ਸਿਆਸੀ ਸਟੇਜਾਂ ਛੱਡ ਹੁਣ ਫੇਸਬੁੱਕ ’ਤੇ ਆਹਮੋ-ਸਾਹਮਣੇ ਹੋਏ ਖਹਿਰਾ ਤੇ ਰਾਜਾ ਵੜਿੰਗ
ਦੋਵੇਂ ਲੀਡਰ ਸੋਸ਼ਲ ਮੀਡੀਆ ਦੇ ਸਹਾਰੇ ਇਕ ਦੂਜੇ ’ਤੇ ਕੱਢ ਰਹੇ ਭੜਾਸ
ਚੰਡੀਗੜ੍ਹ: ਬਠਿੰਡਾ ਲੋਕ ਸਭਾ ਹਲਕੇ ਤੋਂ ਹਾਰਨ ਮਗਰੋਂ ਕਾਂਗਰਸੀ ਉਮੀਦਵਾਰ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਤੇ ਪੰਜਾਬ ਏਕਤਾ ਪਾਰਟੀ ਦੇ ਉਮੀਦਵਾਰ ਸੁਖਪਾਲ ਸਿੰਘ ਖਹਿਰਾ ਵਿਚਾਲੇ ਸ਼ਬਦੀ ਜੰਗ ਅਜੇ ਵੀ ਜਾਰੀ ਹੈ। ਸਿਆਸੀ ਸਟੇਜਾਂ ਤੋਂ ਉਤਰਨ ਤੋਂ ਬਾਅਦ ਹੁਣ ਦੋਵੇਂ ਲੀਡਰ ਸੋਸ਼ਲ ਮੀਡੀਆ ਦੇ ਸਹਾਰੇ ਇਕ ਦੂਜੇ ’ਤੇ ਭੜਾਸ ਕੱਢ ਰਹੇ ਹਨ।
ਦੱਸ ਦਈਏ ਕਿ ਪੀਡੀਏ ਵਲੋਂ ਬਠਿੰਡਾ ਸੀਟ ਤੋਂ ਉਮੀਦਵਾਰ ਰਹੇ ਸੁਖਪਾਲ ਖਹਿਰਾ ਨੇ ਅਪਣੇ ਫੇਸਬੁੱਕ ਪੇਜ ’ਤੇ ਰਾਜਾ ਵੜਿੰਗ ਵਿਰੁਧ ਪੋਸਟ ਵਿਚ ਖ਼ੂਬ ਭੜਾਸ ਕੱਢੀ। ਖਹਿਰਾ ਨੇ ਰਾਜਾ ਵੜਿੰਗ ਨੂੰ ਉਨ੍ਹਾਂ ’ਤੇ ਲਾਏ ਇਲਜ਼ਾਮ ਸਾਬਿਤ ਕਰਨ ਦੀ ਚੁਣੌਤੀ ਦਿਤੀ ਹੈ। ਖਹਿਰਾ ਨੇ ਸਵਾਲ ਚੁੱਕਦਿਆਂ ਕਿਹਾ ਕਿ ਜੇਕਰ ਵੜਿੰਗ ਮੇਰੇ ’ਤੇ ਲਾਏ ਇਲਜ਼ਾਮ ਸਾਬਿਤ ਕਰ ਦੇਵੇ ਤਾਂ ਉਹ ਸਿਆਸਤ ਤੋਂ ਸੰਨਿਆਸ ਲੈ ਲੈਣਗੇ ਪਰ ਜੇਕਰ ਰਾਜਾ ਵੜਿੰਗ ਇਲਜ਼ਾਮ ਸਾਬਿਤ ਨਾ ਕਰ ਸਕਿਆ ਤਾਂ ਕੀ ਉਹ ਸਿਆਸਤ ਛੱਡੇਗਾ?
ਖਹਿਰਾ ਨੇ ਕਿਹਾ ਕਿ ਹੋਰਨਾਂ ਉਪਰ ਇਲਜ਼ਾਮ ਲਗਾਉਣ ਤੋਂ ਪਹਿਲਾਂ ਵੜਿੰਗ ਅਪਣੇ ਕਿਰਦਾਰ ਵੱਲ ਝਾਤ ਮਾਰੇ ਤੇ ਬੇਬੁਨਿਆਦ ਇਲਜ਼ਾਮਾਂ ਲਈ ਮਾਫ਼ੀ ਮੰਗੇ।