Modi blames Congress and Nehru for 1954 kumbh stampede

ਕੌਸ਼ੰਭੀ : ਪ੍ਰਧਾਨ ਮੰਤਰੀ ਨੇ ਇਸ ਸਾਲ ਦੇ ਕੁੰਭ ਮੇਲੇ ਵਿਚ ਯੂਪੀ ਦੀ ਭਾਜਪਾ ਸਰਕਾਰ ਦੁਆਰਾ ਕੀਤੇ ਗਏ ਪ੍ਰਬੰਧਾਂ ਦੀ ਸ਼ਲਾਘਾ ਕਰਦਿਆਂ 1954 ਵਿਚ ਇਲਾਹਾਬਾਦ ਕੁੰਭ ਮੇਲੇ ਵਿਚ ਮਚੀ ਭਾਜੜ ਨੂੰ ਯਾਦ ਕਰਦਿਆਂ ਕਿਹਾ ਕਿ ਜਦ ਜਵਾਹਰ ਲਾਲ ਨਹਿਰੂ ਪ੍ਰਧਾਨ ਮੰਤਰੀ ਸਨ ਤਾਂ ਕੁੰਭ ਮੇਲੇ ਵਿਚ ਮਚੀ ਭਾਜੜ ਵਿਚ ਹਜ਼ਾਰਾਂ ਲੋਕ ਮਾਰੇ ਗਏ ਸਨ। ਉਂਜ ਉਸ ਸਮੇਂ ਦੀਆਂ ਖ਼ਬਰਾਂ ਵਿਚ ਮਰਨ ਵਾਲਿਆਂ ਦੀ ਗਿਣਤੀ ਸੈਂਕੜਿਆਂ ਵਿਚ ਦੱਸੀ ਗਈ ਸੀ। ਕੁੱਝ ਖ਼ਬਰਾਂ ਵਿਚ ਇਹ ਗਿਣਤੀ ਕਰੀਬ 800 ਦੱਸੀ ਗਈ ਸੀ।

ਮੋਦੀ ਨੇ ਇਥੇ ਚੋਣ ਰੈਲੀ ਵਿਚ ਉਕਤ ਘਟਨਾ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਜਦ ਨਹਿਰੂ ਕੁੰਭ ਵਿਚ ਆਏ ਸਨ ਤਾਂ ਮੇਲਾ ਏਨਾ ਵੱਡਾ ਨਹੀਂ ਹੁੰਦਾ ਸੀ। ਤਦ ਉਥੇ ਭਾਜੜ ਮਚ ਗਈ ਅਤੇ ਹਜ਼ਾਰਾਂ ਲੋਕ ਦਰੜ ਕੇ ਮਾਰੇ ਗਏ ਸਨ ਪਰ ਸਰਕਾਰ ਦੀ ਇੱਜ਼ਤ ਬਚਾਉਣ ਲਈ ਪੰਡਤ ਨਹਿਰੂ 'ਤੇ ਕੋਈ ਦਾਗ਼ ਨਾ ਲੱਗ ਜਾਵੇ, ਇਸ ਲਈ ਖ਼ਬਰਾਂ ਦਬਾ ਦਿਤੀਆਂ ਗਈਆਂ। ਪ੍ਰ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਸ ਵਾਰ ਕੁੰਭ ਵਿਚ ਕਰੋੜਾਂ ਲੋਕ ਆਏ, ਉਹ ਖ਼ੁਦ ਵੀ ਪੁੱਜੇ ਪਰ ਕੋਈ ਭਾਜੜ ਨਹੀਂ ਮਚੀ, ਕੋਈ ਨਹੀਂ ਮਰਿਆ। ਪ੍ਰਬੰਧ ਬਹੁਤ ਵਧੀਆ ਸਨ।

ਉਨ੍ਹਾਂ ਕਿਹਾ ਕਿ ਉਸ ਸਮੇਂ ਦੂਜੀਆਂ ਪਾਰਟੀਆਂ ਦਾ ਨਾਮੋ-ਨਿਸ਼ਾਨ ਨਹੀਂ ਸੀ ਅਤੇ ਰਾਜ ਵਿਚ ਕਾਂਗਰਸ ਦੀ ਸਰਕਾਰ ਸੀ ਪਰ ਤਦ ਵੀ ਖ਼ਬਰਾਂ ਦਬਾ ਦਿਤੀਆਂ ਗਈਆਂ। ਪੀੜਤ ਪਰਵਾਰਾਂ ਨੂੰ ਇਕ ਰੁਪਇਆ ਤਕ ਨਹੀਂ ਦਿਤਾ ਗਿਆ। ਸਿਰਫ਼ ਭਾਜੜ ਹੀ ਨਹੀਂ, ਭਾਜੜ ਮਗਰੋਂ ਜੋ ਕੁੱਝ ਹੋਇਆ, ਉਹ ਭਾਰੀ ਅਸੰਵੇਦਨਸ਼ੀਲਤਾ ਸੀ, ਜ਼ੁਲਮ ਸੀ। ਮੋਦੀ ਨੇ ਕਿਹਾ ਕਿ ਮੈਨੂੰ ਪਹਿਲਾਂ ਵੀ ਕੁੰਭ ਵਿਚ ਕਈ ਵਾਰ ਆਉਣ ਦਾ ਮੌਕਾ ਮਿਲਿਆ। ਜਦ ਸਰਕਾਰ ਬਦਲਦੀ ਹੈ ਅਤੇ ਨੀਅਤ ਬਦਲਦੀ ਹੈ, ਤਦ ਕਿਹੋ ਜਿਹਾ ਨਤੀਜਾ ਆਉਂਦਾ ਹੈ, ਇਹ ਪ੍ਰਯਾਗਰਾਜ ਨੇ ਇਸ ਵਾਰ ਵਿਖਾ ਦਿਤਾ ਹੈ। ਪਹਿਲਾਂ ਕੁੰਭ ਹੁੰਦਾ ਸੀ ਤਾਂ ਅਖਾੜਿਆਂ 'ਚ ਲੜਾਈਆਂ ਹੁੰਦੀਆਂ ਸਨ। ਇਸ ਵਾਰ ਮੇਲਾ ਹੋਇਆ, ਸ਼ਾਨ ਨਾਲ ਸਿਰ ਉੱਚਾ ਹੋ ਗਿਆ। ਇਕ ਦੋਸ਼ ਨਹੀਂਂ ਲੱਗਾ।