾਲ ਸਿਆਸੀ ਗਠਜੋੜ ਕਰ ਕੇ ਚੋਣ ਮੈਦਾਨ ਵਿਚ ਨਿੱਤਰ ਸਕਦੀ ਹੈ। ਅਜਿਹੀ ਹਾਲਤ ਵਿਚ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਇਕ ਨਵਾਂ ਸਿਆਸੀ ਰਿਕਾਰਡ ਬਣ ਸਕਦਾ ਹੈ।

ਬੇਸ਼ੱਕ ਦੂਜੇ ਪਾਸੇ ਸਾਰੀਆਂ ਸਿਆਸੀ ਸਥਿਤੀਆਂ ਨੂੰ ਭਾਂਪਦਿਆਂ ਕਿਸਾਨਾਂ ਦੇ ਸੰਘਰਸ਼ ਰਾਹੀ ਤੀਜ਼ੀ ਵਾਰ ਮੁੱਖ ਮੰਤਰੀ ਦੀ ਕੁਰਸੀ 'ਤੇ ਬੈਠਣ ਦੀ ਉਮੀਦ ਲਗਾਉਣ ਵਾਲੇ ਕੈਪਟਨ ਅਮਰਿੰਦਰ ਸਿੰਘ ਵੀ ਇਨ੍ਹਾਂ ਸਿਆਸੀ ਰਮਜ਼ਾਂ ਤੋਂ ਅਣਭੁੱਲ ਨਹੀਂ ਹਨ ਪ੍ਰੰਤੂ ਮਾਹਰਾਂ ਮੁਤਾਬਕ ਸਿਆਸਤ 'ਚ ਖੂਨ ਵਿਚ ਰਚੀ ਹੋਣ ਦੇ ਚਲਦੇ ਉਹ ਵੀ ਛੇਤੀ ਕੀਤਿਆਂ ਹਥਿਆਰ ਸੁੱਟਣ ਵਾਲੇ ਨਹੀਂ ਹਨ। ਜਦਕਿ ਭਾਜਪਾ ਤੋਂ ਵੱਖ ਹੋਣ ਤੋਂ ਬਾਅਦ ਸੁਬੇ ਵਿਚ ਅਪਣੀ ਸਿਆਸੀ ਜਮੀਨ ਤਲਾਸ਼ ਰਹੇ ਸ਼੍ਰੋਮਣੀ ਅਕਾਲੀ ਦਲ ਲਈ 2022 ਦੀ ਵਾਟ ਕਾਫ਼ੀ ਲੰਮੇਰੀ ਜਾਪਣ ਲੱਗੀ ਹੈ ਜਦਕਿ ਬਾਦਲਾਂ ਨਾਲੋਂ ਵੱਖ ਹੋ ਕੇ ਭਾਜਪਾ ਦੀਆਂ ਪੋੜੀਆਂ ਦੇ ਸਹਾਰੇ ਅਪਣੇ ਪੁੱਤਰ ਨੂੰ ਮੁੱਖ ਮੰਤਰੀ ਬਣਾਉਣ ਦੀ ਯੋਜਨਾ ਲੈ ਕੇ ਨਿਕਲੇ ਸੁਖਦੇਵ ਸਿੰਘ ਢੀਂਡਸਾ ਲਈ ਵੀ ਪੰਜਾਬ ਦੇ ਕਿਸਾਨਾਂ ਲਈ ਅਛੂਤ ਬਣੀ ਭਾਜਪਾ ਨਾਲ ਰਲਣਾ ਕਾਫ਼ੀ ਸੌਖਾ ਕੰਮ ਨਹੀਂ ਰਿਹਾ ਹੈ। ਅਜਿਹੀ ਹਾਲਾਤ ਵਿਚ ਪੰਜਾਬ ਦੀਆਂ ਹੋਰਨਾਂ ਛੋਟੀਆਂ ਸਿਆਸੀ ਪਾਰਟੀਆਂ ਨਵਜੋਤ ਸਿੱੱੱਧੂ ਦੀ ਅਗਵਾਈ ਹੇਠ ਇਕੱਠੀਆਂ ਹੋ ਕੇ ਪੰਜਾਬ ਦੀ ਸੱਤਾ 'ਤੇ ਕਾਬਜ਼ ਹੋਣ ਲਈ ਸਾਂਝਾ ਹੰਭਲਾ ਮਾਰ ਸਕਦੀਆਂ ਹਨ।