ਨਵੀਂ ਦਿੱਲੀ (ਭਾਸ਼ਾ): ਪਾਰੀ ਦੇ ਸਾਰੇ ਵਿਕੇਟ ਇਕੱਲੇ ਝਟਕਾਉਣਾ ਕਿਸੇ ਸੁਪਨੇ  ਦੇ ਸੱਚ ਹੋਣ ਵਰਗਾ ਹੀ ਹੈ। ਮਨੀਪੁਰ ਦੇ 18 ਸਾਲ ਦੇ ਗੇਂਦਬਾਜ ਨੇ ਪਾਰੀ ਵਿਚ 10 ਵਿਕੇਟ ਝਟਕਾਉਣ ਦਾ ਕਾਰਨਾਮਾ ਕੀਤਾ ਹੈ। ਖੱਬੇ ਹੱਥ ਦੇ ਮੀਡੀਅਮ ਪੇਸਰ ਰੇਕਸ ਰਾਜ ਕੁਮਾਰ ਸਿੰਘ ਨੇ ਚਾਰ ਦਿਨਾਂ ਅੰਡਰ-19 ਟੂਰਨਾਮੈਂਟ- ਕੂਚ ਬਿਹਾਰ ਟਰਾਫੀ ਵਿਚ ਅਰੁਣਾਚਲ ਪ੍ਰਦੇਸ਼ ਦੇ ਵਿਰੁਧ ਇਕ ਪਾਰੀ ਵਿਚ 10 ਵਿਕੇਟ ਝਟਕਾਏ। ਮੰਗਲਵਾਰ ਨੂੰ ਰੁਰਲ ਡੈਵਲਪਮੇਂਟ ਟਰੱਸਟ ਸਟੇਡਿਅਮ ਅਨੰਤਪੁਰ ਵਿਚ ਮਨੀਪੁਰ ਨੇ ਅਰੁਣਾਚਲ ਪ੍ਰਦੇਸ਼ ਨੂੰ ਦੂਜੀ ਪਾਰੀ ਵਿਚ 36 ਦੌੜਾਂ ਉਤੇ ਆਲ ਆਊਟ ਕਰ ਦਿਤਾ।

ਕਮਾਲ ਦੀ ਗੱਲ ਇਹ ਹੈ ਕਿ ਰਾਜ ਕੁਮਾਰ ਨੇ 9.5 ਓਵਰਾਂ ਵਿਚ 6 ਮੇਡਨ ਦੇ ਨਾਲ 11 ਦੌੜਾਂ ਦੇ ਕੇ 10 ਵਿਕੇਟ (9.5-6-11-10)  ਝਟਕਾਏ। ਗੇਂਦਬਾਜ ਰਾਜਕੁਮਾਰ ਨੇ ਅਪਣੀ ਕ੍ਰਿਸ਼ਮਈ ਗੇਂਦਬਾਜੀ ਦੇ ਦੌਰਾਨ ਪੰਜ ਖਿਡਾਰੀਆਂ ਨੂੰ ਬੋਲਡ ਕੀਤਾ। ਜਦੋਂ ਕਿ ਦੋ ਖਿਡਾਰੀ ਐਲਬੀਡਬਲਿਊ, ਦੋ ਕੱਟ ਬਿਹਾਇੰਡ ਅਤੇ ਇਕ ਕੈਚ ਆਊਟ ਹੋਇਆ। ਅਰੁਣਾਚਲ ਪ੍ਰਦੇਸ਼ ਦੀ ਪਹਿਲੀ ਪਾਰੀ ਵਿਚ 138 ਦੌੜਾਂ ਦੇ ਜਵਾਬ ਵਿਚ ਮਨੀਪੁਰ ਦੀ ਪਾਰੀ 122 ਦੌੜਾਂ ਉਤੇ ਸਿਮਟ ਗਈ ਸੀ।

ਆਖ਼ਰਕਾਰ ਦੂਜੀ ਪਾਰੀ ਵਿਚ ਅਰੁਣਾਚਲ ਪ੍ਰਦੇਸ਼ ਨੂੰ 36 ਦੌੜਾਂ ਉਤੇ ਢੇਰ ਕਰਕੇ ਮਨੀਪੁਰ ਨੂੰ ਜਿੱਤ ਲਈ ਮਿਲੇ 53 ਦੌੜਾਂ ਦਾ ਟੀਚਾ ਬਿਨਾਂ ਕਿਸੇ ਨੁਕਸਾਨ ਦੇ ਹਾਸਲ ਕਰ ਲਿਆ। ਰਾਜਕੁਮਾਰ ਨੇ ਪੂਰੇ ਮੈਚ ਵਿਚ 15 ਵਿਕੇਟ ਝਟਕਾਏ, ਜਿਸ ਵਿਚ ਪਹਿਲੀ ਪਾਰੀ ਵਿਚ ਉਨ੍ਹਾਂ ਦੇ 5 ਵਿਕੇਟ (5/33) ਵੀ ਸ਼ਾਮਲ ਹਨ। ਇਸ ਗੇਂਦਬਾਜ ਨੇ ਪਿਛਲੇ ਹੀ ਮਹੀਨੇ ਸਿੱਕਮ ਦੇ ਵਿਰੁਧ ਰਣਜੀ ਮੁਕਾਬਲਾ ਖੇਡ ਕੇ ਪਹਿਲੇ ਸ਼੍ਰੇਣੀ ਕ੍ਰਿਕੇਟ ਵਿਚ ਸ਼ੁਰੂਆਤ ਕੀਤੀ।