ਅਹਿਮਦਗੜ : ਛਪਾਰ  ਮੇਲਾ ਅੱਜ ਦੂਜੇ ਦਿਨ ਵੀ ਮੀਂਹ ਦੀ ਭੇਂਟ ਚੜ੍ਹ ਗਿਆ। ਜਿੱਥੇ  ਆਮ ਆਦਮੀ ਪਾਰਟੀ, ਖੱਬੇ ਪੱਖੀਆਂ ਅਤੇ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਵੱਲੋਂ ਆਪੋ ਆਪਣੀਆਂ ਕਾਨਫਰੰਸਾਂ ਰੱਦ ਕਰ ਦਿੱਤੀਆਂ ਗਈਆਂ ਸਨ ਉਥੇ ਪੰਜਾਬ ਕਾਂਗਰਸ ਅਤੇ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵੱਲੋਂ ਆਪੋ ਆਪਣੀਆਂ ਕਾਨਫਰੰਸਾਂ ਵੱਖ ਵੱਖ ਮੈਰਿਜ ਪੈਲਸਾਂ ਵਿੱਚ ਕੀਤੀਆਂ ਗਈਆਂ। ਪਿਛਲੇ ਦੋ ਦਿਨਾਂ ਤੋਂ ਹੋ ਰਹੀ ਬਾਰਿਸ਼ ਕਾਰਨ ਜਿੱਥੇ ਮੇਲਾ ਛਪਾਰ ਵਿਖੇ ਕਾਨਫਰੰਸ ਵਾਲੀਆਂ ਥਾਵਾਂ ''ਤੇ ਲਗਾਏ ਗਏ

ਪੰਡਾਲਾਂ ਵਿੱਚ ਪੂਰੀ ਤਰਾਂ ਪਾਣੀ ਭਰ ਜਾਣ ਕਾਰਨ ਇਹ ਕਾਨਫਰੰਸਾਂ ਪ੍ਰਭਾਵਿਤ ਹੋਈਆਂ, ਉਥੇ ਮੇਲਾ ਦੇਖਣ ਵਾਲੇ ਮੇਲੀਆਂ ਦਾ ਮਜ਼ਾ ਵੀ ਕਿਰਕਰਾ ਹੋ ਗਿਆ। ਸਵੇਰ ਤੋਂ ਹੀ ਪੈ ਰਹੀ ਬਾਰਿਸ਼ ਕਾਰਨ ਮੇਲੇ 'ਤੇ ਆਏ ਦੁਕਾਨਦਾਰਾਂ ਨੂੰ ਭਾਰੀ ਨੁਕਸਾਨ ਝੱਲਣਾ ਪਿਆ। ਮੇਲੇ ਅੰਦਰ ਦੂਰੋਂ ਦੂਰੋਂ ਆ ਕੇ ਦੁਕਾਨਾਂ, ਮਨੋਰੰਜਨ ਦੇ ਸਾਧਨ ਝੂਲੇ ਤੇ ਸਰਕਸਾਂ ਆਦਿ ਦੁਕਾਨਦਾਰ ਪੂਰੇ ਘਾਟੇ ਵਿੱਚ ਰਹੇ ਜਿਸ ਕਾਰਨ ਉਨ੍ਹਾਂ ਦੇ ਕਿਰਾਏ ਵੀ ਪੂਰੇ ਨਹੀ ਹੋ ਰਹੇ।