ਰਾਗੀ ਸਭਾ ਨੇ ਬੇਅਦਬੀ ਤੇ ਨਸ਼ਿਆਂ ਵਿਰੁਧ ਮਾਰਚ ਕਢਿਆ
ਸ਼੍ਰੋਮਣੀ ਰਾਗੀ ਸਭਾ ਦਰਬਾਰ ਸਾਹਿਬ ਵਲੋਂ ਘੰਟਾ ਘਰ ਤੋਂ ਹਾਲ ਗੇਟ ਤਕ ਨਸ਼ਿਆਂ ਅਤੇ ਬੇਅਦਬੀ ਵਿਰੁਧ ਰੋਸ ਮਾਰਚ ਕਢਿਆ ਗਿਆ............
ਅੰਮ੍ਰਿਤਸਰ : ਸ਼੍ਰੋਮਣੀ ਰਾਗੀ ਸਭਾ ਦਰਬਾਰ ਸਾਹਿਬ ਵਲੋਂ ਘੰਟਾ ਘਰ ਤੋਂ ਹਾਲ ਗੇਟ ਤਕ ਨਸ਼ਿਆਂ ਅਤੇ ਬੇਅਦਬੀ ਵਿਰੁਧ ਰੋਸ ਮਾਰਚ ਕਢਿਆ ਗਿਆ। ਪ੍ਰਦਰਸ਼ਨਕਾਰੀਆਂ ਨੇ ਹੱਥਾਂ ਵਿਚ ਬੈਨਰ ਫੜੇ ਹੋਏ ਸਨ ਜਿਨ੍ਹਾਂ 'ਤੇ ਨਸ਼ਿਆਂ ਵਿਰੁਧ ਲੋਕ ਜਾਗਰੂਕ ਕਰਨ ਦੇ ਨਾਲ-ਨਾਲ ਸਰਕਾਰ ਨੂੰ ਜ਼ੋਰ ਦਿਤਾ ਗਿਆ ਕਿ ਉਹ ਅਜਿਹੇ ਦੋਸ਼ੀਆਂ ਨੂੰ ਫਾਂਸੀ ਦੀ ਸਜ਼ਾ ਦੇਵੇ। ਉਨ੍ਹਾਂ ਵਲੋਂ ਇਹ ਵੀ ਦੋਸ਼ ਲਾਇਆ ਗਿਆ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਸ਼ਰਾਰਤੀ ਤਤ ਮੌਕਾ ਪਾ ਕੇ ਕਰ ਜਾਂਦੇ ਹਨ ਜੋ ਮੰਦਭਾਗਾ ਹੈ। ਦੋਸ਼ੀ ਹਕੂਮਤ ਤੋਂ ਡਰਨ ਦੀ ਥਾਂ ਗ਼ੈਰ—ਜ਼ਿੰਮੇਵਾਰ ਹਰਕਤਾਂ ਕਰਦੇ ਹਨ ਤਾਕਿ ਭਾਈਚਾਰਕ ਸਾਂਝ ਨੂੰ ਤਾਰਪੀਡੋ ਕੀਤੇ ਜਾ ਸਕੇ।
ਉਨ੍ਹਾਂ ਸਰਕਾਰ 'ਤੇ ਜ਼ੋਰ ਪਾਇਆ ਕਿ ਉਹ ਸਮਾਜਕ ਬੁਰਿਆਈਆਂ ਵਿਰੁਧ ਦੋਸ਼ੀਆਂ ਨੂੰ ਸਖ਼ਤ ਸਜ਼ਾ ਦੇ ਕੇ ਵਾਪਰ ਰਹੇ ਕਾਂਡ ਵਿਰੁਧ ਸ਼ਿਕੰਜਾ ਕੱਸੇ। ਉਨ੍ਹਾਂ ਮੰਗ ਕੀਤੀ ਕਿ ਪੰਜਾਬ ਨਸ਼ਾ ਮੁਕਤ ਕੀਤੇ ਜਾਵੇ, ਚਿੱਟੇ ਤੇ ਮੁਕੰਮਲ ਪਾਬੰਦੀ ਲਾਈ ਜਾਵੇ, ਡਰੱਗਜ਼ ਦੇ ਵਪਾਰੀ ਫੜੇ ਜਾਣ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਕਰਨ ਵਾਲੇ ਦੋਸ਼ੀ ਨੂੰ ਫਾਂਸੀ ਦੀ ਸਜਾ ਦਿਤੀ ਜਾਵੇ ।