Group motorcycle riders reached Europe

ਸਰੀ (ਕੈਨੇਡਾ) : ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਉਤਸਵ ਨੂੰ ਸਮਰਪਿਤ ਸਿੱਖ ਮੋਟਰਸਾਈਕਲ ਕਲੱਬ ਸਰੀ (ਕੈਨੇਡਾ) ਦੇ 6 ਉਦਮੀ ਮੋਟਰਸਾਈਕਲ ਸਵਾਰਾਂ ਦੇ ਜਥੇ ਵਲੋਂ ਕੈਨੇਡਾ ਤੋਂ ਪੰਜਾਬ ਤਕ ਆਰੰਭ ਕੀਤੇ 'ਵਰਲਡ ਟੂਰ' ਤਹਿਤ ਕੀਤੀ ਜਾ ਰਹੀ ਮੋਟਰਸਾਈਕਲ ਯਾਤਰਾ ਦਾ ਵਿੱਢਿਆ ਗਿਆ ਸ਼ਲਾਘਾਯੋਗ ਉਪਰਾਲਾ ਨਿਰਵਿਘਨ ਜਾਰੀ ਹੈ।

ਅਪਣੀ ਯਾਤਰਾ ਦੇ ਅਗਲੇਰੇ ਪੜਾਅ ਤਹਿਤ ਯੂਰਪ ਦੇ ਦੇਸ਼ ਰੋਮਾਨੀਆ ਤੋਂ ਇਸ ਪੱਤਰਕਾਰ ਨਾਲ ਫ਼ੋਨ 'ਤੇ ਯਾਤਰਾ ਦੀ ਵਿਸਥਾਰਤ ਜਾਣਕਾਰੀ ਸਾਂਝੀ ਕਰਦਿਆਂ ਉਕਤ ਜਥੇ ਦੇ ਮੈਂਬਰਾਂ ਨੇ ਦਸਿਆ ਕਿ ਉਨ੍ਹਾਂ ਦਾ ਇਹ ਜਥਾ ਇੰਗਲੈਂਡ ਤੋਂ ਰਵਾਨਾ ਹੋਣ ਉਪਰੰਤ ਯੂਰਪ ਦੇ ਫ਼ਰਾਂਸ ਅਤੇ ਸਵਿਜ਼ਰਲੈਂਡ ਰਾਹੀਂ ਹੁੰਦਾ ਹੋਇਆ ਇਟਲੀ ਦਾਖ਼ਲ ਹੋਇਆ। ਜਿਥੇ ਇਕ ਰਾਤ ਠਹਿਰਣ ਉਪਰੰਤ ਇਹ ਜਥਾ ਗੁਜਾਰਾ ਕਸਬੇ ਰਾਹੀਂ ਹੁੰਦਾ ਹੋਇਆ ਨੈਵੇਲਾਰਾ ਸਥਿਤ ਗੁਰਦਵਾਰਾ ਸਿੰਘ ਸਭਾ ਪੁੱਜਾ। ਇਸੇ ਦੌਰਾਨ ਯਾਤਰਾ ਦੇ ਅਗਲੇਰੇ ਪੜਾਅ ਤਹਿਤ ਉਨ੍ਹਾਂ ਦਾ ਜਥਾ ਵਿਆਨਾ (ਆਸਟ੍ਰੇਰੀਆ) ਰਾਹੀਂ ਹੁੰਦਾ ਹੋਇਆ ਹੰਗਰੀ ਦੀ ਰਾਜਧਾਨੀ ਬੁਡਾਪੇਸਟ ਪਹੁੰਚਿਆ।

ਇਸ ਤੋਂ ਇਲਾਵਾ ਅਮਨਦੀਪ ਸਿੰਘ ਅਤੇ ਵਾਲੀਆ ਬ੍ਰਦਰਜ਼ ਵਲੋਂ ਸਾਡੇ ਜਥੇ ਦਾ ਸਵਾਗਤ ਕੀਤਾ ਗਿਆ। ਇਸ ਮਗਰੋਂ ਉਹ ਅਪਣੀ ਯਾਤਰਾ ਜਾਰੀ ਰੱਖਦੇ ਹੋਏ ਸਿਡਾਡਸਾ ਸ਼ਹਿਰ ਰਾਹੀਂ ਸਰਬੀਆ ਅਤੇ ਰੋਮਾਨੀਆਂ ਦੇਸ਼ ਦੀ ਸਾਂਝੀ ਸਰਹੱਦ 'ਤੇ ਬਣੇ ਤਾਜ ਮਹਿਲ ਰੈਸਟੋਰੈਂਟ ਪੁੱਜੇ ਜਿਥੇ ਪੰਜਾਬੀ ਅਮਰਜੀਤ ਸਿੰਘ ਭੁੱਲਰ ਵਲੋਂ ਉਨ੍ਹਾਂ ਦੇ ਜਥੇ ਲਈ ਪੰਜਾਬੀ ਖਾਣਾ ਮੁਹਈਆ ਕਰਵਾਇਆ ਗਿਆ। ਅਖ਼ੀਰ ਵਿਚ ਉਨ੍ਹਾਂ ਦਸਿਆ ਕਿ ਯਾਤਰਾ ਦੇ ਨਵੇਂ ਪੜਾਅ ਤਹਿਤ ਉਹ ਸਰਬੀਆ ਦੇਸ਼ ਰਾਹੀਂ ਹੁੰਦੇ ਹੋਏ ਬੁਲਗਾਰੀਆ ਦੇਸ਼ ਵਿਚ ਦਾਖ਼ਲ ਹੋਣਗੇ। 

ਜ਼ਿਕਰਯੋਗ ਹੈ ਕਿ ਯੂਰਪ ਮਗਰੋਂ ਅਰਬ ਦੇਸ਼ਾਂ ਦੀਆਂ ਸੜਕਾਂ ਰਾਹੀਂ ਹੁੰਦਾ ਹੋਇਆ ਇਹ ਜਥਾ ਤਕਰੀਬਨ ਇਕ ਮਹੀਨੇ ਬਾਅਦ ਅਪਣੀ ਯਾਤਰਾ ਤੈਅ ਕਰਦਿਆਂ ਈਰਾਨ ਰਾਹੀਂ ਪਾਕਿਸਤਾਨ ਸਥਿਤ ਗੁਰਧਾਮਾਂ ਦੇ ਦਰਸ਼ਨ ਕਰਦਾ ਹੋਇਆ ਅਪਣੇ ਅੰਤਮ ਪੜਾਅ ਦੌਰਾਨ ਵਾਹਗਾ ਸਰਹੱਦ ਰਾਹੀਂ ਪੰਹੁਚ ਕੇ ਸ੍ਰੀ ਦਰਬਾਰ ਸਾਹਿਬ ਨਤਮਸਤਕ ਹੋਣ ਮਗਰੋਂ ਇਤਿਹਾਸਕ ਨਗਰੀ ਸੁਲਤਾਨਪੁਰ ਲੋਧੀ ਵਿਖੇ ਪੁੱਜ ਕੇ ਅਪਣੀ ਉਕਤ ਯਾਤਰਾ ਸਮਾਪਤ ਕਰੇਗਾ।