ਤਖ਼ਤ ਸ਼੍ਰੀ ਹਰਿਮੰਦਰ ਜੀ, ਪਟਨਾ ਸਾਹਿਬ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਸਾਬਕਾ ਚੇਅਰਮੈਨ ਭਾਈ ਭੁਪਿੰਦਰ ਸਿੰਘ ਸਾਧੂ ਨੇ ਅਕਾਲ ਤਖ਼ਤ ਸਾਹਿਬ ਸਣੇ ਬਾਕੀ ਤਿੰਨ ਤਖ਼ਤਾਂ ਦੇ.....
ਨਵੀਂ ਦਿੱਲੀ : ਤਖ਼ਤ ਸ਼੍ਰੀ ਹਰਿਮੰਦਰ ਜੀ, ਪਟਨਾ ਸਾਹਿਬ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਸਾਬਕਾ ਚੇਅਰਮੈਨ ਭਾਈ ਭੁਪਿੰਦਰ ਸਿੰਘ ਸਾਧੂ ਨੇ ਅਕਾਲ ਤਖ਼ਤ ਸਾਹਿਬ ਸਣੇ ਬਾਕੀ ਤਿੰਨ ਤਖ਼ਤਾਂ ਦੇ ਜਥੇਦਾਰਾਂ ਤੇ ਤਖ਼ਤ ਪਟਨਾ ਸਾਹਿਬ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ.ਅਵਤਾਰ ਸਿੰਘ ਹਿਤ ਨੂੰ ਈ-ਮੇਲ ਰਾਹੀਂ ਚਿੱਠੀਆਂ ਭੇਜ ਕੇ, ਮੰਗ ਕੀਤੀ ਹੈ ਕਿ ਜਥੇਦਾਰ ਇਕਬਾਲ ਸਿੰਘ ਤੇ ਉਨ੍ਹਾਂ ਦੇ ਮੁੰਡੇ ਗੁਰਪ੍ਰਸਾਦਿ ਸਿੰਘ ਦੋਹਾਂ ਨੂੰ ਪੰਥਕ ਅਹੁਦਿਆਂ ਤੋਂ ਤੁਰਤ ਫ਼ਾਰਗ ਕੀਤਾ ਜਾਵੇ।
ਕੈਨੇਡਾ ਤੋਂ 'ਸਪੋਕਸਮੈਨ' ਨੂੰ ਭੇਜੀ ਚਿੱਠੀ ਦੀ ਕਾਪੀ ਵਿਚ ਭਾਈ ਸਾਧੂ ਨੇ ਜਥੇਦਾਰ ਤੇ ਉਨ੍ਹਾਂ ਦੇ ਮੁੰਡੇ 'ਤੇ ਕਈ ਸੰਗੀਨ ਦੋਸ਼ ਲਾਏ ਹਨ ਤੇ ਉਨ੍ਹਾਂ ਦਾ ਹਵਾਲਾ ਦਿੰਦਿਆਂ ਕਿਹਾ,'ਇਹ ਕੋਈ ਪਹਿਲੀ ਘਟਨਾ ਨਹੀਂ, ਦਾਸ ਦੇ ਸੇਵਾਕਾਲ ਦੌਰਾਨ ਵੀ ਇਨ੍ਹਾਂ ਵਿਰੁਧ ਤਖ਼ਤ ਸਾਹਿਬ ਦੇ ਅੰਦਰ ਸ਼ਰਾਬ ਪੀਣ, ਤਮਾਕੂ ਦੀ ਵਰਤੋਂ ਕਰਨ ਅਤੇ ਬੀਬੀਆਂ ਨਾਲ ਬਦਫੈਲੀਆਂ ਕਰਨ ਦੀਆਂ ਸ਼ਿਕਾਇਤਾਂ ਪ੍ਰਾਪਤ ਹੁੰਦੀਆਂ ਰਹੀਆਂ ਹਨ, ਪਰ ਹਰ ਵਾਰ ਸੱਚ ਨੂੰ ਝੂਠ ਸਾਬਤ ਕਰਨ ਵਿਚ ਭਾਈ ਇਕਬਾਲ ਸਿੰਘ ਅਤੇ ਉਸ ਦੇ ਸਹਿਯੋਗੀ ਸਫ਼ਲ ਹੋਏ ਹਨ।
ਜਿਵੇਂ ਹੁਣ ਇਨ੍ਹਾਂ ਨੇ ਮੀਡੀਆ ਵਿਚ ਇਹ ਸਫ਼ਾਈ ਦਿਤੀ ਹੈ ਕਿ 'ਮੇਰੇ ਬੇਟੇ ਨੇ ਬੇਹੋਸ਼ੀ ਦੀ ਹਾਲਤ ਵਿਚ ਸੱਭ ਕੁੱਝ ਕੀਤਾ ਹੈ।' ਜੋ ਬੜੀ ਹਾਸੋਹੀਣੀ ਦਲੀਲ ਹੈ। ਜਦੋਂ ਕਿ ਵੀਡੀਉ ਵਿਚ ਸਾਰਾ ਕੁੱਝ ਸਾਫ਼ ਹੈ।' ਭਾਈ ਸਾਧੂ ਨੇ ਚਿੱਠੀ ਵਿਚ ਦਾਅਵਾ ਕੀਤਾ ਹੈ ਕਿ 'ਜਥੇਦਾਰ' ਦਾ ਮੁੰਡਾ ਕਈ ਸਾਲਾਂ ਤੋਂ ਨਸ਼ੇ ਕਰਦਾ ਆ ਰਿਹਾ ਹੈ ਤੇ ਪਤਿਤ ਤੇ ਸ਼ਰਾਬੀ ਮੁੰਡੇ ਲਈ ਜਥੇਦਾਰ ਐਨੇ ਨਰਮ ਕਿਉਂ ਪੈ ਰਹੇ ਹਨ? ਜਿਸ ਜਥੇਦਾਰ ਦਾ ਅਪਣਾ ਮੁੰਡਾ ਹੀ ਤਖ਼ਤ ਸਾਹਿਬ ਦੀ ਹਦੂਦ ਵਿਚ ਸ਼ਰਾਬ ਤੇ ਸਿਗਰਟ ਪੀਂਦਾ ਹੋਵੇ, ਅਜਿਹੇ ਜਥੇਦਾਰ ਦੀ ਪੰਥ ਨੂੰ ਕੋਈ ਲੋੜ ਨਹੀਂ। ਤਖ਼ਤ ਸਾਹਿਬ ਦਾ ਮਾਣ ਕਾਇਮ ਰੱਖਣ ਲਈ ਇਨ੍ਹਾਂ ਦੀਆਂ ਸੇਵਾਵਾਂ 'ਤੇ ਰੋਕ ਲਾਈ ਜਾਵੇ।
