ਦਿੱਲੀ ਵਿਚ ਕੋਰੋਨਾ ਨੇ ਪਸਾਰੇ ਪੈਰ, ਕੀ ਚਿਕਨ ਖਾਣ ਨਾਲ ਫੈਲ ਸਕਦਾ ਹੈ ਕੋਰੋਨਾ ਵਾਇਰਸ?
ਲੋਕਾਂ ਦੇ ਮਨਾਂ ਵਿਚੋਂ ਇਸ ਅਫਵਾਹ ਨੂੰ ਦੂਰ ਕਰਨ ਲਈ ਉੱਤਰ ਪ੍ਰਦੇਸ਼ ਦੇ ਗੋਰਖਪੁਰ ਵਿਚ...
ਨਵੀਂ ਦਿੱਲੀ: ਕੋਰੋਨਾ ਵਾਇਰਸ ਨੇ ਦੇਸ਼ ਦੀ ਰਾਜਧਾਨੀ ਦਿੱਲੀ 'ਚ ਦਸਤਕ ਦਿੱਤੀ ਹੈ। ਸੋਮਵਾਰ ਨੂੰ ਇਕ ਕੰਨਫਰਮ ਕੇਸ ਨਵੀਂ ਦਿੱਲੀ ਵਿਚ ਮਿਲਿਆ ਜਦ ਕਿ ਇਕ ਹੋਰ ਕੇਸ ਤੇਲੰਗਾਨਾ ਵਿਚ ਸਾਹਮਣੇ ਆਇਆ ਹੈ। ਇਸ ਸਮੇਂ ਦੋਵੇਂ ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਹੈ। ਸਿਹਤ ਵਿਭਾਗ ਦਾ ਕਹਿਣਾ ਹੈ ਕਿ ਦੋਵਾਂ ਦੀ ਹਾਲਤ ਸਥਿਰ ਹੈ। ਇਸ ਦੌਰਾਨ, ਮਾਸਾਹਾਰੀ ਭੋਜਨ, ਖਾਸ ਕਰ ਕੇ ਚਿਕਨ ਖਾਣ ਬਾਰੇ ਲੋਕਾਂ ਵਿਚ ਇੱਕ ਅਫਵਾਹ ਫੈਲ ਰਹੀ ਹੈ ਕਿ ਇਹ ਕੋਰੋਨਾ ਵਿਸ਼ਾਣੂ ਨੂੰ ਵੀ ਫੈਲਾ ਸਕਦਾ ਹੈ।
ਲੋਕਾਂ ਦੇ ਮਨਾਂ ਵਿਚੋਂ ਇਸ ਅਫਵਾਹ ਨੂੰ ਦੂਰ ਕਰਨ ਲਈ ਉੱਤਰ ਪ੍ਰਦੇਸ਼ ਦੇ ਗੋਰਖਪੁਰ ਵਿਚ ਚਿਕਨ ਦੀ ਇੱਕ ਪੂਰੀ ਪਲੇਟ ਸਿਰਫ 30 ਰੁਪਏ ਵਿਚ ਦਿੱਤੀ ਜਾ ਰਹੀ ਹੈ। ਇਹ ਸੁਣ ਕੇ ਤੁਸੀਂ ਹੈਰਾਨ ਹੋਵੋਗੇ ਪਰ ਗੋਰਖਪੁਰ ਵਿਚ ਚਿਕਨ ਪ੍ਰੇਮੀਆਂ ਦਾ ਇਹ ਸੁਪਨਾ ਸਾਕਾਰ ਹੋਇਆ। ਪੋਲਟਰੀ ਫਾਰਮ ਐਸੋਸੀਏਸ਼ਨ ਨੇ ਇਸ ਲਈ ਸ਼ਨੀਵਾਰ ਨੂੰ ਗੋਰਖਪੁਰ ਵਿਚ ਇੱਕ ਚਿਕਨ ਮੇਲਾ ਲਗਾਇਆ। ਐਸੋਸੀਏਸ਼ਨ ਨੇ ਇਹ ਅਫਵਾਹਾਂ ਨੂੰ ਖਾਰਿਜ ਕਰਨ ਲਈ ਇਹ ਆਯੋਜਨ ਕੀਤਾ।
ਉਹਨਾਂ ਦਾ ਇਹੀ ਮਕਸਦ ਸੀ ਕਿ ਲੋਕਾਂ ਨੂੰ ਇਸ ਅਫ਼ਵਾਹ ਤੋਂ ਦੂਰ ਕੀਤਾ ਜਾ ਸਕੇ। ਪੋਲਟਰੀ ਫਾਰਮ ਐਸੋਸੀਏਸ਼ਨ ਦੇ ਪ੍ਰਧਾਨ ਵਿਨੀਤ ਸਿੰਘ ਨੇ ਦੱਸਿਆ ਕਿ ਕੋਰੋਨਾ ਵਾਇਰਸ ਦੇ ਡਰ ਕਾਰਨ ਲੋਕਾਂ ਨੇ ਪਿਛਲੇ ਇਕ ਮਹੀਨੇ ਤੋਂ ਚਿਕਨ ਖਾਣਾ ਬੰਦ ਕਰ ਦਿੱਤਾ ਸੀ। ਉਸ ਨੇ ਕਿਹਾ, "ਅਸੀਂ ਇਸ ਮੇਲੇ ਦਾ ਆਯੋਜਨ ਕੀਤਾ, ਜਿਸ ਵਿਚ ਅਸੀਂ ਲੋਕਾਂ ਨੂੰ ਚਿਕਨ ਖਾਣ ਲਈ ਬੁਲਾਇਆ। ਅਸੀਂ ਉਨ੍ਹਾਂ ਨੂੰ ਦੱਸਣਾ ਚਾਹੁੰਦੇ ਹਾਂ ਕਿ ਕੋਰੋਨਾ ਵਾਇਰਸ ਚਿਕਨ, ਮਟਨ ਜਾਂ ਮੱਛੀ ਖਾਣ ਨਾਲ ਨਹੀਂ ਹੁੰਦਾ।
ਮੇਲੇ ਲਈ ਅਸੀਂ ਲਗਭਗ ਇੱਕ ਹਜ਼ਾਰ ਕਿਲੋਗ੍ਰਾਮ ਚਿਕਨ ਪਕਾਇਆ ਅਤੇ ਪੂਰਾ ਸਟਾਕ ਖਤਮ ਹੋ ਗਿਆ ਹੈ। ਗੋਰਖਪੁਰ ਰੇਲਵੇ ਸਟੇਸ਼ਨ ਦੇ ਸਾਹਮਣੇ ਲਗਾਏ ਗਏ ਚਿਕਨ ਮੇਲੇ ਵਿਚ ਵੱਡੀ ਗਿਣਤੀ ਵਿਚ ਭੀੜ ਲੱਗੀ ਹੋਈ ਸੀ ਅਤੇ ਇਸ ਕਾਰਨ ਰੇਲਵੇ ਸਟੇਸ਼ਨ ਨੂੰ ਜਾਣ ਵਾਲੀ ਸੜਕ ਕਈ ਘੰਟੇ ਬੰਦ ਰਹੀ। ਦਸ ਦਈਏ ਕਿ ਕੋਰੋਨਾ ਵਾਇਰਸ ਦੇ ਚਲਦੇ ਫਿਲਮਾਂ ਦੇ ਵੱਡੇ ਬਜ਼ਾਰ ਨੂੰ ਵੀ ਝਟਕਾ ਲੱਗਿਆ ਹੈ। ਕੋਰੋਨਾ ਵਾਇਰਸ ਕਰ ਕੇ ਸਿਨੇਮਾ ਬੰਦ ਪਏ ਹਨ।
ਇਸ ਵਾਇਰਸ ਕਾਰਨ 2020 ਵਿਚ ਫ਼ਿਲਮ ਇੰਡਸਟਰੀ ਨੂੰ ਵੱਡਾ ਨੁਕਸਾਨ ਹੋ ਸਕਦਾ ਹੈ। ਹਾਲੀਵੁੱਡ ਰਿਪੋਰਟਰ ਮੁਤਾਬਕ ਗਲੋਬਲ ਬਾਕਸ ਆਫਿਸ ਤੇ ਨੁਕਸਾਨ ਦਾ ਅੰਕੜਾ 1 ਤੋਂ 2 ਅਰਬ ਡਾਲਰ ਤਕ ਪਹੁੰਚ ਸਕਦਾ ਹੈ।ਫਰਵਰੀ 2019 ਵਿਚ ਚੀਨ ਨੇ ਇਕ ਮਹੀਨੇ ਵਿਚ ਸਭ ਤੋਂ ਜ਼ਿਆਦਾ ਬਾਕਸ ਆਫਿਸ ਰੇਵਿਨਿਊ ਕਲੈਕਟ ਕਰਨ ਦਾ ਰਿਕਾਰਡ ਬਣਾਇਆ ਸੀ।
ਮੀਡੀਆ ਰਿਪੋਰਟ ਅਨੁਸਾਰ ਫਰਵਰੀ ਵਿਚ ਬਾਕਸ ਆਫਿਸ ਤੇ ਕੁੱਲ 1.64 ਬਿਲਿਅਨ ਡਾਲਰ ਦੀ ਕੁਲੈਕਸ਼ਨ ਹੋਈ ਸੀ। ਹਾਲੀਵੁੱਡ ਰਿਪੋਰਟਰ ਮੁਤਾਬਕ 2019 ਵਿਚ ਚਾਈਨੀਜ਼ ਨਿਊ ਈਅਰ ਦੌਰਾਨ ਟਿਕਟ ਰੇਵਿਨਿਊ 1.52 ਅਰਬ ਡਾਲਰ ਸੀ। ਪਰ 2020 ਵਿਚ ਤਕ ਇਹ ਅੰਕੜਾ 3.9 ਕਰੋੜ ਡਾਲਰ ਤੇ ਆ ਗਿਆ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।