ਕਰਾਚੀ (ਭਾਸ਼ਾ) : ਪਾਕਿਸਤਾਨ 'ਚ ਇਕਠੇ ਸੈਲਫੀ ਲੈਣ 'ਤੇ ਇਕ ਜੋੜੇ ਦੀ ਹੱਤਿਆ ਕਰ ਦਿੱਤੀ ਗਈ, ਜਦੋਂ ਕਿ ਉਨ੍ਹਾਂ ਦੀ ਕੁੜਮਾਈ ਹੋ ਚੁੱਕੀ ਸੀ। ਇਹ ਘਟਨਾ ਨਵੰਬਰ ਦੇ ਸ਼ੁਰੂਆਤੀ ਹਫ਼ਤੇ ਵਿਚ ਹੋਈ ਪਰ ਖੁਲਾਸਾ ਸੋਮਵਾਰ ਨੂੰ ਹੋਇਆ। ਮਰੀਨਾ ਦਾ ਮੰਗੇਤਰ ਸਲਮਾਨ ਸਵਾਤ ਵਿਚ ਰਹਿੰਦਾ ਸੀ। ਪੁਲਿਸ ਦੇ ਮੁਤਾਬਕ, ਕਸਬਾ ਕਲੋਨੀ ਵਿਚ ਰਹਿਣ ਵਾਲੀ ਮਰੀਨਾ ਕਾਲਜ ਵਿਚ ਪੜ੍ਹਦੀ ਸੀ।

ਨਵੰਬਰ ਦੇ ਸ਼ੁਰੂਆਤੀ ਹਫ਼ਤੇ ਵਿਚ ਉਹ ਸਵਾਤ ਵਿਚ ਰਹਿਣ ਵਾਲੇ ਅਪਣੇ ਮੰਗੇਤਰ ਸਲਮਾਨ ਨੂੰ ਕਰਾਚੀ ਵਿਚ ਮਿਲੀ ਸੀ। ਉਸ ਦੌਰਾਨ ਦੋਨਾਂ ਨੇ ਇਕਠੇ ਸੈਲਫੀ ਵੀ ਖਿੱਚੀ। ਸਵਾਤ ਪਰਤਣ ਤੋਂ ਬਾਅਦ ਸਲਮਾਨ ਨੇ ਅਪਣੇ ਰਿਸ਼ਤੇਦਾਰਾਂ ਅਤੇ ਦੋਸਤਾਂ ਨੂੰ ਸੈਲਫੀ ਦਖਾਈ, ਜਿਸ ਉਤੇ ਕੁੜੀ ਦੇ ਘਰਵਾਲਿਆਂ ਨੇ ਵਿਰੋਧ ਜਤਾਇਆ। ਪੁਲਿਸ ਦੇ ਅਨੁਸਾਰ, ਮਰੀਨਾ ਦਾ ਪਿਤਾ ਸਵਾਤ ਪਹੁੰਚਿਆ ਅਤੇ ਉਸਨੇ ਗੋਲੀ ਮਾਰਕੇ ਸਲਮਾਨ ਦੀ ਹੱਤਿਆ ਕਰ ਦਿਤੀ।

 7 ਨਵੰਬਰ ਨੂੰ ਉਹ ਕਰਾਚੀ ਵਾਪਸ ਆਇਆ ਤੇ ਉਸ ਨੇ ਆਪਣੀ ਧੀ ਨੂੰ ਵੀ ਮਾਰ ਦਿੱਤਾ। ਉਸਨੇ ਆਪਣੀ ਧੀ ਨੂੰ ਕਿਹਾ, ‘‘ਤੂੰ ਜ਼ਹਿਰ ਖਾਕੇ ਮਰ ਜਾ, ਨਹੀਂ ਤਾਂ ਗੋਲੀ ਮਾਰ ਦਵਾਂਗਾ ।’’ ਇਸ ਤੋਂ ਬਾਅਦ ਉਸਨੇ ਮਰੀਨਾ ਨੂੰ ਕਮਰੇ ਵਿਚ ਬੰਦ ਕਰ ਦਿਤਾ। 8 ਨਵੰਬਰ ਨੂੰ ਮਰੀਨਾ ਅਪਣੇ ਕਮਰੇ ਵਿਚ ਮਰੀ ਹੋਈ ਮਿਲੀ। ਉਸੇ ਦਿਨ ਉਸਨੂੰ ਦਫਨਾ ਦਿਤਾ ਗਿਆ। 

ਇਸ ਘਟਨਾ ਤੋਂ ਬਾਅਦ ਕੁੜੀ ਦੀ ਮਾਂ ਨੇ ਅਪਣੇ ਭਰਾ ਦੀ ਮਦਦ ਨਾਲ ਪੀਰਾਬਾਦ ਪੁਲਿਸ ਥਾਣੇ ਵਿਚ ਮੁਕੱਦਮਾ ਦਰਜ਼ ਕਰਵਾਇਆ। ਪੁਲਿਸ ਨੇ ਮਰੀਨਾ ਦੇ ਪਿਤਾ ਅਤੇ ਦਾਦੇ ਨੂੰ ਗਿ੍ਰਫ਼ਤਾਰ ਕਰ ਲਿਆ। ਨਾਲ ਹੀ, ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ। ਮਰੀਨਾ ਦੇ ਮਾਮੇ ਮੁਹੰਮਦ ਜੈਬ ਨੇ ਇਕ ਵੀਡੀਓ ਜਾਰੀ ਕੀਤੀ।

ਜਿਸ ਵਿਚ ਉਨ੍ਹਾਂ ਨੇ ਕਿਹਾ ਹੈ ਕਿ ਮਰੀਨਾ ਦਾ ਪਿਤਾ ਉਨ੍ਹਾਂ ਨੂੰ ਅਤੇ ਉਨ੍ਹਾਂ ਦੀ ਭੈਣ ਨੂੰ ਜਾਨੋਂ ਮਾਰਨ ਦੀ ਧਮਕੀ  ਦੇ ਰਿਹਾ ਹੈ। ਆਪਣੀ ਜਾਨ ਬਚਾਉਣ ਲਈ ਉਹ ਕਿਤੇ ਲੁਕੇ ਹੋਏ ਹਨ। ਜੈਬ ਨੇ ਪੁਲਿਸ ਅਧਿਕਾਰੀਆਂ ਨੂੰ ਸੁਰੱਖਿਆ ਦੇਣ ਦੀ ਮੰਗ ਕੀਤੀ ਹੈ।