ਨਵੀਂ ਦਿੱਲੀ, 21 ਫ਼ਰਵਰੀ: ਸੁਪਰੀਮ ਕੋਰਟ ਨੇ ਅੱਜ ਕਿਹਾ ਕਿ ਹੀਰਾ ਕਾਰੋਬਾਰੀ ਨੀਰਵ ਮੋਦੀ ਦੀ ਕਥਿਤ ਸ਼ਮੂਲੀਅਤ ਵਾਲੇ 11 ਹਜ਼ਾਰ ਕਰੋੜ ਰੁਪਏ ਦੇ ਪੰਜਾਬ ਨੈਸ਼ਨਲ ਬੈਂਕ ਘਪਲੇ ਦੇ ਮਾਮਲੇ ਦੀ ਜਾਂਚ 'ਚ ਸਰਕਾਰ ਨੂੰ ਪੂਰੀ ਖੁੱਲ੍ਹ ਮਿਲਣੀ ਚਾਹੀਦੀ ਹੈ। ਸਿਖਰਲੀ ਅਦਾਲਤ ਨੇ ਕਿਹਾ ਕਿ ਉਹ ਉਸੇ ਹਾਲਤ 'ਚ ਇਸ ਮਾਮਲੇ 'ਚ ਦਖ਼ਲ ਦੇਵੇਗੀ ਜੇਕਰ ਏਜੰਸੀਆਂ ਜਾਂਚ ਨੂੰ ਠੀਕ ਢੰਗ ਨਾਲ ਚਲਾ ਨਾ ਸਕੀਆਂ।ਅਟਾਰਨੀ ਜਨਰਲ ਕੇ.ਕੇ. ਵੇਣੂਗੋਪਾਲ ਨੇ ਸਰਕਾਰ ਦੀ ਪ੍ਰਤੀਨਿਧਗੀ ਕਰਦਿਆਂ ਅਦਾਲਤ ਸਾਹਮਣੇ ਦਾਖ਼ਲ ਉਸ ਜਨਹਿੱਤ ਪਟੀਸ਼ਨ ਦਾ ਵਿਰੋਧ ਕੀਤਾ ਜਿਸ 'ਚ ਨੀਰਵ ਮੋਦੀ ਦੇ ਦੇਸ਼ ਤੋਂ ਬਾਹਰ ਚਲੇ ਜਾਣ ਦੇ ਮਾਮਲੇ ਦੀ ਆਜ਼ਾਦ ਜਾਂਚ ਮੰਗੀ ਗਈ ਸੀ।
ਚੀਫ਼ ਜਸਟਿਸ ਦੀਪਕ ਮਿਸ਼ਰਾ ਦੀ ਅਗਵਾਈ ਵਾਲੀ ਬੈਂਚ ਨੇ ਕਿਹਾ ਕਿ ਜੇਕਰ ਸਰਕਾਰ ਲੋੜੀਂਦੀ ਕਾਰਵਾਈ ਨਹੀਂ ਕਰਦੀ ਹੈ ਤਾਂ ਅਪੀਲਕਰਤਾ ਅਦਾਲਤ ਕੋਲ ਆ ਸਕਦਾ ਹੈ। ਪਰ ਅਜੇ ਅਜਿਹੀ ਗੱਲ ਨਹੀਂ ਹੈ ਕਿ ਸਰਕਾਰੀ ਏਜੰਸੀਆਂ ਕਾਰਵਾਈ ਨਹੀਂ ਕਰ ਰਹੀਆਂ। ਦੂਜੇ ਪਾਸੇ ਇਸ ਮਾਮਲੇ 'ਚ ਅੱਜ ਸੀਬੀਆਈ ਨੇ ਪੰਜਾਬ ਨੈਸ਼ਨਲ ਬੈਂਕ ਦੇ ਜੀ.ਐਮ. ਰੈਂਕ ਦੇ ਇਕ ਅਫ਼ਸਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਮਾਮਲੇ ਵਿਚ ਨੀਰਵ ਮੋਦੀ ਅਤੇ ਮੇਹੁਕ ਚੋਕਸੀ ਮੁੱਖ ਦੋਸ਼ੀ ਹਨ। 2009-11 ਵਿਚ ਮੁੰਬਈ ਸਥਿਤ ਬ੍ਰੈਡੀ ਹਾਊਸ ਵਿਖੇ ਪੀ.ਐਨ.ਬੀ. ਦੀ ਬ੍ਰਾਂਚ ਦੇ ਮੁਖੀ ਰਹਿ ਚੁੱਕੇ ਰਾਜੇਸ਼ ਜਿੰਦਲ ਨੂੰ ਬੀਤੀ ਰਾਤ ਸੀਬੀਆਈ ਨੇ ਰਿਹਾਸਤ ਵਿਚ ਲਿਆ। ਮੌਜੂਦਾ ਸਮੇਂ ਵਿਚ ਜਿੰਦਲ ਨਵੀਂ ਦਿੱਲੀ ਵਿਚ ਪੀਐਨਬੀ ਦੇ ਮੁੱਖ ਦਫ਼ਤਰ ਵਿਚ ਜੀਐਮ ਅਹੁਦੇ 'ਤੇ ਤੈਨਾਤ ਹਨ। (ਪੀ.ਟੀ.ਆਈ)