ਬਰਮਿੰਘਮ ਦੇ ਐਜਬੇਸਟਨ ਮੈਦਾਨ 'ਤੇ ਚੱਲ ਰਹੇ ਭਾਰਤ ਅਤੇ ਇੰਗਲੈਂਡ ਦਰਮਿਆਨ ਟੈਸਟ ਮੈਚ 'ਚ ਭਾਰਤੀ ਟੀਮ ਚੰਗੀ ਸਥਿਤੀ 'ਚ ਦਿਖ ਰਹੀ ਹੈ............
ਬਰਮਿੰਘਮ : ਬਰਮਿੰਘਮ ਦੇ ਐਜਬੇਸਟਨ ਮੈਦਾਨ 'ਤੇ ਚੱਲ ਰਹੇ ਭਾਰਤ ਅਤੇ ਇੰਗਲੈਂਡ ਦਰਮਿਆਨ ਟੈਸਟ ਮੈਚ 'ਚ ਭਾਰਤੀ ਟੀਮ ਚੰਗੀ ਸਥਿਤੀ 'ਚ ਦਿਖ ਰਹੀ ਹੈ। ਬੀਤੇ ਦਿਨੀਂ ਕਪਤਾਨ ਵਿਰਾਟ ਕੋਹਲੀ ਨੇ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ ਅਤੇ ਸੈਂਕੜਾ ਲਗਾਇਆ। ਇਕ ਪਾਸੇ ਜਿੱਥੇ ਦੂਜੇ ਬੱਲੇਬਾਜ਼ਾਂ ਨੂੰ ਵਿਕਟ 'ਤੇ ਖੜ੍ਹੇ ਹੋਣ 'ਚ ਵੀ ਪ੍ਰੇਸ਼ਾਨੀ ਹੋ ਰਹੀ ਸੀ ਤਾਂ ਦੂਜੇ ਪਾਸੇ ਵਿਰਾਟ ਕੋਹਲੀ ਇੰਗਲੈਂਡ ਦੇ ਗੇਂਦਬਾਜ਼ਾਂ ਦੇ ਨੂੰ ਚੁਫ਼ੇਰਿਉਂ ਨਾਕਾਮ ਕਰ ਰਹੇ ਸਨ। ਵਿਰਾਟ ਨੇ ਸ਼ਾਨਦਾਰ 149 ਦੌੜਾਂ ਬਣਾਈਆਂ ਅਤੇ ਟੀਮ ਨੂੰ 274 ਦੌੜਾਂ ਤਕ ਪਹੁੰਚਾਉਣ 'ਚ ਅਹਿਮ ਭੂਮਿਕਾ ਨਿਭਾਈ। ਵਿਰਾਟ ਕੋਹਲੀ ਨੇ ਇਸ ਦੇ ਨਾਲ ਹੀ ਇੰਗਲੈਂਡ 'ਚ ਅਪਣੇ ਮਾੜੇ ਪ੍ਰਦਰਸ਼ਨ 'ਚ ਸੁਧਾਰ ਕੀਤਾ ਹੈ।
2014 'ਚ ਇੰਗਲੈਂਡ ਦੌਰੇ ਦੌਰਾਨ ਵਿਰਾਟ ਪੂਰੀ ਤਰ੍ਹਾਂ ਨਾਕਾਮ ਹੋਇਆ ਸੀ ਪਰ ਲੜੀ ਦੇ ਪਹਿਲੇ ਹੀ ਮੈਚ 'ਚ ਵੱਡੀ ਪਾਰੀ ਖੇਡ ਕੇ ਉਨ੍ਹਾਂ ਨੇ ਅਪਣੇ ਨਿੰਦਕਾਂ ਨੂੰ ਕਰਾਰਾ ਜਵਾਬ ਦੇ ਦਿਤਾ ਹੈ। ਜ਼ਿਕਰਯੋਗ ਹੈ ਕਿ 2014 ਦੇ ਇੰਗਲੈਂਡ ਦੌਰੇ 'ਤੇ ਵਿਰਾਟ 5 ਟੈਸਟ ਦੀਆਂ 10 ਪਾਰੀਆਂ 'ਚ ਸਿਰਫ 134 ਦੌੜਾਂ ਹੀ ਬਣਾ ਸਕਿਆ ਸੀ। ਇਸ ਦੌਰਾਨ ਉਸ ਦਾ ਸਰਬੋਤਮ ਸਕੋਰ 39 ਦੌੜਾਂ ਰਿਹਾ ਸੀ। ਵਿਰਾਟ ਨੇ ਸਿਰਫ 13.40 ਦੀ ਔਸਤ ਨਾਲ ਦੌੜਾਂ ਬਣਾਈਆਂ ਸਨ। (ਏਜੰਸੀ)
