ਮੁੱਖ ਮਕਬਰੇ ਦੀ ਰੇਲਿੰਗ ਟੁੱਟੀ, ਕਈ ਦਰੱਖ਼ਤ ਉਖੜੇ
ਆਗਰਾ, 30 ਮਈ: ਆਗਰਾ ’ਚ ਸ਼ੁਕਰਵਾਰ ਦੇਰ ਰਾਤ ਹਨੇਰੀ-ਤੂਫ਼ਾਨ ਕਰ ਕੇ ਵਿਸ਼ਵ ਪ੍ਰਸਿੱਧ ਤਾਜ ਮਹਿਲ ਦੀ ਇਮਾਰਤ ਨੂੰ ਕਾਫ਼ੀ ਨੁਕਸਾਨ ਹੋਇਆ ਹੈ ਅਤੇ ਇਸ ਦੌਰਾਨ ਤਾਜ ਮਹਿਲ ਦੇ ਮੁੱਖ ਮਕਬਰੇ ਦੀ ਸੰਗਮਰਮਰ ਦੀ ਰੇਲਿੰਗ ਟੁੱਟ ਗਈ ਅਤੇ ਉਸ ਦੀਆਂ ਜਾਲੀਆਂ ਵੀ ਡਿੱਗ ਪਈਆਂ। ਭਾਰਤੀ ਪੁਰਾਤੱਤਵ ਵਿਭਾਗ ਦੇ ਡਾ. ਬਸੰਤ ਸਵਰਣਕਾਰ ਨੇ ਦਸਿਆ ਕਿ ਤਾਜ ਮਹਿਲ ਦਾ ਇਕ ਦਰਵਾਜ਼ਾ ਵੀ ਉਖੜ ਗਿਆ ਹੈ। ਉਨ੍ਹਾਂ ਕਿਹਾ, ‘‘ਇਸ ਤੋਂ ਇਲਾਵਾ ਤਾਜ ਮਹਿਲ ’ਚ ਸੈਲਾਨੀਆਂ ਦੀ ਸਹੂਲਤ ਲਈ ਬਣਾਈ ਸ਼ੈੱਡ ਦੀ ਫ਼ਾਲਸ ਸੀਲਿੰਗ ਉਖੜ ਗਈ ਹੈ।
File photo
ਤਾਜ ਮਹਿਲ ਤੋਂ ਇਲਾਵਾ ਮਹਿਤਾਬ ਬਾਗ਼ ਦੀ ਕੰਧ ਦਾ ਦਰੱਖ਼ਤ ਡਿੱਗ ਗਿਆ ਅਤੇ ਮਰੀਅਮ ਦੇ ਮਕਬਰੇ ’ਚ ਵੀ ਦਰੱਖ਼ਤ ਡਿੱਗ ਗਿਆ।’’ ਅਧਿਕਾਰੀਆਂ ਨੇ ਕਿਹਾ ਕਿ ਤੇਜ਼ ਹਨੇਰੀ ਕਰ ਕੇ ਆਗਰਾ ’ਚ ਤਿੰਨ ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ ਕਈ ਜ਼ਖ਼ਮੀ ਹੋ ਗਏ। ਨਾਲ ਹੀ ਕਈ ਥਾਵਾਂ ’ਤੇ ਮਕਾਨ ਅਤੇ ਦਰੱਖ਼ਤਾਂ ਦੇ ਡਿੱਗਣ ਦੀ ਵੀ ਸੂਚਨਾ ਹੈ। ਤਾਲਾਬੰਦੀ ਕਰ ਕੇ ਤਾਜ ਮਹਿਲ ਪਿਛਲੇ 68 ਦਿਨਾਂ ਤੋਂ ਬੰਦ ਹੈ। ਪਹਿਲੀ ਵਾਰੀ ਤਾਜ ਮਹਿਲ ਨੂੰ ਏਨੇ ਦਿਨਾਂ ਲਈ ਬੰਦ ਰਖਿਆ ਗਿਆ ਹੈ। (ਪੀਟੀਆਈ)
