file photo

ਨਵੀਂ ਦਿੱਲੀ : ਆਸਟ੍ਰੇਲੀਆ ਦੇ ਜੰਗਲਾਂ ਵਿਚ ਪਿਛਲੇ ਕਈ ਮਹੀਨਿਆਂ ਤੋਂ ਲੱਗੀ ਭਿਆਨਕ ਅੱਗ ਨੇ ਹੁਣ ਨਵੀਂ ਚਰਚਾ ਛੇੜ ਦਿਤੀ ਹੈ। ਆਸਟ੍ਰੇਲੀਆ ਮੌਸਮ ਵਿਭਾਗ ਵਿਗਿਆਨ ਬਿਊਰੋ ਅਨੁਸਾਰ ਜੰਗਲਾਂ ਨੂੰ ਲੱਗੀ ਅੱਗ ਅਪਣਾ ਵਿਲੱਖਣ ਮੌਸਮ ਬਣਾ ਰਹੀ ਹੈ।

ਦਰਅਸਲ ਗਰਮ ਹਵਾਂ ਅਤੇ ਧੂੰਆਂ ਜਦੋਂ ਕਾਫ਼ੀ ਉਪਰ ਚਲੇ ਜਾਂਦੇ ਹਨ ਤਾਂ ਘੱਟ ਵਾਯੂਮੰਡਲ ਦਬਾਅ ਕਾਰਨ ਠੰਡੇ ਹੋ ਕੇ ਬੱਦਲਾਂ ਦਾ ਰੂਪ ਧਾਰਨ ਕਰ ਜਾਂਦੇ ਹਨ। ਸਿੱਟੇ ਵਜੋਂ ਅਸਥਿਰ ਮੌਸਮ 'ਚ ਤੂਫ਼ਾਨ ਪੈਦਾ ਹੋ ਸਕਦਾ ਹੈ ਅਤੇ ਬਿਜਲੀ ਕੜਕਣ ਕਾਰਨ ਅੱਗ ਹੋਰ ਵੱਧ ਸਕਦੀ ਹੈ।

ਆਸਟ੍ਰੇਲੀਆਈ ਓਪਨਰ ਵੇਵਿਡ ਵਾਰਨਰ ਨੇ ਸੋਸ਼ਲ ਮੀਡੀਆ 'ਚ ਇਕ ਫ਼ੋਟੋ ਸਾਂਝੀ ਕੀਤੀ ਹੈ। ਫ਼ੋਟੋ 'ਚ ਸਮੁੰਦਰ ਕੰਢੇ ਬੈਠਾ ਇਕ ਵਿਅਕਤੀ ਅਤੇ ਕੁੱਤਾ ਆਸਟ੍ਰੇਲੀਆ ਦੇ ਜੰਗਲਾਂ 'ਚ ਲੱਗੀ ਅੱਗ ਵੱਲ ਵੇਖ ਰਹੇ ਹਨ।

ਉਨ੍ਹਾਂ ਲਿਖਿਆ ਹੈ, ''ਮੈਂ ਇਹ ਤਸਵੀਰ ਵੇਖੀ ਅਤੇ ਮੈਂ ਅਜੇ ਵੀ ਸਦਮੇ 'ਚ ਹਾਂ, ਇਹ ਅੱਗ ਸ਼ਬਦਾਂ ਤੋਂ ਪਰ੍ਹੇ ਹੈ, ਹਰ ਅੱਗ ਬੁਝਾਊ ਮੁਲਾਜ਼ਮ, ਵਾਲਟੀਅਰ ਤੋਂ ਹਰ ਪਰਵਾਰ, ਅਸੀਂ ਤੁਹਾਡੇ ਨਾਲ ਹਾਂ, ਤੁਸੀਂ ਸੱਚੇ ਹੀਰੋ ਹੋ।''

ਕਾਬਲੇਗੌਰ ਹੈ ਕਿ ਆਸਟ੍ਰੇਲੀਆ ਦੇ ਜੰਗਲਾਂ ਵਿਚ ਲੱਗੀ ਅੱਗ ਦੇ ਧੂੰਏ ਕਾਰਨ ਨਿਊਜ਼ੀਲੈਂਡ ਦੇ ਗਲੇਸ਼ੀਅਰ ਵੀ ਭੂਰੇ ਰੰਗ ਦੇ ਹੋਣ ਦੀਆਂ ਤਸਵੀਰਾਂ ਸਾਹਮਣੇ ਆ ਰਹੀਆਂ ਹਨ।

ਮੌਸਮ ਦੀ ਅਗਾਊ ਜਾਣਕਾਰੀ ਦੇਣ ਵਾਲੀ ਨਿਊਜ਼ੀਲੈਂਡ ਦੀ ਸੰਸਥਾ ਮੇਟਸਰਵਿਸ ਨੇ ਕਿਹਾ ਕਿ 2000 ਕਿਲੋਮੀਟਰ ਦੂਰ ਤੋਂ ਤੈਸਮਨ ਸਾਗਰ ਪਾਰ ਕਰ ਕੇ ਆਇਆ ਧੂੰਆਂ ਸਾਫ਼ ਤੌਰ 'ਤੇ ਵੇਖਿਆ ਜਾ ਸਕਦਾ ਹੈ। ਪਿਛਲੇ ਸਾਲ ਸਤੰਬਰ ਤੋਂ ਸ਼ੁਰੂ ਹੋਈ ਅੱਗ ਨਾਲ ਆਸਟ੍ਰੇਲੀਆ ਵਿਚ ਹੁਣ ਤਕ 18 ਜਾਨਾਂ ਜਾ ਚੁੱਕੀਆਂ ਹਨ।