ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਕਪਤਾਨ ਮਹਿੰਦਰ ਸਿੰਘ ਧੋਨੀ ਨੇ ਆਮਰਪਾਲੀ ਗਰੁੱਪ ਵਿਰੁੱਧ ਸੁਪਰੀਮ ਕੋਰਟ ਦਾ ਦਰਵਾਜਾ ਖੜਕਾਇਆ ਹੈ। ਧੋਨੀ ਨੇ ਸੁਪਰੀਮ ਕੋਰਟ 'ਚ ਪਟੀਸ਼ਨ ਦਾਖ਼ਲ ਕਰ ਕੇ ਬਕਾਇਆ 40 ਕਰੋੜ ਰੁਪਏ ਮੰਗੇ ਹਨ। ਧੋਨੀ ਨੇ ਪਟੀਸ਼ਨ 'ਚ ਕਿਹਾ ਹੈ ਕਿ ਉਹ ਕਾਫ਼ੀ ਲੰਮੇ ਸਮੇਂ ਤਕ ਕੰਪਨੀ ਦਾ ਚਿਹਰਾ ਰਹੇ ਪਰ ਉਨ੍ਹਾਂ ਨੂੰ ਭੁਗਤਾਨ ਨਹੀਂ ਕੀਤਾ ਗਿਆ।

ਜ਼ਿਕਰਯੋਗ ਹੈ ਕਿ ਆਮਰਪਾਲੀ ਗਰੁੱਪ 'ਤੇ ਆਪਣੇ ਹਜ਼ਾਰਾਂ ਫ਼ਲੈਟ ਖ਼ਰੀਦਾਰਾਂ ਦੇ ਪੈਸੇ ਠੱਗਣ ਦਾ ਦੋਸ਼ ਹੈ। ਇਨ੍ਹਾਂ ਲੋਕਾਂ ਨੇ ਵੀ ਸੁਪਰੀਮ ਕੋਰਟ 'ਚ ਪਟੀਸ਼ਨ ਦਾਖ਼ਲ ਕੀਤੀ ਹੋਈ ਹੈ। ਆਪਣੀ ਪਟੀਸ਼ਨ 'ਚ ਧੋਨੀ ਨੇ ਕਿਹਾ ਕਿ ਉਹ ਸਾਲ 2009 ਤੋਂ 2015 ਤਕ ਆਮਰਪਾਲੀ ਗਰੁੱਪ ਦੇ ਬ੍ਰਾਂਡ ਅੰਬੈਸਡਰ ਸਨ। ਸਾਲ 2016 'ਚ ਜਦੋਂ ਕੰਪਨੀ 'ਤੇ ਖਰੀਦਦਾਰਾਂ ਨੂੰ ਠੱਗਣ ਦਾ ਦੋਸ਼ ਲੱਗਿਆ ਤਾਂ ਧੋਨੀ ਨੇ ਆਮਰਪਾਲੀ ਨਾਲੋਂ ਖ਼ੁਦ ਨੂੰ ਅਲੱਗ ਕਰ ਲਿਆ। ਉਦੋਂ ਤੋਂ ਕੰਪਨੀ ਨੇ ਉਨ੍ਹਾਂ ਦੇ ਬਕਾਇਆ ਪੈਸੇ ਨਹੀਂ ਦਿੱਤੇ।

ਜ਼ਿਕਰਯੋਗ ਹੈ ਕਿ ਆਮਰਪਾਲੀ ਗਰੁੱਪ 'ਤੇ ਲਗਭਗ 45 ਹਜ਼ਾਰ ਖ਼ਰੀਦਾਰਾਂ ਨੂੰ ਘਰ/ਫ਼ਲੈਟ ਨਾ ਦੇਣ ਦਾ ਦੋਸ਼ ਹੈ। ਇਸੇ ਕਾਰਨ ਉਦੋਂ ਹਜ਼ਾਰਾਂ ਲੋਕਾਂ ਨੇ ਗਰੁੱਪ ਵਿਰੁੱਧ ਸੋਸ਼ਲ ਮੀਡੀਆ 'ਤੇ ਮੁਹਿੰਮ ਚਲਾਈ ਸੀ। ਇਸੇ ਮੁਹਿੰਮ ਤੋਂ ਬਾਅਦ ਧੋਨੀ ਨੇ ਘਰ ਖ਼ਰੀਦਦਾਰਾਂ ਦਾ ਸਮਰਥਨ ਕਰਦਿਆਂ ਆਮਰਪਾਲੀ ਗਰੁੱਪ ਨਾਲ ਆਪਣੇ ਸਬੰਧ ਤੋੜ ਦਿੱਤੇ ਸਨ। 

ਫਿਲਹਾਲ ਸੁਪਰੀਮ ਕੋਰਟ ਦੇ ਹੁਕਮ ਤੋਂ ਬਾਅਦ ਆਮਰਪਾਲੀ ਸਮੂਹ ਦੇ ਸੀਐਮਡੀ ਅਨਿਲ ਕੁਮਾਰ ਸ਼ਰਮਾ ਤੋਂ ਇਲਾਵਾ ਦੋ ਡਾਇਰੈਕਟਰ ਸ਼ੋਵ ਪ੍ਰਿਆ ਅਤੇ ਅਜੈ ਕੁਮਾਰ ਪੁਲਿਸ ਹਿਰਾਸਤ 'ਚ ਹਨ।