ਪੰਜਾਬ ਅੰਦਰ ਪਾਕਿਸਤਾਨ ਦੀ ਸਰਹੱਦ ਨਾਲ ਲੱਗਦੇ 6 ਜ਼ਿਲ੍ਹਿਆਂ ਦੇ ਅਨੇਕਾਂ ਪਿੰਡਾਂ ਦੇ ਕਿਸਾਨਾਂ ਦੀ ਕੰਡਿਆਲੀ ਤਾਰ ਤੋਂ ਪਾਰ ਪੈਂਦੀ 21600 ਏਕੜ ਜ਼ਮੀਨ ਦਾ...
ਗੁਰਦਾਸਪੁਰ, ਪੰਜਾਬ ਅੰਦਰ ਪਾਕਿਸਤਾਨ ਦੀ ਸਰਹੱਦ ਨਾਲ ਲੱਗਦੇ 6 ਜ਼ਿਲ੍ਹਿਆਂ ਦੇ ਅਨੇਕਾਂ ਪਿੰਡਾਂ ਦੇ ਕਿਸਾਨਾਂ ਦੀ ਕੰਡਿਆਲੀ ਤਾਰ ਤੋਂ ਪਾਰ ਪੈਂਦੀ 21600 ਏਕੜ ਜ਼ਮੀਨ ਦਾ ਮੁਆਵਜ਼ਾ ਨਾ ਮਿਲਣ ਕਾਰਨ ਕਿਸਾਨੀ ਬੇਹੱਦ ਰੋਸ ਵਿਚ ਹਨ। ਬਿਨਾਂ ਸ਼ੱਕ ਇਸ ਹਜ਼ਾਰਾਂ ਏਕੜ ਜ਼ਮੀਨ ਦੇ ਮਾਲਕ ਕਿਸਾਨ ਹੀ ਹਨ ਪਰ ਸਬੰਧਤ ਕਿਸਾਨ ਇਸ ਤਰ੍ਹਾਂ ਦੇ ਮਾਲਕ ਨਹੀਂ ਕਿ ਜਦੋਂ ਚਾਹੁਣ ਉਸ ਸਮੇਂ ਉਹ ਅਪਣੀ ਮਾਲਕੀ ਵਾਲੀ ਜ਼ਮੀਨ ਦਾ ਗੇੜਾ ਆਦਿ ਮਾਰ ਸਕਣ।
ਰਸਤੇ ਵਿਚ ਕੰਡਿਆਲੀ ਤਾਰ ਹੋਣ ਕਾਰਨ ਸਬੰਧਤ ਕਿਸਾਨ ਇਥੇ ਸਰਹੱੱਦ 'ਤੇ ਤਾਇਨਾਤ ਬੀ. ਐਸ. ਐਫ਼. 'ਤੇ ਹੀ ਨਿਰਭਰ ਹਨ ਕਿਉਂਕਿ ਉਹ ਬਕਾਇਦਾ ਸਰਹੱਦ ਤੇ ਤਾਇਨਾਤ ਸੀਮਾ ਸੁਰੱਖਿਆ ਬਲਾਂ ਦੇ ਅਧਿਕਾਰੀਆਂ ਜਾਂ ਜਵਾਨਾਂ ਤੋਂ ਮੰਜ਼ੂਰੀ ਮਿਲਣ ਉਪਰੰਤ ਹੀ ਅਪਣੀ ਮਾਲਕੀ ਵਾਲੀ ਜ਼ਮੀਨ ਵਿਚ ਜਾ ਆ ਸਕਦੇ ਹਨ। ਇਹ ਕੰਡਿਆਲੀ ਤਾਰ ਪੰਜਾਬ ਅੰਦਰ ਸੰਤਾਪ ਭਰੇ ਦਿਨਾਂ ਦੌਰਾਨ ਸੰਨ 1988 ਵਿਚ 30 ਸਾਲ ਪਹਿਲਾਂ ਪੰਜਾਬ ਦੀ ਸਰਹੱਦ ਨਾਲ ਲੱਗਦੀ ਸਰਹੱਦੀ ਜ਼ਮੀਨ ਤੋਂ ਥੋੜਾ ਜਿਹਾ ਹੀ ਪਿਛਾਂਹ ਪੰਜਾਬ ਅੰਦਰ ਪੈਂਦੇ ਸਾਰੇ 6 ਜ਼ਿਲਿਆਂ ਦੀ ਸਰਹੱਦ 'ਤੇ ਲਗਾਈ ਗਈ ਸੀ।
ਉਸ ਸਮੇਂ ਤੋਂ ਸਬੰਧਤ ਜ਼ਮੀਨ ਦੀ ਮਾਲਕੀ ਵਾਲੇ ਕਿਸਾਨ ਅਪਣੇ ਆਪ ਨੂੰ ਉਸ ਜ਼ਮੀਨ ਦੇ ਮਾਲਕ ਹੀ ਨਹੀਂ ਸਮਝਦੇ । ਕਿਰਤੀ ਕਿਸਾਨ ਯੂਨੀਅਨ ਦੇ ਸੂਬਾਈ ਆਗੂ ਸਤਿਬੀਰ ਸਿੰਘ ਨੇ ਸਪੋਕਸਮੈਨ ਨਾਲ ਗੱਲਬਾਤ ਕਰਦਿਆਂ ਦਸਿਆ ਕਿ ਕੰਡਿਆਲੀ ਤਾਰ ਤੋਂ ਪਾਰ ਪੈਂਦੀ ਜ਼ਮੀਨ ਮਾਲਕ ਪਿਛਲੇ ਕਈ ਸਾਲਾਂ ਤੋਂ ਸੰਘਰਸ਼ ਕਰ ਰਹੇ ਹਨ। ਪੰਜਾਬ ਬਾਰਡਰ ਵੈਲਫ਼ੇਅਰ ਸੁਸਾਇਟੀ ਵਲੋਂ ਹਾਈ ਕੋਰਟ ਵਿਚ ਇਸ ਸਬੰਧੀ ਰਿੱਟ ਵੀ ਪਾਈ ਗਈ ਸੀ। ਇਸ ਦੇ ਜਵਾਬ ਵਿਚ ਕੇਂਦਰ ਸਰਕਾਰ ਨੇ ਕਿਹਾ ਸੀ ਕਿ ਪੰਜਾਬ ਸਰਕਾਰ ਸਾਲ 2015 ਦਾ ਸਰਟੀਫ਼ੀਕੇਟ ਜਾਰੀ ਨਹੀਂ ਕਰਦੀ ਉਹ ਕਿਸਾਨਾਂ ਨੂੰ ਸਾਲ 2016 ਦਾ ਮੁਆਵਜ਼ਾ ਨਹੀਂ ਦਿਵਾ ਸਕਦੇ।
ਕਿਸਾਨ ਆਗੂ ਕਾਮਰੇਡ ਚੰਨਣ ਸਿੰਘ ਨੇ ਕਿਹਾ ਹੈ ਕਿ ਕੇਂਦਰ ਸਰਕਾਰ ਲੋੜੀਂਦਾ ਸਰਟੀਫ਼ੀਕੇਟ ਜਾਰੀ ਕਰੇ ਤਾਂ ਜੋ 2016-17 ਦਾ ਠੇਕਾ ਜਾਰੀ ਕੀਤਾ ਜਾ ਸਕੇ। ਜਾਣਕਾਰੀ ਅਨੁਸਾਰ ਦੋ ਦਿਨ ਪਹਿਲਾਂ ਕਿਸਾਨਾਂ ਦਾ ਇਕ ਵਫ਼ਦ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਅਤੇ ਲੋਕ ਸਭਾ ਮੈਂਬਰ ਸੁਨੀਲ ਜਾਖੜ ਦੇ ਧਿਆਨ ਵਿਚ ਪੂਰਾ ਮਾਮਲਾ ਲਿਆਂਦਾ ਹੈ ਕਿ ਉਹ ਕਿਸਾਨਾਂ ਦੇ ਇਸ ਮੁੱਦੇ ਤੋਂ ਇਲਾਵਾ ਕਿਸਾਨਾਂ ਦੀਆਂ ਹੋਰ ਮੰਗਾਂ ਅਤੇ ਦੁੱਖ ਤਕਲੀਫ਼ਾਂ ਦਾ ਸਾਰਾ ਮਾਮਲਾ ਜ਼ੋਰਦਾਰ ਢੰਗ ਨਾਲ ਲੋਕ ਸਭਾ ਵਿਚ ਵੀ ਲਿਆਉਣਗੇ।
ਜਾਖੜ ਨੇ ਇਹ ਵੀ ਕਿਹਾ ਕਿ ਉਹ ਕਿਸਾਨ ਆਗੂਆਂ ਨੂੰ ਗ੍ਰਹਿ ਮੰਤਰੀ ਕੋਲੋਂ ਮਿਲਣ ਦਾ ਸਮਾਂ ਵੀ ਲੈ ਕੇ ਦਿਵਾਉਣਗੇ। ਇਸ ਵਫ਼ਦ 'ਚ ਕਿਸਾਨ ਆਗੂ ਪ੍ਰਧਾਨ ਰਘੁਬੀਰ ਸਿਘ ਭੰਗਾਲਾ, ਮੀਤ ਪ੍ਰਧਾਨ ਸੁਰਜੀਤ ਸਿੰਘ ਭੂਰਾ, ਪ੍ਰਗਟ ਸਿੰਘ ਤਰਨਤਾਰਨ, ਪਠਾਨਕੋਟ ਦੇ ਜ਼ਿਲ੍ਹਾ ਪ੍ਰਧਾਨ ਮੇਜਰ ਸਿੰਘ, ਗੁਰਮੀਤ ਸਿੰਘ ਥੰਮਣ, ਚੇਲਾ ਮਾਹੀ, ਸਤਨਾਮ ਸਿੰਘ ਕਾਲੇਕਾ ਵੀ ਸ਼ਾਮਲ ਸਨ।
