ਆਯੁੱਧਿਆ 'ਚ ਲੱਗੇਗੀ ਰਾਮ ਦੀ 108 ਮੀਟਰ ਉਚੀ ਮੂਰਤੀ, ਪੈਰਾਂ ਵੱਲ ਮੋੜਿਆ ਜਾਵੇਗਾ ਸਰਯੂ ਨਦੀ ਦਾ ਰੁਖ਼
ਉਤਰ ਪ੍ਰਦੇਸ਼ ਦੇ ਆਯੁੱਧਿਆ ਵਿਚ ਪ੍ਰਸਤਾਵਿਤ ਭਗਵਾਨ ਰਾਮ ਦੀ 108 ਮੀਟਰ ਉਚੀ ਮੂਰਤੀ ਲਗਾਉਣ ਲਈ ਸਰਯੂ ਨਦੀ ਦੇ ਇਸ ਪਾਰ ਕਵੀਨ ਮੈਮੋਰੀਅਲ ਦੇ ਨੇੜੇ ਦੀ...
ਆਯੁੱਧਿਆ : ਉਤਰ ਪ੍ਰਦੇਸ਼ ਦੇ ਆਯੁੱਧਿਆ ਵਿਚ ਪ੍ਰਸਤਾਵਿਤ ਭਗਵਾਨ ਰਾਮ ਦੀ 108 ਮੀਟਰ ਉਚੀ ਮੂਰਤੀ ਲਗਾਉਣ ਲਈ ਸਰਯੂ ਨਦੀ ਦੇ ਇਸ ਪਾਰ ਕਵੀਨ ਮੈਮੋਰੀਅਲ ਦੇ ਨੇੜੇ ਦੀ ਜਗ੍ਹਾ ਚੁਣੀ ਗਈ ਹੈ। 'ਨਵਿਆ ਆਯੁੱਧਿਆ' ਪ੍ਰਾਜੈਕਟ ਦੇ ਤਹਿਤ ਪਹਿਲਾਂ ਇਹ ਮੂਰਤੀ ਨਦੀ ਦੇ ਦੂਜੇ ਪਾਸੇ ਲਗਾਉਣ ਦੀ ਯੋਜਨਾ ਸੀ। ਹੁਣ ਇਹ ਵੀ ਤੈਅ ਹੋਇਆ ਹੈ ਕਿ ਰਾਮ ਦੀ ਪੈੜੀ ਤੋਂ ਸਰਯੂ ਦੀ ਧਾਰਾ ਮੋੜ ਕੇ ਮੂਰਤੀ ਤਕ ਲਿਆਂਦੀ ਜਾਵੇਗੀ ਜੋ ਭਗਵਾਨ ਦੇ ਪੈਰਾਂ ਨੂੰ ਛੂਹੇਗੀ।
ਮੂਰਤੀ ਦੇ ਪੈਡਸਟਲ ਦੇ ਕੋਲ ਆਧੁਨਿਕ ਮਿਊਜ਼ੀਅਮ, ਆਡੀਟੋਰੀਅਮ ਅਤੇ ਆਰਟ ਗੈਲਰੀ ਵੀ ਬਣੇਗੀ, ਜਿਸ ਵਿਚ ਵੱਖ-ਵੱਖ ਦੇਸ਼ਾਂ ਦੀਆਂ ਰਾਮਲੀਲਾਵਾਂ ਦਾ ਮੰਚਨ ਹੋਵੇਗਾ। ਪ੍ਰੋਜੈਕਟ ਦਾ ਵਾਤਾਵਰਣ ਅਨੁਕੂਲਨ ਲਈ ਜਲਦ ਨੈਸ਼ਨਲ ਗ੍ਰੀਨ ਟ੍ਰਿਬਿਊਨਲ (ਐਨਜੀਟੀ) ਸਮੇਤ ਹੋਰ ਸੰਸਥਾਵਾਂ ਤੋਂ ਇਜਾਜ਼ਤ ਲੈਣ ਦੀ ਪ੍ਰਕਿਰਿਆ ਸ਼ੁਰੂ ਹੋਵੇਗੀ। ਸੂਤਰਾਂ ਦੀ ਮੰਨੀਏ ਤਾਂ ਪ੍ਰੋਜੈਕਟ ਪੂਰੀ ਤਰ੍ਹਾਂ ਸ਼ੁਰੂ ਹੋਣ ਵਿਚ ਅਜੇ ਕਰੀਬ ਚਾਰ ਮਹੀਨੇ ਲੱਗ ਜਾਣਗੇ। ਇਸ ਦੇ ਲਈ ਯੂਪੀ ਰਾਜ ਨਿਰਮਾਣ ਨਿਗਮ ਨੂੰ ਨਿਰਮਾਣ ਏਜੰਸੀ ਬਣਾਏ ਜਾਣ ਦਾ ਫ਼ੈਸਲਾ ਲਿਆ ਗਿਆ ਹੈ।