ਢਾਕਾ : ਇਕ ਸਨਕੀ ਪਤੀ ਨੇ ਆਪਣੀ ਪਤਨੀ ਦੇ ਸਿਰ ਦੇ ਵਾਲ ਸਿਰਫ਼ ਇਸ ਕਰ ਕੇ ਵੱਢ ਦਿੱਤੇ, ਕਿਉਂਕਿ ਜਦੋਂ ਉਹ ਖਾਣਾ ਖਾ ਰਿਹਾ ਸੀ ਤਾਂ ਖਾਣੇ 'ਚ ਇਕ ਵਾਲ ਆ ਗਿਆ ਸੀ। ਇਸ ਗੱਲ ਤੋਂ ਪਤੀ ਇੰਨਾ ਨਾਰਾਜ਼ ਹੋਇਆ ਕਿ ਉਸ ਨੇ ਪਤਨੀ ਨੂੰ ਜ਼ਬਰਦਸਤੀ ਗੰਜਾ ਕਰ ਦਿੱਤਾ। ਹਾਲਾਂਕਿ ਬਾਅਦ 'ਚ ਸ਼ਿਕਾਇਤ ਕਰਨ 'ਤੇ ਪੁਲਿਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ।
ਮਾਮਲਾ ਬੰਗਲਾਦੇਸ਼ ਦੇ ਜੋਏਪੁਰਹਾਟ ਜ਼ਿਲ੍ਹੇ ਦੇ ਇਕ ਪਿੰਡ ਦਾ ਹੈ। ਇਥੇ ਰਹਿਣ ਵਾਲੇ 35 ਸਾਲਾ ਬਬਲੂ ਮੰਡਲ ਦੀ ਪਤਨੀ ਨੇ ਉਸ ਨੂੰ ਨਾਸ਼ਤੇ 'ਚ ਚੌਲ ਅਤੇ ਦੁੱਧ ਦਿੱਤਾ ਸੀ। ਇਹ ਨਾਸ਼ਤਾ ਬਬਲੂ ਦੀ ਪਤਨੀ ਨੇ ਹੀ ਬਣਾਇਆ ਸੀ। ਨਾਸ਼ਤੇ 'ਚੋਂ ਉਸ ਨੂੰ ਇਕ ਵਾਲ ਮਿਲਿਆ। ਇਸ ਤੋਂ ਬਬਲੂ ਇੰਨਾ ਨਾਰਾਜ਼ ਹੋਇਆ ਕਿ ਉਸ ਨੇ ਆਪਣੀ ਪਤਨੀ ਦੇ ਸਿਰ ਦੇ ਵਾਲ ਜ਼ਬਰਦਸਤੀ ਕੱਟ ਦਿੱਤੇ। ਸਥਾਨਕ ਪੁਲਿਸ ਅਧਿਕਾਰੀ ਸ਼ਹਿਯਾਰ ਖ਼ਾਨ ਨੇ ਦੱਸਿਆ ਕਿ ਪਿੰਡ ਵਾਲਿਆਂ ਦੀ ਸ਼ਿਕਾਇਤ ਤੋਂ ਬਾਅਦ ਬਬਲੂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।
ਪੁਲਿਸ ਮੁਤਾਬਕ ਜਿਵੇਂ ਹੀ ਬਬਲੂ ਨੇ ਨਾਸ਼ਤੇ 'ਚ ਵਾਲ ਵੇਖਿਆ ਤਾਂ ਉਸ ਨੇ ਆਪਣੀ ਪਤਨੀ ਨੂੰ ਮਾੜਾ ਬੋਲਣਾ ਸ਼ੁਰੂ ਕਰ ਦਿੱਤਾ। ਉਹ ਰੇਜ਼ਰ ਲੈ ਕੇ ਆਇਆ ਅਤੇ ਜ਼ਬਰਦਸਤੀ ਪਤਨੀ ਨੂੰ ਗੰਜਾ ਕਰ ਦਿੱਤਾ। ਪੁਲਿਸ ਮੁਤਾਬਕ ਇਹ ਅਪਰਾਧ ਜਾਣਬੁੱਝ ਕੇ ਗੰਭੀਰ ਸੱਟ ਪਹੁੰਚਾਉਣ ਦਾ ਹੈ। ਇਸ ਦੇ ਲਈ ਉਸ ਨੂੰ 14 ਸਾਲ ਦੀ ਜੇਲ ਹੋ ਸਕਦੀ ਹੈ।