2019 ਦੀਆਂ ਲੋਕ ਸਭਾ ਚੋਣਾਂ ਵਿਚ ਮਹਾਂ ਗੰਢਜੋੜ ਨੂੰ ਲੈ ਕੇ ਚੱਲ ਰਹੀ ਕੋਸ਼ਿਸ਼ ਨੂੰ ਬਹੁਜਨ ਸਮਾਜ ਪਾਰਟੀ (ਬੀਐਸਪੀ) ਦੀ ਪ੍ਰਧਾਨ...
ਨਵੀਂ ਦਿੱਲੀ (ਭਾਸ਼ਾ) : 2019 ਦੀਆਂ ਲੋਕ ਸਭਾ ਚੋਣਾਂ ਵਿਚ ਮਹਾਂ ਗੰਢਜੋੜ ਨੂੰ ਲੈ ਕੇ ਚੱਲ ਰਹੀ ਕੋਸ਼ਿਸ਼ ਨੂੰ ਬਹੁਜਨ ਸਮਾਜ ਪਾਰਟੀ (ਬੀਐਸਪੀ) ਦੀ ਪ੍ਰਧਾਨ ਮਾਇਆਵਤੀ ਦੇ ਬਿਆਨ ਨਾਲ ਝਟਕਾ ਲੱਗਿਆ ਹੈ। ਮੰਗਲਵਾਰ ਨੂੰ ਬੀਐਸਪੀ ਸੁਪ੍ਰੀਮੋ ਨੇ ਸਪੱਸ਼ਟ ਕੀਤਾ ਕਿ 2019 ਵਿਚ ਸੰਤੋਸ਼ਜਨਕ ਸੀਟਾਂ ਨਾ ਮਿਲਣ ਦੀ ਸੂਰਤ ਵਿਚ ਪਾਰਟੀ ਕਾਂਗਰਸ ਤੋਂ ਸੀਟਾਂ ਦੀ ਭੀਖ ਮੰਗਣ ਦੀ ਬਜਾਏ ਇਕੱਲੀ ਚੋਣਾਂ ਲੜਨਾ ਪਸੰਦ ਕਰੇਗੀ। ਯੂਪੀ ਦੀ ਸਾਬਕਾ ਸੀਐਮ ਮਾਇਆਵਤੀ ਨੇ ਕਿਹਾ ਕਿ ਕਿਸੇ ਗੰਢਜੋੜ ਵਿਚ ਸੀਟਾਂ ਦੀ ਭੀਖ ਮੰਗਣ ਦੀ ਬਜਾਏ ਉਨ੍ਹਾਂ ਦੀ ਪਾਰਟੀ ਆਪਣੇ ਦਮ ‘ਤੇ ਚੋਣਾਂ ਲੜੇਗੀ।
ਬੀਐਸਪੀ ਪ੍ਰਧਾਨ ਦਾ ਬਿਆਨ ਇਸ ਲਈ ਵੀ ਅਹਿਮ ਹੈ ਕਿਉਂਕਿ ਪਿਛਲੇ ਹਫ਼ਤੇ ਹੀ ਉਨ੍ਹਾਂ ਨੇ ਕਾਂਗਰਸ ਦੇ ਨਾਲ ਤਿੰਨ ਰਾਜਾਂ (ਮੱਧ ਪ੍ਰਦੇਸ਼, ਛਤੀਸਗੜ੍ਹ ਅਤੇ ਰਾਜਸਥਾਨ) ਵਿਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿਚ ਗੰਢਜੋੜ ਨਾ ਕਰਨ ਦਾ ਫੈਸਲਾ ਕੀਤਾ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਕਾਂਗਰਸ ਦੇ ਨਾਲ ਬੀਐਸਪੀ ਦੀ ਮਰਜ਼ੀ ਮੁਤਾਬਕ ਸੀਟਾਂ ਉਤੇ ਸਹਿਮਤੀ ਨਹੀਂ ਬਣੀ। ਕਾਂਗਰਸ ਅਤੇ ਭਾਜਪਾ ਉਤੇ ਨਿਸ਼ਾਨਾ ਬਣਾਉਂਦੇ ਹੋਏ ਮਾਇਆਵਤੀ ਨੇ ਕਿਹਾ, ਅਸਲ ਵਿਚ ਭਾਜਪਾ ਐਂਡ ਕੰਪਨੀ ਦੀ ਨਫ਼ਰਤ ਅਤੇ ਹਿੰਸਾ ਦਾ ਦੋਸ਼ ਹੁਣ ਸਿਰ ਚੜ੍ਹ ਕੇ ਬੋਲਣ ਲਗ ਪਿਆ ਹੈ।
ਇਨ੍ਹਾਂ ਦੋਵਾਂ ਪਾਰਟੀਆਂ (ਕਾਂਗਰਸ ਅਤੇ ਭਾਜਪਾ) ਦੀਆਂ ਸਰਕਾਰਾਂ ਦੁਆਰਾ ਫੈਲਾਈ ਜਾ ਰਹੀ ਨਫ਼ਰਤ ਅਤੇ ਹਿੰਸਾ ਦੇ ਖ਼ਿਲਾਫ਼ ਲੜਦੇ ਹੋਏ ਬੀਐਸਪੀ ਦਲਿਤਾਂ. ਆਦਿਵਾਸੀਆਂ. ਪੱਛੜੀਆਂ, ਮੁਸਲਮਾਨਾਂ, ਦੂਜੇ ਅਲਪ ਸੰਖਿਅਕਾਂ ਅਤੇ ਅਗੜੀ ਜਾਤੀਆਂ ਦੇ ਆਤਮ ਸਨਮਾਨ ਦੇ ਨਾਲ ਕੋਈ ਸਮਝੌਤਾ ਨਹੀਂ ਕਰੇਗੀ। ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਮਾਇਆਵਤੀ ਨੇ ਕਿਹਾ ਕਿ ਕਿਸੇ ਚੁਣਾਵੀ ਗੰਢਜੋੜ ਉਤੇ ਅਮਲ ਕਰਨ ਤੋਂ ਪਹਿਲਾਂ ਬੀਐਸਪੀ ਨੇ ਸਨਮਾਨ ਜਨਕ ਗਿਣਤੀ ਵਿਚ ਸੀਟਾਂ ਦਿਤੇ ਜਾਣ ਦੀ ਸ਼ਰਤ ਰੱਖੀ ਹੈ। ਮਾਇਆਵਤੀ ਨੇ ਕਿਹਾ, ਇਸ ਦਾ ਸਾਫ਼ ਮਤਲਬ ਹੈ ਕਿ ਬੀਐਸਪੀ ਕਿਸੇ ਗੰਢਜੋੜ ਵਿਚ ਸੀਟਾਂ ਦੀ ਭੀਖ ਨਹੀਂ ਮੰਗੇਗੀ।
ਜੇਕਰ ਸਨਮਾਨ ਜਨਕ ਸੀਟਾਂ ਨਹੀਂ ਮਿਲਦੀਆਂ ਹਨ ਤਾਂ ਪਾਰਟੀ ਆਪਣੇ ਦਮ ਉਤੇ ਚੋਣ ਮੈਦਾਨ ਵਿਚ ਉਤਰੇਗੀ। ਬੀਐਸਪੀ ਦੇ ਸੰਸਥਾਪਕ ਕਾਂਸ਼ੀਰਾਮ ਦੀ ਡੈੱਥ ਐਨੀਵਰਸਰੀ ਉਤੇ ਮਾਇਆਵਤੀ ਨੇ ਕਿਹਾ ਕਿ ਨਾ ਤਾਂ ਕਾਂਗਰਸ ਅਤੇ ਨਾ ਹੀ ਭਾਜਪਾ ਅਪਰ ਕਾਸਟ, ਗਰੀਬ ਅਤੇ ਬਾਕੀ ਲੋਕਾਂ ਦੇ ਹਿੱਤ ਵਿਚ ਕੰਮ ਕਰਦੀ ਹੈ। ਬੀਐਸਪੀ ਪ੍ਰਧਾਨ ਨੇ ਨਾਲ ਹੀ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਭਾਜਪਾ ਸਰਕਾਰ ਨੂੰ ਜੜ੍ਹੋਂ ਪੁੱਟ ਕੇ ਸੁੱਟਣ ਲਈ ਲਗਾਤਾਰ ਸੰਘਰਸ਼ ਕਰਦੀ ਰਹੇਗੀ। ਮਾਇਆਵਤੀ ਨੇ ਭਾਜਪਾ ਸਰਕਾਰ ਨੂੰ ਜਾਤੀਵਾਦੀ, ਸੰਪਰਦਾਇਕ, ਹੰਕਾਰੀ ਅਤੇ ਸੰਕਰੀ ਸੋਚ ਵਾਲਾ ਕਰਾਰ ਦਿੱਤਾ ਹੈ।