BSF

ਜੰਮੂ: ਜੰਮੂ ਦੇ ਸਾਂਬਾ ਜ਼ਿਲ੍ਹੇ ਵਿਚ ਬੀਐਸਐਫ਼ ਨੇ ਇਕ ਵੱਡੀ ਅਤਿਵਾਦੀ ਸਾਜਿਸ਼ ਨੂੰ ਨਾਕਾਮ ਕਰ ਦਿੱਤਾ ਹੈ। ਦਰਅਸਲ ਪੰਜਟੀਲਾ ਸਥਿਤ ਬੀਐਸਐਫ਼ ਦੇ ਮੁੱਖ ਦਫ਼ਤਰ ਵਿਚ ਕਮਾਂਡਿੰਗ ਅਧਿਕਾਰੀ ਦੇ ਨਾਮ ਤੋਂ ਪਾਰਸਲ ਆਇਆ। ਇਸ ਪਾਰਸਲ ਵਿਚ ਆਈਈਡੀ ਸੀ ਜਿਸਨੂੰ ਫ਼ੌਜ ਨੇ ਡਿਫ਼ਿਊਜ਼ ਕਰਕੇ ਅਤਿਵਾਦੀ ਸਾਜਿਸ਼ ਨੂੰ ਨਾਕਾਮ ਕਰ ਦਿੱਤਾ ਹੈ।

ਦੱਸ ਦਈਏ ਕਿ ਪਹਿਲੀ ਵਾਰ ਸੁਰੱਖਿਆ ਬਲਾਂ ਨੂੰ ਨਿਸ਼ਾਨਾ ਬਣਾਉਣ ਦੇ ਲਈ ਪਾਰਸਲ ਵਿਚ ਆਈਡੀ ਦਾ ਇਸਤੇਮਾਲ ਕੀਤਾ ਗਿਆ ਹੈ। ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਿਕ ਜੰਮੂ ਦੇ ਸਰਹੱਦੀ ਜ਼ਿਲ੍ਹੇ ਸਾਂਬਾ ਵਿਚ ਬੀਐਸਐਫ਼ ਦੇ ਮੁੱਖ ਦਫ਼ਤਰ ਦੇ ਨੇੜੇ ਇਕ ਪਾਰਸਲ ਪਹੁੰਚਿਆ। ਪਾਰਸਲ ਬੀਐਸਐਫ਼ ਦੇ ਇਕ ਅਧਿਕਾਰੀ ਦੇ ਨਾਮ ਦਾ ਸੀ।

ਬੀਐਸਐਫ਼ ਦੇ ਸੂਤਰਾਂ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਸ਼ਨੀਵਾਰ ਦੇਰ ਸ਼ਾਮ ਕੁਝ ਅਣਪਛਾਤੇ ਵਿਅਕਤੀ ਉਹ ਪਾਰਸਲ ਲੈ ਕੇ ਬੀਐਸਐਫ਼ ਦੀ ਬਟਾਲੀਅਨ ਦੇ ਮੁੱਖ ਗੇਟ ਤੱਕ ਪਹੁੰਚੇ ਅਤੇ ਉੱਥੇ ਤੈਨਾਤ ਜਵਾਨਾਂ ਦਾ ਇਹ ਪਾਰਸਲ ਦਿੱਤਾ ਪਰ ਬੀਐਸਐਫ਼ ਦੇ ਉਸ ਅਧਿਕਾਰੀ ਨੇ ਕਿਸੇ ਪਾਰਸਲ ਦਾ ਆਰਡਰ ਦੇਣ ਦੀ ਗੱਲ ਤੋਂ ਇਨਕਾਰ ਕਰ ਦਿੱਤਾ, ਅਜਿਹੇ ਚ ਬੀਐਸਐਫ਼ ਅਧਿਕਾਰੀ ਨੂੰ ਸ਼ੱਕੀ ਪਾਰਸਲ ਉੱਤੇ ਸ਼ੱਕ ਹੋਇਆ।

ਇਸ ਪਾਰਸਲ ਨੂੰ ਸੁਰੱਖਿਆ ਦੇ ਕਾਰਨਾਂ ਦੇ ਚਲਦੇ ਬੀਐਸਐਫ਼ ਅਤੇ ਸੁਰੱਖਿਆ ਏਜੰਸੀਆਂ ਨੇ ਕਬਜ਼ੇ ਵਿਚ ਲੈ ਲਿਆ। ਜਾਂਚ ਕਰਨ ਤੋਂ ਬਾਅਦ ਉਸ ਵਿਚੋਂ ਕੁਝ ਵਿਸਫੋਟਕ, ਇਕ ਡੇਟਾਨੇਟਰ ਅਤੇ ਇਕ ਬੈਟਰੀ ਮਿਲੀ ਹੈ। ਬੀਐਸਐਫ਼ ਦੇ ਆਈਜੀ ਨੇ ਦੱਸਿਆ ਕਿ ਇਸ ਪਾਰਸਲ ਆਈਈਡੀ ਨੂੰ ਡਿਫ਼ਿਊਜ਼ ਕਰ ਦਿੱਤਾ ਗਿਆ ਹੈ। ਉਥੇ ਇਸ ਸੰਬੰਧ ਵਿਚ ਸਾਂਬਾ ਥਾਣੇ ਵਿਚ ਮਾਮਲਾ ਦਰਜ ਕਰਕੇ ਅਗਲੀ ਜਾਂਚ ਕੀਤੀ ਜਾ ਰਹੀ ਹੈ।