Resham Singh with his Team

ਆਕਲੈਂਡ : ਨਿਊਜ਼ੀਲੈਂਡ 'ਚ ਸੈਰ ਸਪਾਟੇ ਲਈ ਮਸ਼ਹੂਰ ਸ਼ਹਿਰ ਰੋਟੋਰੂਆ ਜਿਥੇ ਮਨੋਰੰਜਕ ਸਕਾਈ ਲਾਈਨ (ਗੰਡੋਲਾ), ਲਿਊਜ਼ ਸਵਾਰੀ, ਅਕਾਸ਼ੀ ਪੀਂਘ ਅਤੇ ਸਲਫ਼ਰ (ਗੰਧਕ) ਵਾਲੀ ਹਵਾ ਲਈ ਲੋਕਾਂ ਨੂੰ ਅਪਣੇ ਵੱਲ ਆਕਰਸ਼ਿਕ ਕਰਦਾ ਹੈ, ਉਥੇ ਖਾਣੇ ਦੇ ਸ਼ੌਕੀਨਾਂ ਲਈ ਇਥੇ ਪਕਦੀਆਂ ਪੰਜਾਬੀ ਰੋਟੀਆਂ ਦੀ ਖੁਸ਼ਬੂ ਵੀ ਉਨ੍ਹਾਂ ਨੂੰ ਭਾਰਤੀ ਰੈਸਟੋਰੈਂਟਾਂ ਤਕ ਲੈ ਜਾਂਦੀ ਹੈ। ਗੱਲ ਜਦੋਂ ਉੱਚ ਕੁਆਲਿਟੀ ਅਤੇ ਸਿਰੇ ਦੀ ਸਰਵਿਸ ਦੀ ਹੋਵੇ ਤਾਂ ਗੋਰੇ ਬਹੁਤ ਕੁੱਝ ਵੇਖ ਕੇ ਬੈਠਦੇ ਹਨ। ਪੰਜਾਬੀਆਂ ਨੂੰ ਮਾਣ ਹੋਏਗਾ ਕਿ ਇਥੇ ਇਕ ਪੰਜਾਬੀ ਰੈਸਟੋਰੈਂਟ 'ਇੰਡੀਅਨ ਸਟਾਰ ਰੈਸਟੋਰੈਂਟ' ਸਾਲ ਦਰ ਸਾਲ ਐਵਾਰਡਾਂ ਦੀ ਲਿਸਟ ਲੰਮੀ ਕਰਦਾ ਜਾ ਰਿਹਾ ਹੈ।

ਸ. ਰੇਸ਼ਮ ਸਿੰਘ ਇਸ ਦੇ ਮਾਲਕ ਹਨ ਅਤੇ ਉਨ੍ਹਾਂ ਨੇ ਹਾਲ ਹੀ ਵਿਚ ਰੋਟੋਰੂਆਂ ਦਾ 'ਆਈਕਨ ਆਫ਼ ਹਾਸਪੀਟੈਲਿਟੀ' (ਮੇਜ਼ਬਾਨੀ ਦਾ ਨਮੂਨਾ) ਦਾ ਵਕਾਰੀ ਐਵਾਰਡ ਜਿਤਿਆ ਹੈ। ਇਹ ਐਵਾਰਡ 'ਰੈਸਟੋਰੈਂਟ ਐਸੋਸੀਏਸ਼ਨ ਆਫ਼ ਨਿਊਜ਼ੀਲੈਂਡ' ਵਲੋਂ ਬੀਤੇ ਦਿਨੀਂ ਇਕ ਸਮਾਗਮ ਦੇ ਵਿਚ ਦਿਤੇ ਗਏ। ਗੋਰੇ ਅਤੇ ਹੋਰ ਭਾਰਤੀ ਲੋਕ ਜਿਥੇ ਉਨ੍ਹਾਂ ਨੂੰ ਵਧਾਈ ਸੰਦੇਸ਼ ਦੇ ਰਹੇ ਹਨ, ਉਥੇ ਇਸ ਸ਼ਹਿਰ ਦੀ ਭੋਜਨ ਗਲੀ ਵਿਚ ਭਾਰਤੀਆਂ ਦੇ ਰੈਸਟੋਰੈਂਟ ਦੀ ਚਮਕ ਉਤੇ ਮਾਨ ਵੀ ਮਹਿਸੂਸ ਕਰਦੇ ਹਨ।

18 ਸਾਲ ਪਹਿਲਾਂ ਰੇਸ਼ਮ ਸਿੰਘ ਹੁਣ ਗੋਰਿਆਂ ਦੇ ਰੇਅ ਸਿੰਘ ਲੁਧਿਆਣਾ ਸ਼ਹਿਰ ਤੋਂ ਨਿਊਜ਼ੀਲੈਂਡ ਪੁਹੰਚੇ ਸਨ। ਲੁਧਿਆਣਾ ਵਿਖੇ ਵੀ ਇਕ ਵਕਾਰੀ ਹੋਟਲ ਵਿਚ ਉਹ ਮੈਨੇਜਰ ਸਨ ਅਤੇ ਅਪਣੀ ਸਕਿੱਲ ਉਨ੍ਹਾਂ ਨੇ ਇਥੇ ਵਰਤੋਂ ਵਿਚ ਲਿਆਂਦੀ। ਰੋਟੋਰੂਆ ਵਿਖੇ 2001 ਵਿਚ ਇਨ੍ਹਾਂ ਨੇ ਇਹ ਰੈਸਟੋਰੈਂਟ ਸ਼ੁਰੂ ਕੀਤਾ ਸੀ ਅਤੇ ਇਸ ਵੇਲੇ ਦੋ ਹੋਰ ਥਾਵਾਂ ਉਤੇ ਵੀ ਉਨ੍ਹਾਂ ਨੇ ਅਪਣੀਆਂ ਸ਼ਾਖਾਵਾਂ ਖੋਲ੍ਹੀਆਂ ਹਨ।