ਨਵੀਂ ਦਿੱਲੀ - ਮੁਸਕਾਨ ਅਤੇ ਤਮੰਨਾ ਸਮੇਤ ਚਾਰ ਭਾਰਤੀ ਮੁੱਕੇਬਾਜ਼ਾਂ ਨੇ ਸਪੇਨ ਦੇ ਲਾ ਨੁਸੀਆ ਵਿੱਚ ਚੱਲ ਰਹੀ ਪੁਰਸ਼ ਅਤੇ ਮਹਿਲਾ ਵਿਸ਼ਵ ਯੁਵਾ ਮੁੱਕੇਬਾਜ਼ੀ ਚੈਂਪੀਅਨਸ਼ਿਪ ਦੇ ਸੈਮੀਫ਼ਾਈਨਲ ਵਿੱਚ ਪਹੁੰਚ ਕੇ ਆਪਣੇ ਤਗਮੇ ਪੱਕੇ ਕਰ ਲਏ ਹਨ, ਜਿਸ ਨਾਲ ਭਾਰਤ ਦੇ ਕੁੱਲ ਤਮਗਿਆਂ ਦੀ ਗਿਣਤੀ 11 ਹੋ ਗਈ ਹੈ। 

ਯੁਵਾ ਏਸ਼ਿਆਈ ਚੈਂਪੀਅਨਸ਼ਿਪ 'ਚ ਚਾਂਦੀ ਦਾ ਤਮਗਾ ਜਿੱਤਣ ਵਾਲੀ ਕੀਰਤੀ (+81 ਕਿਲੋਗ੍ਰਾਮ) ਅਤੇ ਦੇਵਿਕਾ ਘੋਰਪੜੇ (52 ਕਿਲੋ) ਦੋ ਹੋਰ ਮੁੱਕੇਬਾਜ਼ ਹਨ, ਜਿਨ੍ਹਾਂ ਨੇ ਆਖਰੀ ਚਾਰ 'ਚ ਆਪਣੀ ਥਾਂ ਬਣਾਈ। 

ਇਨ੍ਹਾਂ ਚਾਰ ਤਮਗਿਆਂ ਨਾਲ ਭਾਰਤ ਨੇ ਪਿਛਲੇ ਸੀਜ਼ਨ ਵਿੱਚ ਪੋਲੈਂਡ ਵਿੱਚ ਹੋਏ ਟੂਰਨਾਮੈਂਟ ਵਿੱਚ 11 ਤਮਗਿਆਂ ਦੇ ਆਪਣੇ ਬਿਹਤਰੀਨ ਪ੍ਰਦਰਸ਼ਨ ਦੀ ਬਰਾਬਰੀ ਕਰ ਲਈ ਹੈ।

ਔਰਤਾਂ ਦੇ 50 ਕਿਲੋਗ੍ਰਾਮ ਕੁਆਰਟਰ ਫ਼ਾਈਨਲ ਵਿੱਚ ਜਾਪਾਨ ਦੀ ਜੂਨੀ ਟੋਨੇਗਾਵਾ ਨੂੰ ਹਰਾ ਕੇ ਤਮੰਨਾ ਨੇ ਭਾਰਤ ਲਈ ਦਿਨ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਦੇਵਿਕਾ ਨੇ ਜਰਮਨੀ ਦੀ ਆਸਿਆ ਏਰੀ ਖ਼ਿਲਾਫ਼ 5-0 ਨਾਲ ਆਸਾਨ ਜਿੱਤ ਦਰਜ ਕੀਤੀ।

ਮੁਸਕਾਨ (75 ਕਿਲੋਗ੍ਰਾਮ) ਅਤੇ ਕੀਰਤੀ ਆਪਣੇ-ਆਪਣੇ ਵਿਰੋਧੀ ਮੰਗੋਲੀਆ ਦੇ ਜ਼ੀਨਯੇਪ ਅਜਿਮਬਾਈ ਅਤੇ ਰੋਮਾਨੀਆ ਦੀ ਲਿਵੀਆ ਬੋਟਿਕਾ ਲਈ ਬਹੁਤ ਮਜ਼ਬੂਤ ​​ਸਾਬਤ ਹੋਏ। ਬਾਊਟ ਸ਼ੁਰੂ ਹੋਣ ਦੇ ਤਿੰਨ ਮਿੰਟਾਂ ਦੇ ਅੰਦਰ ਹੀ ਰੈਫ਼ਰੀ ਵੱਲੋਂ ਮੁਕਾਬਲਾ ਰੋਕਣ ਦੇ ਫ਼ੈਸਲੇ ਨਾਲ ਦੋਵਾਂ ਨੂੰ ਜੇਤੂ ਐਲਾਨ ਦਿੱਤਾ ਗਿਆ।

ਕੁਆਰਟਰ ਫ਼ਾਈਨਲ ਮੁਕਾਬਲੇ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਜਾਣ ਵਾਲੇ ਮੁੱਕੇਬਾਜ਼ਾਂ ਵਿੱਚ ਪ੍ਰੀਤੀ ਦਹੀਆ (57 ਕਿੱਲੋਗ੍ਰਾਮ), ਰਿਦਮ (92 ਕਿੱਲੋਗ੍ਰਾਮ+) ਅਤੇ ਜਾਦੂਮਣੀ ਸਿੰਘ ਮਾਂਡੇਂਗਬਾਮ (51 ਕਿੱਲੋਗ੍ਰਾਮ) ਦੇ ਨਾਂਅ ਸ਼ਾਮਲ ਹਨ।