Assam: Lakhimpur woman kills husband, surrenders before police

ਲਖੀਮਪੁਰ : ਆਸਾਮ ਦੇ ਲਖੀਮਪੁਰ ਜ਼ਿਲ੍ਹੇ 'ਚ ਹੱਤਿਆ ਦਾ ਸਨਸਨੀਖੇਜ ਮਾਮਲਾ ਸਾਹਮਣੇ ਆਇਆ ਹੈ। ਪਤੀ ਦੀ ਮਾਰਕੁੱਟ ਤੋਂ ਪ੍ਰੇਸ਼ਾਨ ਇਕ ਔਰਤ ਨੇ ਉਸ ਦਾ ਸਿਰ ਵੱਢ ਦਿੱਤਾ। ਪਤੀ ਦੀ ਹੱਤਿਆ ਤੋਂ ਬਾਅਦ ਉਸ ਦਾ ਵੱਢਿਆ ਸਿਰ ਲੈ ਕੇ ਔਰਤ ਥਾਣੇ ਪੁੱਜ ਗਈ ਅਤੇ ਆਪਣਾ ਜੁਰਮ ਕਬੂਲ ਕਰ ਲਿਆ। ਔਰਤ ਨੂੰ ਨਿਆਂਇਕ ਹਿਰਾਸਤ 'ਚ ਭੇਜ ਦਿੱਤਾ ਗਿਆ ਹੈ। 

ਜਾਣਕਾਰੀ ਮੁਤਾਬਕ ਲਖੀਮਪੁਰ 'ਚ 55 ਸਾਲਾ ਮੁਧੀਰਾਮ ਆਪਣੀ 48 ਸਾਲਾ ਪਤਨੀ ਗੁਣੇਸ਼ਵਰੀ ਬਰਕਟਕੀ ਨਾਲ ਰਹਿੰਦਾ ਸੀ। ਦੋਸ਼ ਹੈ ਕਿ ਉਹ ਆਏ ਦਿਨ ਆਪਣੀ ਪਤਨੀ ਗੁਣੇਸ਼ਵਰੀ ਨਾਲ ਮਾਰਕੁੱਟ ਕਰਦਾ ਸੀ। ਉਸ ਨੂੰ ਤੰਗ ਪ੍ਰੇਸ਼ਾਨ ਕਰਦਾ ਰਹਿੰਦਾ ਸੀ। ਬੁਧਵਾਰ ਨੂੰ ਉਸ ਦੀ ਪਤਨੀ ਜਦੋਂ ਕਾਫ਼ੀ ਪ੍ਰੇਸ਼ਾਨ ਹੋ ਗਈ ਤਾਂ ਉਸ ਨੇ ਤੇਜ਼ਧਾਰ ਹਥਿਆਰ ਨਾਲ ਆਪਣੇ ਪਤੀ ਮੁਧੀਰਾਮ ਦਾ ਸਿਰ ਵੱਢ ਦਿੱਤਾ।

ਪਤੀ ਦੀ ਹੱਤਿਆ ਕਰਨ ਤੋਂ ਬਾਅਦ ਮੁਲਜ਼ਮ ਔਰਤ ਗੁਣੇਸ਼ਵਰੀ ਨੇ ਉਸ ਦਾ ਵੱਢਿਆ ਸਿਰ ਇਕ ਪਲਾਸਟਿਕ ਦੀ ਥੈਲੀ 'ਚ ਪਾਇਆ ਅਤੇ ਸਿੱਧੇ ਪੁਲਿਸ ਥਾਣੇ ਪੁੱਜ ਗਈ। ਉਸ ਦੇ ਹੱਥ 'ਚ ਵੱਢਿਆ ਹੋਇਆ ਸਿਰ ਵੇਖ ਕੇ ਪੁਲਿਸ ਵਾਲਿਆਂ ਦੇ ਹੋਸ਼ ਉੱਡ ਗਏ। ਔਰਤ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸ ਦਾ ਪਤੀ ਮੁਧੀਰਾਮ ਉਸ ਨਾਲ ਰੋਜ਼ਾਨਾ ਮਾਰਕੁੱਟ ਕਰਦਾ ਸੀ। ਕਈ ਸਾਲ ਤੋਂ ਉਹ ਤਸ਼ੱਦਦ ਸਹਿ ਰਹੀ ਸੀ।

ਪੁਛਗਿਛ 'ਚ ਔਰਤ ਨੇ ਦੱਸਿਆ ਕਿ ਉਸ ਨੇ ਪਹਿਲਾਂ ਵੀ ਕਈ ਵਾਰ ਆਪਣੇ ਪਤੀ ਮੁਧੀਰਾਮ ਨੂੰ ਮਾਰਨ ਦੀ ਕੋਸ਼ਿਸ਼ ਕੀਤੀ ਸੀ, ਜਿਸ 'ਚ ਉਹ ਜ਼ਖ਼ਮੀ ਵੀ ਹੋਇਆ ਸੀ। ਗੁਣੇਸ਼ਵਰੀ ਨੇ ਕਈ ਵਾਰ ਆਪਣੇ ਪਤੀ ਤੋਂ ਵੱਖ ਹੋਣ ਬਾਰੇ ਸੋਚਿਆ ਸੀ ਪਰ ਆਪਣੇ ਬੱਚਿਆਂ ਕਾਰਨ ਉਹ ਅਜਿਹਾ ਨਹੀਂ ਕਰ ਸਕੀ। ਪੁਲਿਸ ਨੇ ਗੁਣੇਸ਼ਵਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ਦੀ ਨਿਸ਼ਾਨਦੇਹੀ 'ਤੇ ਲਾਸ਼ ਵੀ ਬਰਾਮਦ ਕਰ ਲਈ ਹੈ। ਪੁਲਿਸ ਨੇ ਹੱਤਿਆ ਲਈ ਵਰਤਿਆ ਤੇਜ਼ਧਾਰ ਹਥਿਆਰ ਵੀ ਬਰਾਮਦ ਕਰ ਲਿਆ ਹੈ। ਪੁਲਿਸ ਨੇ ਗੁਣੇਸ਼ਵਰੀ ਨੂੰ ਅਦਾਲਤ 'ਚ ਪੇਸ਼ ਕੀਤਾ, ਜਿੱਥੇ ਉਸ ਨੂੰ ਨਿਆਂਇਕ ਹਿਰਾਸਤ 'ਚ ਭੇਜ ਦਿੱਤਾ ਗਿਆ ਹੈ।