ਬੋਤਲ ਵਿਚ ਲਿਖਿਆ 150 ਵਾਰ ਸਤਿਨਾਮ ਵਾਹਿਗੁਰੂ ਦਾ ਜਾਪ
ਜਸਮੇਰ ਸਿੰਘ ਸੰਧੂ ਨੇ ਹੈਰਾਨ ਕਰਨ ਵਾਲਾ ਕੀਤਾ ਕਾਰਨਾਮਾ
ਖਾਲੜਾ : ਜਿਥੇ ਅੱਜਕਲ ਪੰਜਾਬ ਵਿਚ ਵੱਡੇ ਪੱਧਰ 'ਤੇ ਨਸ਼ਿਆਂ ਦਾ ਦੌਰ ਚਲ ਰਿਹਾ ਹੈ ਅਤੇ ਹੋਰ ਸਮਾਜਕ ਕੁਰੀਤੀਆਂ ਵਿਚ ਨੌਜਵਾਨ ਫਸੇ ਹੋਏ ਹਨ ਜਾਂ ਫਸਦੇ ਜਾ ਰਹੇ ਹਨ, ਉੱਥੇ ਹੀ ਇਕ ਨੌਜਵਾਨਾਂ ਲਈ ਪਿੰਡ ਡੱਲ ਜ਼ਿਲ੍ਹਾ ਤਰਨ ਤਾਰਨ ਦੇ ਸਰਹੱਦੀ ਪਿੰਡ ਦਾ ਨੌਜਵਾਨ ਜਸਮੇਰ ਸਿੰਘ ਸੰਧੂ ਜੋ ਕਿ ਦੁਨੀਆਂ ਨੂੰ ਹੈਰਾਨ ਕਰਨ ਵਾਲੇ ਕਾਰਨਾਮੇ ਕਰ ਰਿਹਾ ਹੈ ਜਿਸ ਦੀ ਮਿਸਾਲ ਉਸ ਵੇਲੇ ਵੇਖਣ ਨੂੰ ਮਿਲੀ ਜਦੋਂ ਉਸ ਨੇ ਅਪਣੇ ਹੱਥਾਂ ਨਾਲ ਸੱਭ ਤੋਂ ਛੋਟੀ ਜ਼ਿੰਦਰੀ (ਤਾਲਾ) ਨੂੰ ਤਿਆਰ ਕਰਨ ਦਾ ਦਾਅਵਾ ਕੀਤਾ ਹੈ।
ਇਸ ਤੋਂ ਇਲਾਵਾ ਸੱਭ ਤੋਂ ਛੋਟੀ ਐਨਕ ਬਣਾਉਣ ਦਾ ਵੀ ਉਸ ਨੇ ਪੱਤਰਕਾਰਾਂ ਸਾਹਮਣੇ ਦਾਅਵਾ ਕੀਤਾ ਹੈ। ਇਸ ਤੋਂ ਇਲਾਵਾ ਸੱਭ ਤੋਂ ਹੈਰਾਨ ਕਰਨ ਵਾਲੀ ਉਸ ਨੇ ਜੋ ਵਸਤੂ ਦਿਖਾਈ ਉਹ ਸੀ ਕੱਚ ਦੀ ਬੋਤਲ ਜਿਸ ਵਿਚ ਉਸ ਨੇ ਅਪਣੇ ਹੱਥਾਂ ਨਾਲ ਕਰੀਬ 150 ਵਾਰ ਸਤਿਨਾਮ ਵਹਿਗੁਰੂ ਦਾ ਜਾਪ ਲਿਖਿਆ ਹੈ ਜੋ ਕਿ ਅੱਖਾਂ 'ਤੇ ਵਿਸ਼ਵਾਸ ਕਰਨਾ ਵੀ ਬੜਾ ਮੁਸ਼ਕਲ ਹੈ ਕਿ ਕਿਸ ਤਰ੍ਹਾਂ ਇਸ ਨੇ ਇਕ ਬੋਤਲ ਵਿਚ ਅੰਦਰਲੇ ਵਾਰ ਇਹ ਸਤਿਨਾਮ ਵਾਹਿਗੁਰੂ ਦਾ ਜਾਪ ਲਿਖਿਆ ਹੈ।
ਇਸ ਸਬੰਧੀ ਜਦੋਂ ਜਸਮੇਰ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਸ ਨੇ ਕਿਹਾ,''ਮੈਂ ਇਕ ਕਿਸਾਨ ਹਾਂ ਅਤੇ ਮੈਨੂੰ ਹਮੇਸ਼ਾ ਹੀ ਸ਼ੌਕ ਹੈ ਕਿ ਮੈਂ ਦੁਨੀਆਂ ਨੂੰ ਕੁੱਝ ਵਖਰਾ ਕਰ ਕੇ ਦਿਖਾਵਾ ਜਿਸ ਤੋਂ ਲੋਕ ਪ੍ਰਭਾਵਤ ਹੋਣ।''
ਸੋ ਇਸੇ ਨੂੰ ਧਿਆਨ ਵਿਚ ਰੱਖ ਕੇ ਮੈਂ ਕਈ ਹੈਰਾਨ ਕਰਨ ਵਾਲੇ ਪ੍ਰੋਡਕਟ ਬਣਾ ਚੁਕਾ ਹਾਂ ਅਤੇ ਆਉਣ ਵਾਲੇ ਸਮੇਂ ਵਿਚ ਵੀ ਦੁਨੀਆਂ ਨੂੰ ਹੈਰਾਨ ਕਰਨ ਵਾਲੇ ਕਾਰਨਾਮੇ ਕਰ ਕੇ ਪ੍ਰਸੰਨ ਕਰਨ ਦਾ ਸ਼ੌਂਕ ਰੱਖਦਾ ਹਾਂ, ਇਸ ਤੋਂ ਇਲਾਵਾ ਉਨ੍ਹਾਂ ਅਪਣੇ ਪਰਵਾਰ ਦਾ ਅਤੇ ਸਹਿਯੋਗੀ ਮਿੱਤਰਾਂ ਦਾ ਵੀ ਦਿਲੋਂ ਧਨਵਾਦ ਕੀਤਾ ਜਿਨ੍ਹਾਂ ਨੇ ਉਸ ਨੂੰ ਅਨੋਖੇ ਕੰਮ ਕਰਨ ਵਿਚ ਸਹਿਯੋਗ ਦਿਤਾ। ਇਸ ਤੋਂ ਇਲਾਵਾ ਉਨ੍ਹਾਂ ਕਿਹਾ ਕਿ ਮੇਰਾ ਸੁਪਨਾ ਵਰਲਡ ਰੀਕਾਰਡ ਬੁਕ ਵਿਚ ਨਾਂ ਦਰਜ ਕਰਵਾਉਣਾ ਹੈ।