ਆਗਰਾ :- ਉੱਤਰ ਪ੍ਰਦੇਸ਼ ਦੇ ਆਗਰੇ ਵਿਚ ਇਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ। ਇਥੇ ਇਕ ਜਵਾਨ ਨੂੰ ਮਹੀਨੇ ਭਰ ਕੰਮ ਤੋਂ ਬਾਅਦ ਸਿਰਫ ਛੇ ਰੁਪਏ ਤਨਖਾਹ ਮਿਲੀ। ਛੇ ਰੁਪਏ ਤਨਖਾਹ ਮਿਲਣ ਤੋਂ ਦੁਖੀ ਹੋ ਕੇ ਜਵਾਨ ਨੇ ਆਪਣੀ ਫੈਕਟਰੀ ਵਿਚ ਹੀ ਫ਼ਾਂਸੀ ਲਗਾ ਲਈ। ਹਾਲਾਂਕਿ ਸਮਾਂ ਰਹਿੰਦੇ ਹੋਰ ਕਰਮਚਾਰੀਆਂ ਨੇ ਉਸ ਨੂੰ ਬਚਾ ਲਿਆ। ਇਹ ਘਟਨਾ ਸਿਕੰਦਰਾ ਪੁਲਿਸ ਸਟੇਸ਼ਨ ਦੇ ਕੋਲ ਜੁੱਤੀ ਦੀ ਫੈਕਟਰੀ ਦੀ ਹੈ। ਐਸਐਚਓ ਸਿਕੰਦਰਾ ਅਜੈ ਕੌਸ਼ਲ ਨੇ ਦੱਸਿਆ ਕਿ ਉਹ ਜਵਾਨ ਫੈਕਟਰੀ ਵਿਚ ਕਈ ਸਾਲਾਂ ਤੋਂ ਕੰਮ ਕਰ ਰਿਹਾ ਸੀ। ਉਹ ਕਈ ਦਿਨਾਂ ਤੋਂ ਡਿਪ੍ਰੇਸ਼ਨ ਵਿਚ ਸੀ। 27 ਜੁਲਾਈ ਨੂੰ ਉਸ ਦਾ ਐਕਸੀਡੈਂਟ ਹੋਇਆ ਸੀ।

ਉਸ ਨੂੰ ਹਸਪਤਾਲ ਵਿਚ ਇਲਾਜ ਲਈ ਭਰਤੀ ਕਰਾਇਆ ਗਿਆ ਸੀ। ਉਸ ਦੇ ਇਲਾਜ ਦਾ ਖਰਚ ਫੈਕਟਰੀ ਮਾਲਿਕ ਵਲੋਂ ਭਰਿਆ ਗਿਆ। ਜਦੋਂ ਜਵਾਨ ਠੀਕ ਹੋ ਗਿਆ ਤਾਂ ਉਹ ਵਾਪਸ ਫੈਕਟਰੀ ਵਿਚ ਕੰਮ 'ਤੇ ਪਰਤਿਆ। ਜਦੋਂ ਉਸ ਨੇ ਅਪਣੀ ਤਨਖਾਹ ਮੰਗੀ ਤਾਂ ਉਸ ਨੂੰ ਫੈਕਟਰੀ ਮਾਲਿਕ ਨੇ 6 ਰੁਪਏ ਦਿੱਤੇ। ਐਸਐਚਓ ਨੇ ਦੱਸਿਆ ਕਿ ਜਵਾਨ ਨੇ ਆਪਣੇ ਮਾਲਿਕ ਨੂੰ ਕਿਹਾ ਕਿ ਉਸ ਦੇ ਇਲਾਜ ਵਿਚ ਜੋ ਰੁਪਏ ਖਰਚ ਕੀਤੇ ਗਏ ਹਨ ਉਹ ਕਿਸ਼ਤਾਂ ਵਿਚ ਕੱਟ ਲਓ। ਇਸ ਦੇ ਬਾਵਜੂਦ ਫੈਕਟਰੀ ਦਾ ਮਾਲਿਕ ਨਹੀਂ ਮੰਨਿਆ। ਉਹ ਮਿੰਨਤਾਂ ਕਰਦਾ ਰਿਹਾ ਪਰ ਫੈਕਟਰੀ ਮਾਲਿਕ ਨੇ ਇਨਕਾਰ ਕਰ ਦਿਤਾ। ਉਸ ਤੋਂ ਬਾਅਦ ਉਹ ਬਹੁਤ ਜ਼ਿਆਦਾ ਦਬਾਅ ਵਿਚ ਆ ਗਿਆ। ਉਸ ਨੂੰ ਲਗਿਆ ਕਿ ਉਸ ਦਾ ਘਰ ਦਾ ਖਰਚ ਕਿਵੇਂ ਚੱਲੇਗਾ।

ਪੁਲਿਸ ਨੇ ਦੱਸਿਆ ਕਿ ਬੁੱਧਵਾਰ ਨੂੰ ਫੈਕਟਰੀ ਪਹੁੰਚ ਕੇ ਜਵਾਨ ਨੇ ਆਪਣੇ ਆਪ ਨੂੰ ਛੱਤ ਵਾਲੇ ਪੰਖੇ ਨਾਲ ਲਟਕਾ ਲਿਆ। ਅਚਾਨਕ ਫੈਕਟਰੀ ਵਿਚ ਕੰਮ ਕਰਣ ਵਾਲੇ ਦੂੱਜੇ ਕਰਮਚਾਰੀਆਂ ਦੀ ਨਜ਼ਰ  ਉਸ ਦੇ ਉੱਤੇ ਪਈ। ਉਸ ਨੂੰ ਫ਼ਾਂਸੀ ਦੇ ਫੰਦੇ ਤੋਂ ਉਤਾਰ ਕੇ ਹਸਪਤਾਲ ਲੈ ਜਾਇਆ ਗਿਆ, ਜਿੱਥੇ ਹੁਣ ਉਸ ਦੀ ਹਾਲਤ ਸਥਿਰ ਹੈ। ਪੁਲਿਸ ਦੀ ਦਖਲਅੰਦਾਜ਼ੀ ਤੋਂ ਬਾਅਦ ਜਵਾਨ ਅਤੇ ਫੈਕਟਰੀ ਮਾਲਿਕ ਦੇ ਵਿਚ ਦਾ ਵਿਵਾਦ ਸੁਲਝਾ ਲਿਆ ਗਿਆ। ਫੈਕਟਰੀ ਮਾਲਿਕ ਜਵਾਨ ਦੇ ਇਲਾਜ ਵਿਚ ਖਰਚ ਕੀਤੇ ਗਏ ਰੁਪਏ ਕਿਸ਼ਤਾਂ ਵਿਚ ਕੱਟਣ ਲਈ ਰਾਜੀ ਹੋ ਗਿਆ। ਕਿਸੇ ਦੇ ਵੱਲੋਂ ਕੋਈ ਐਫਆਈਆਰ ਦਰਜ ਨਹੀਂ ਕਰਾਈ ਗਈ ਹੈ।