ਪਿਛਲੇ ਦਿਨਾਂ ਤੋਂ ਵਾਪਰੀਆਂ ਮੰਦਭਾਗੀਆਂ ਘਟਨਾਵਾਂ ਨੂੰ ਵੇਖ ਕੇ ਹਰ ਸਿੱਖ ਚਿੰਤਿਤ : ਬਾਬਾ ਰਾਮ ਸਿੰਘ
ਕਿਹਾ - ਅਖੌਤੀ ਲੀਡਰਾਂ ਨੇ ਅਪਣੇ ਨਿਜੀ ਸੁਆਰਥਾਂ ਅਤੇ ਕਾਰਖ਼ਾਨਿਆਂ ਵਾਸਤੇ ਕੌਮ ਨੂੰ ਸਦਾ ਲਈ ਹਿੰਦੂ ਰਾਸ਼ਟਰ ਦੇ ਗੁਲਾਮ ਬਣਾ ਕੇ ਰਖਵਾ ਦਿਤਾ
ਪੰਜਗਰਾਈਆਂ : ਅੱਜ ਦਮਦਮੀ ਟਕਸਾਲ ਦੇ ਮੁਖੀ ਬਾਬਾ ਰਾਮ ਸਿੰਘ ਖ਼ਾਲਸਾ ਭਿੰਡਰਾਂਵਾਲਿਆਂ ਨੇ ਜਾਰੀ ਇਕ ਬਿਆਨ ਵਿਚ ਕਿਹਾ ਹੈ ਕਿ ਪਿਛਲੇ ਦਿਨਾਂ ਤੋਂ ਵਾਪਰੀਆਂ ਮੰਦਭਾਗੀਆਂ ਘਟਨਾਵਾਂ ਨੂੰ ਵੇਖ ਕੇ ਹਰ ਸਿੱਖ ਚਿੰਤਤ ਹੈ ਕਿ ਇਸ ਦੇਸ਼ ਦਾ ਕੀ ਬਣੇਗਾ ਜਿਸ ਦੇਸ਼ ਦੀ ਅਜ਼ਾਦੀ ਲਈ ਅਤੇ ਧਰਮ ਦੀ ਰੱਖਿਆ ਵਾਸਤੇ ਸਾਡੇ ਗੁਰੂ ਸਾਹਿਬਾਨ ਨੇ ਦਿੱਲੀ ਚਾਂਦਨੀ ਚੌਕ ਵਿਖੇ ਬਲੀਦਾਨ ਦਿਤਾ। ਅੱਜ ਦੇ ਅਖੌਤੀ ਲੀਡਰਾਂ ਵਰਗੇ ਉਸ ਸਮੇਂ ਦੇ ਅਖੌਤੀ ਲੀਡਰ ਜਿਨ੍ਹਾਂ ਨੇ ਅਪਣੇ ਨਿਜੀ ਸੁਆਰਥਾਂ ਅਤੇ ਕਾਰਖ਼ਾਨਿਆਂ ਵਾਸਤੇ ਕੌਮ ਨੂੰ ਸਦਾ ਲਈ ਹਿੰਦੂ ਰਾਸ਼ਟਰ ਦੇ ਗੁਲਾਮ ਬਣਾ ਕੇ ਰਖਵਾ ਦਿਤਾ।
23 ਤਾਰੀਖ਼ ਤੋਂ ਬਾਅਦ ਘੱਟ ਗਿਣਤੀ ਨਾਲ ਵਿਸ਼ੇਸ਼ ਕਰ ਕੇ ਸਿੱਖਾਂ ਨਾਲ ਭਾਜਪਾ ਸਰਕਾਰ ਵਲੋਂ ਦੇਸ਼ ਦੀਆਂ ਵੱਖ-ਵੱਖ ਸਟੇਟਾਂ ਵਿਚ ਅਤਿਆਚਾਰ ਦੀ ਹਨੇਰੀ ਝੁਲਣੀ ਸ਼ੁਰੂ ਹੋ ਗਈ। ਕਦੇ ਸ਼ਿਲਾਂਗ ਤੋਂ ਸਿੱਖਾਂ ਨੂੰ ਉਜਾੜਿਆ ਜਾ ਰਿਹਾ ਹੈ, ਕਦੇ ਯੂ.ਪੀ ਵਿਚ ਸਿੱਖਾਂ ਦੀਆਂ ਦਾਹੜੀਆਂ ਤੇ ਪੱਗਾਂ 'ਤੇ ਹੱਥ ਪਾਇਆ ਜਾ ਰਿਹਾ ਹੈ ਤੇ ਕਦੇ ਫ਼ਰੀਦਕੋਟ ਵਿਚ ਨੌਜੁਆਨ ਜਸਪਾਲ ਸਿੰਘ ਦੀ ਲਾਸ਼ ਖ਼ੁਰਦ-ਬੁਰਦ ਕੀਤੀ ਜਾਂਦੀ ਹੈ। ਅੰਨੀ ਬੋਲੀ ਸਰਕਾਰ ਦੇ ਕੰਨਾਂ ਤਕ ਕੀਤੇ ਹੋਏ ਰੋਸ ਮੁਜ਼ਾਹਰੇ ਅਤੇ ਧਰਨਿਆਂ ਦਾ ਕੋਈ ਅਸਰ ਨਹੀਂ ਹੋਇਆ। ਕਿੰਨੇ ਸ਼ਰਮ ਵਾਲੀ ਗੱਲ ਹੈ ਕਿ ਅਸੀਂ ਲੋਕ ਦੇਸ਼ ਦੀਆਂ ਤਰੱਕੀਆਂ ਦੀ ਗੱਲ ਕਰਦੇ ਹਾਂ। ਚੰਦ ਤੇ ਜਾਣ ਦੇ ਵੱਡੇ-ਵੱਡੇ ਦਾਹਵੇ ਕਰਦੇ ਹਾਂ ਪਰ ਮਾਪਿਆਂ ਦੀ ਇਕਲੌਤੀ ਸੰਤਾਨ 2 ਸਾਲ ਦਾ ਬੱਚਾ ਫ਼ਤਿਹਵੀਰ ਸਿੰਘ 120 ਫੁੱਟ ਡੂੰਘੇ ਬੋਰ ਵਿਚ ਪੰਜ ਦਿਨ ਵਿਲਕਦਾ ਰਿਹਾ ਪ੍ਰੰਤੂ ਅਸੀਂ ਉਸ ਨੂੰ ਜਿਊਂਦੇ ਬਾਹਰ ਨਾ ਕੱਢ ਸਕੇ।
ਕੋਈ ਵੀ ਲੀਡਰ ਉਸ ਬੱਚੇ ਦੀ ਸਾਰ ਲੈਣ ਉਨ੍ਹਾਂ ਦੇ ਪਿੰਡ ਭਗਵਾਨਪੁਰਾ ਨਹੀਂ ਪਹੁੰਚਿਆ। ਪੰਜਾਬ ਦਾ ਹਾਕਮ ਪਹਾੜਾਂ ਵਿਚ ਸੈਰ ਕਰ ਰਿਹਾ ਹੈ ਤੇ ਦਿੱਲੀ ਕੁਰਸੀ 'ਤੇ ਬੈਠਾ ਹਾਕਮ ਵਿਦੇਸ਼ਾਂ ਦੀ ਯਾਤਰਾ ਕਰ ਰਿਹਾ ਹੈ। ਉਸ 2 ਸਾਲ ਦੇ ਬੱਚੇ ਦੀ ਮੌਤ ਤੇ ਹਾਅ ਦਾ ਨਾਹਰਾ ਮਾਰਨ ਵੀ ਕੋਈ ਨਾ ਬਹੁੜਿਆ। ਕੀ ਉਹ ਮਾਸੂਮ ਬੱਚਾ ਇਸ ਦੇਸ਼ ਦਾ ਵਾਸੀ ਨਹੀਂ ਸੀ? ਅੱਜ ਜਦੋਂ ਦਿੱਲੀ ਦੀ ਇਸ ਘਟਨਾ ਦਾ ਪਤਾ ਲੱਗਾ ਤੇ ਹਰ ਇਕ ਪੰਥ ਦਰਦੀ ਦਾ ਹਿਰਦਾ ਵੀ ਵਲੂੰਧਰਿਆ ਗਿਆ ਕਿ ਪਿਉ-ਪੁੱਤਰ ਤੇ ਦਿੱਲੀ ਦੀ ਪੁਲਿਸ ਵਲੋਂ ਕੀਤਾ ਅਤਿਆਚਾਰ ਇਸ ਗੱਲ ਦੀ ਗਵਾਹੀ ਭਰਦਾ ਹੈ ਕਿ ਇਸ ਦੇਸ਼ ਵਿਚ ਸਿੱਖ ਕਿਤੇ ਵੀ ਸੁਰੱਖਿਅਤ ਨਹੀਂ ਹੈ।
ਕਿੰਨੀ ਸ਼ਰਮ ਵਾਲੀ ਗੱਲ ਹੈ ਕਿ ਜਿਸ ਪੁਲਿਸ ਨੇ ਲੋਕਾਂ ਦੀ ਮਦਦ ਕਰਨੀ ਸੀ ਉਹ ਪੁਲਿਸ ਸਿੱਖ ਦੀ ਦਾਹੜੀ ਪੁੱਟ ਕੇ ਠੁੱਡੇ ਮਾਰ ਕੇ ਤੇ ਦਸਤਾਰ ਉਤਾਰ ਕੇ ਸ਼ਰੇਆਮ ਬਜ਼ਾਰ ਵਿਚ ਕੁੱਟਮਾਰ ਰਹੀ ਹੈ। ਲੱਖ ਲਾਹਨਤ ਹੈ ਪੁਲਿਸ ਦੀ ਐਸੀ ਘਿਨਾਉਣੀ ਹਰਕਤ ਤੇ ਜਿਸ ਨੂੰ ਦੇਖ ਕੇ ਹਰ ਧਰਮੀ ਬੰਦੇ ਦੀਆਂ ਅੱਖਾਂ ਵਿਚ ਹੰਝੂ ਆਏ ਹਨ। ਆਰ.ਐਸ.ਐਸ ਦੀ ਝੋਲੀ ਝੁਕ ਭਾਜਪਾ ਦੇ ਫ਼ਿਰਕਾਪ੍ਰਸਤ ਆਗੂਆਂ ਨੇ ਪਿਛਲੇ ਦਿਨੀਂ ਫੇਸਬੁੱਕ ਤੇ ਸਿੱਖਾਂ ਨੂੰ ਧਮਕੀਆਂ ਦਿਤੀਆਂ ਸਨ ਕਿ ਸਿੱਖੋ ਤੁਹਾਨੂੰ ਦੁਬਾਰਾ ਜੂਨ 1984 ਯਾਦ ਕਰਾਵਾਂਗੇ। ਜਦੋਂ ਸਿੱਖ 6 ਜੂਨ ਦਾ ਘੱਲੂਘਾਰਾ ਦਿਵਸ ਅਪਣੇ ਸ਼ਹੀਦਾਂ ਨੂੰ ਯਾਦ ਕਰਨ ਵਾਸਤੇ ਮਨਾਉਂਦਾ ਹਾਂ ਤਾਂ ਇਸ ਦੇਸ਼ ਦੇ ਫ਼ਿਰਕਾਪ੍ਰਸਤ ਲੋਕ ਕਹਿੰਦੇ ਨੇ ਕਿ ਅਸੀਂ ਸੰਤ ਜਰਨੈਲ ਸਿੰਘ ਜੀ ਖ਼ਾਲਸਾ ਭਿੰਡਰਾਂਵਾਲਿਆਂ ਦਾ ਪੁਤਲਾ ਫੂਕਾਂਗੇ।
ਕੀ ਅਸੀਂ ਅਪਣੇ ਸ਼ਹੀਦਾਂ ਦਾ ਦਿਨ ਵੀ ਨਹੀਂ ਮਨਾ ਸਕਦੇ? ਕਿਸ ਮੂੰਹ ਨਾਲ ਇਸ ਦੇਸ਼ ਨੂੰ ਅਪਣਾ ਕਹੀਏ। ਇਥੇ ਸਰ ਮੁਹੰਮਦ ਇਕਬਾਲ ਦੇ ਕਹੇ ਹੋਏ ਬੋਲ ਯਾਦ ਆ ਰਹੇ ਨੇ ਕਿ “ਸ਼ਰਮ ਸੀ ਆਤੀ ਹੈ ਇਸ ਵਤਨ ਕੋ ਵਤਨ ਕਹਿਤੇ ਹੂਏ।'' ਮੈਂ ਪੰਜਾਬ ਦੇ ਸਿਆਸਤਦਾਨ ਸਮੁੱਚੇ ਆਗੂਆਂ ਨੂੰ ਅਪੀਲ ਕਰਦਾਂ ਹਾਂ ਕਿ ਦਿੱਲੀ ਦਰਬਾਰ ਦੇ ਤੱਲਵੇ ਚੱਟਣ ਦੀ ਬਜਾਏ ਗੁਰੂ ਗ੍ਰੰਥ ਅਤੇ ਗੁਰੂ ਪੰਥ ਵਾਸਤੇ ਵੀ ਕਦੇ ਸੋਚੋ, ਕਿਉਂ ਤੁਹਾਡੀਆਂ ਜ਼ਮੀਰਾਂ ਮਰ ਚੁਕੀਆਂ ਹਨ ਜਾਂ ਤਾਂ ਕੌਮ ਦੀ ਚੜ੍ਹਦੀ ਕਲਾ ਲਈ ਸੋਚੋ ਜਾਂ ਮਿਹਰਬਾਨੀ ਕਰ ਕੇ ਕੌਮ ਦੇ ਗਲੋਂ ਲਹਿ ਜਾਵੋ।