ਕਿਸਾਨਾਂ ਲਈ ਰੋਲ ਮਾਡਲ ਬਣਕੇ ਉਭਰਿਆ ਸਫਲ ਕਿਸਾਨ ਹਰਬਿੰਦਰ ਸਿੰਘ
ਨੈਚੂਰਲੀ ਵੈਂਟੀਲੇਟਡ ਪੋਲੀਹਾਊਸ ਲਗਾਕੇ ਕਰ ਰਿਹੈ ਲੱਖਾਂ ਰੁਪਏ ਦੀ ਕਮਾਈ
ਨੈਚੂਰਲੀ ਵੈਂਟੀਲੇਟਡ ਪੋਲੀਹਾਊਸ ਲਗਾਕੇ ਕਰ ਰਿਹੈ ਲੱਖਾਂ ਰੁਪਏ ਦੀ ਕਮਾਈ
ਡਿਪਟੀ ਕਮਿਸ਼ਨਰ ਨੇ ਕਿਸਾਨਾਂ ਨੂੰ ਫਸਲੀ ਚੱਕਰ 'ਚੋਂ ਨਿਕਲ ਕੇ ਫਸਲੀ ਵਿਭਿੰਨਤਾ 'ਤੇ ਦਿੱਤਾ ਜ਼ੋਰ
ਕਿਹਾ, ਸਰਕਾਰ ਵਲੋਂ ਪੋਲੀਹਾਊਸ ਅਤੇ ਬਾਗਾਂ ਲਈ ਦਿੱਤੀ ਜਾ ਰਹੀ 50 ਫੀਸਦੀ ਸਬਸਿਡੀ
ਹੁਸ਼ਿਆਰਪੁਰ, 3 ਜੂਨ (ਭੁਪੇਸ਼ ਪ੍ਰਜਾਪਤੀ): ਉਤਰ ਪ੍ਰਦੇਸ਼ ਵਿਚ ਰਵਾਇਤੀ ਖੇਤੀ ਕਰਨ ਤੋਂ ਬਾਅਦ ਅਗਾਂਹਵਧੂ ਕਿਸਾਨ ਸ਼੍ਰੀ ਹਰਬਿੰਦਰ ਸਿੰਘ ਸੰਧੂ ਹੁਸ਼ਿਆਰਪੁਰ ਦੇ ਪਿੰਡ ਭੀਖੋਵਾਲ ਵਿਚ ਨੈਚੂਰਲੀ ਵੈਂਟੀਲੇਟਡ ਪੋਲੀਹਾਊਸ ਲਗਾਉਣ ਵਾਲਾ ਜ਼ਿਲ੍ਹੇ ਦਾ ਪਹਿਲਾ ਸਫਲ ਕਿਸਾਨ ਬਣ ਗਿਆ ਹੈ।
ਬੀ.ਏ. ਪਾਸ ਸਫਲ ਕਿਸਾਨ ਸ਼੍ਰੀ ਹਰਬਿੰਦਰ ਸਿੰਘ ਸੰਧੂ ਨੇ ਦੱਸਿਆ ਕਿ ਉਸਨੇ 5 ਏਕੜ ਵਿਚ ਨੈਚੂਰਲੀ ਵੈਂਟੀਲੇਟਡ ਪੋਲੀਹਾਊਸ ਲਗਾਇਆ ਹੋਇਆ ਹੈ, ਜਿਸ ਵਿਚ ਸਬਜ਼ੀਆਂ ਦੀ ਅਗੇਤੀ ਖੇਤੀ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਪੋਲੀਹਾਊਸ ਲਈ ਉਸਨੇ ਸਬਸਿਡੀ ਵੀ ਹਾਸਲ ਕੀਤੀ ਹੈ ਅਤੇ ਮੌਜੂਦਾ ਤੌਰ 'ਤੇ ਕਰੀਬ ਸਾਢੇ 5 ਏਕੜ ਵਿਚ ਰੰਗਦਾਰ ਸ਼ਿਮਲਾ ਮਿਰਚ ਦੇ ਨਾਲ-ਨਾਲ ਬੀਜ ਰਹਿਤ ਖੀਰਾ ਬੀਜਿਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਪ੍ਰਤੀ ਸਾਲ ਇਕ ਏਕੜ ਵਿਚੋਂ ਕਰੀਬ 5 ਲੱਖ ਰੁਪਏ ਉਸਦੀ ਆਮਦਨ ਹੈ ਅਤੇ ਮੰਡੀਕਰਨ ਉਸ ਵਲੋਂ ਖੁਦ ਕੀਤੀ ਜਾਂਦੀ ਹੈ।
ਡਿਪਟੀ ਕਮਿਸ਼ਨਰ ਸ਼੍ਰੀ ਵਿਪੁਲ ਉਜਵਲ ਨੇ ਇਸ ਅਗਾਂਹਵਧੂ ਸਫਲ ਕਿਸਾਨ ਦੀ ਸ਼ਲਾਘਾ ਕਰਦਿਆਂ ਫਸਲੀ ਵਿਭਿੰਨਤਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਕਿਸਾਨਾਂ ਨੂੰ ਫਸਲੀ ਚੱਕਰ ਵਿਚੋਂ ਨਿਕਲਕੇ ਬਦਲਵੀਆਂ ਫਸਲਾਂ ਦੀ ਖੇਤੀ ਕਰਨ ਦੇ ਨਾਲ-ਨਾਲ ਸਹਾਇਕ ਧੰਦੇ ਅਪਣਾਉਣੇ ਚਾਹੀਦੇ ਹਨ। ਉਨ੍ਹਾਂ ਕਿਹਾ ਕਿ ਹੁਸ਼ਿਆਰਪੁਰ ਜ਼ਿਲ੍ਹੇ ਵਿਚ ਕਰੀਬ 8500 ਹੈਕਟੇਅਰ ਬਾਗਾਂ ਦਾ ਰਕਬਾ ਹੈ, ਜਿਸ ਵਿਚੋਂ ਕਰੀਬ 60 ਫੀਸਦੀ ਰਕਬਾ ਕਿੰਨੂ ਹੇਠ ਹੈ।
ਡਿਪਟੀ ਡਾਇਰੈਕਟਰ ਬਾਗਬਾਨੀ ਵਿਭਾਗ ਸ਼੍ਰੀ ਨਰੇਸ਼ ਕੁਮਾਰ ਨੇ ਦੱਸਿਆ ਕਿ ਪੋਲੀਹਾਊਸ 'ਤੇ ਸਬਸਿਡੀ ਜਾਂ ਵਿਭਾਗ ਨਾਲ ਸਬੰਧਤ ਹੋਰ ਜਾਣਕਾਰੀ ਪ੍ਰਾਪਤ ਕਰਨ ਲਈ ਦਫ਼ਤਰ ਡਿਪਟੀ ਡਾਇਰੈਕਟਰ ਬਾਗਬਾਨੀ, ਛਾਉਣੀ ਕਲਾਂ ਵਿਖੇ ਨਿੱਜੀ ਤੌਰ 'ਤੇ ਜਾਂ 01882-236675 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਬਸਿਡੀ ਦੀ ਸਹੂਲਤ ਪ੍ਰਾਪਤ ਕਰਨ ਲਈ ਸੈਂਟਰ ਆਫ ਐਕਸੀਲੈਂਸ ਫਾਰ ਵੈਜ਼ੀਟੇਬਲ ਕਰਤਾਰਪੁਰ ਤੋਂ 3 ਦਿਨ ਦੀ ਸਿਖਲਾਈ ਜ਼ਰੂਰੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਸਿਖਲਾਈ ਕੇਵਲ 1 ਹਜ਼ਾਰ ਵਿਚ ਪ੍ਰਾਪਤ ਕੀਤੀ ਜਾ ਸਕਦੀ ਹੈ ਅਤੇ ਸਿਖਲਾਈ ਦੌਰਾਨ ਰਿਹਾਇਸ਼ ਅਤੇ ਖਾਣ-ਪੀਣ ਦੀ ਸਹੂਲਤ ਬਿਲਕੁੱਲ ਮੁਫ਼ਤ ਮਿਲੇਗੀ।