ਚੰਡੀਗੜ੍ਹ (ਨੀਲ ਭਲਿੰਦਰ ਸਿੰਘ) : ਬੇਅਦਬੀ ਤੇ ਗੋਲੀਕਾਂਡ ਆਦਿ ਮਾਮਲਿਆਂ ਦੀ ਪੜਤਾਲ ਕਰ ਰਹੀ ਵਿਸ਼ੇਸ਼ ਜਾਂਚ ਟੀਮ ਸਿਟ ਵਲੋਂ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਕੋਲੋਂ ਸੋਮਵਾਰ ਨੂੰ ਅੰਮ੍ਰਿਤਸਰ ਦੀ ਬਜਾਏ ਚੰਡੀਗੜ੍ਹ ਵਿਚ ਹੀ ਪੁਛਗਿਛ ਕੀਤੇ ਜਾਣ ਦੀ ਸੰਭਾਵਨਾ ਬਣ ਗਈ ਹੈ। ਹਾਲਾਂਕਿ ਇਸ ਬਾਰੇ ਕੋਈ ਅਧਿਕਾਰਤ ਪੁਸ਼ਟੀ ਤਾਂ ਹੋਈ ਹੈ

ਪਰ ਜਾਣਕਾਰ ਹਲਕਿਆਂ ਮੁਤਾਬਿਕ ਸੁਖਬੀਰ ਨੂੰ ਭਲਕੇ ਬਾਅਦ ਦੁਪਹਿਰ ਮਿਥੇ ਸਮੇਂ  ਢਾਈ ਵਜੇ ਹੀ ਚੰਡੀਗੜ੍ਹ 'ਚ ਸਿਟ ਕੋਲ ਪੇਸ਼ ਹੋਣ ਦੀ ਵਿਵਸਥਾ ਕੀਤੀ ਗਈ ਹੈ। ਇਹ ਵੀ ਪਤਾ ਲੱਗਾ ਹੈ ਕਿ ਸਾਬਕਾ ਮੁਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਵਡੇਰੀ ਉਮਰ ਦੇ ਮਦੇਨਜ਼ਰ ਸਿਟ ਅਧਿਕਾਰੀ ਉਨ੍ਹਾਂ ਦੇ ਐਮਐਲਏ ਫ਼ਲੈਟ ਗਏ ਸਨ ਪਰ ਸੁਖਬੀਰ ਦੇ ਮਾਮਲੇ 'ਚ ਅਜਿਹਾ ਨਾ ਕਰ ਕੇ ਸਿਟ ਵਲੋਂ ਚੰਡੀਗੜ੍ਹ 'ਚ ਮੁਕੱਰਰ ਸਥਾਨ ਉਤੇ ਸੱਦਿਆ ਜਵੇਗਾ।

ਹਲਾਂਕਿ ਇਸ ਬਾਰੇ ਸੁਖਬੀਰ ਨੇ ਸਨਿਚਰਵਾਰ ਅਪਣੇ ਹਸਤਾਖਰ ਹੇਠ ਸਿਟ ਮੁਖੀ ਏਡੀਜੀਪੀ ਪ੍ਰਬੋਧ ਕੁਮਾਰ (ਆਈਪੀਐਸ) ਨੂੰ ਚਿੱਠੀ ਲਿਖ ਕੇ ਮੰਗ ਕੀਤੀ ਸੀ ਕਿ ਉਨ੍ਹਾਂ ਕੋਲੋਂ 19 ਨਵੰਬਰ ਨੂੰ ਅੰਮ੍ਰਿਤਸਰ ਦੀ ਬਜਾਏ ਚੰਡੀਗੜ੍ਹ ਵਿਚ ਹੀ ਪੁਛਗਿਛ ਕੀਤੀ ਜਾਵੇ। ਪਰ ਐਤਵਾਰ ਅੰਮ੍ਰਿਤਸਰ ਨੇੜੇ ਰਾਜਾਸਾਂਸੀ 'ਚ ਨਿਰੰਕਾਰੀ ਮੰਡਲ 'ਤੇ ਹੋਏ ਹਮਲੇ ਕਾਰਨ ਵੀ ਉਥੇ ਬਣੇ ਸੰਵੇਦਨਸ਼ੀਲ ਮਹੌਲ ਦੇ ਮਦੇਨਜ਼ਰ ਸੁਖਬੀਰ ਕੋਲੋਂ ਪੁਛਗਿਛ ਦਾ ਸਥਾਨ ਬਦਲਿਆ ਜਾ ਰਿਹਾ ਹੈ।