ਸਾਹਜਪੁਰ ਬਾਰਡਰ ਦੇ ਮੋਰਚੇ ਤੇ ਕਿਸਾਨਾਂ ਵੱਲੋਂ ਕਾਫ਼ਲੇ ਦਾ ਕੀਤਾ ਜ਼ੋਰਦਾਰ ਸਵਾਗਤ
ਦਿੱਲੀ: ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਵੱਲੋਂ ਕੱਲ ਤੋਂ ਹਰਿਆਣਾ ਦੇ ਪਿੰਡਾਂ 'ਚ ਸੈਂਕੜੇ ਟਰੈਕਟਰਾਂ ਰਾਹੀਂ ਸ਼ੁਰੂ ਕੀਤਾ ਮਾਰਚ ਅੱਜ਼ ਸਵੇਰੇ ਵਰ੍ਹਦੇ ਮੀਂਹ 'ਚ ਰਵਾੜੀ ਟੋਲ ਪਲਾਜੇ ਤੋਂ ਚੱਲ ਕੇ ਪਿੰਡਾਂ 'ਚੋਂ ਹੁੰਦਾ ਹੋਇਆ ਸਾਹਜਪੁਰ ਬਾਰਡਰ 'ਤੇ ਪੁੱਜਿਆ। ਟਰੈਕਟਰ ਮਾਰਚ 'ਚ ਸ਼ਾਮਲ ਕਰੀਬ ਤਿੰਨ ਹਜ਼ਾਰ ਕਿਸਾਨਾਂ ਵੱਲੋਂ ਸਾਹਜਪੁਰ ਬਾਰਡਰ ਉੱਤੇ ਪੁੱਜਣ 'ਤੇ ਇੱਥੇ ਪਹਿਲਾਂ ਹੀ ਡਟੇ ਹੋਏ ਵੱਖ-ਵੱਖ ਰਾਜਾਂ ਦੇ ਕਿਸਾਨਾਂ ਵੱਲੋਂ ਗਰਮ ਜੋਸ਼ੀ ਨਾਲ ਸਵਾਗਤ ਕੀਤਾ ਗਿਆ।
ਇਸ ਮੌਕੇ ਸੰਯੁਕਤ ਕਿਸਾਨ ਮੋਰਚੇ ਦੇ ਆਗੂ ਜੋਗਿੰਦਰ ਯਾਦਵ ਤੋਂ ਇਲਾਵਾ ਕੇਰਲਾ ਦੇ ਕਿਸਾਨ ਆਗੂ ਕਿ੍ਸ਼ਨ ਪ੍ਰਕਾਸ਼ ਤੇ ਹਰਿਆਣਾ ਦੇ ਕਿਸਾਨ ਆਗੂ ਦੀਪਕ ਕੁਮਾਰ ਤੇ ਅਮਰਾ ਰਾਮ ਨੇ ਹੱਡ ਚੀਰਵੀ ਠੰਢ ਦੇ ਬਾਵਜੂਦ ਕਿਸਾਨਾਂ ਵੱਲੋਂ ਦੋ ਦਿਨਾਂ ਲੰਮਾ ਮਾਰਚ ਕਰਕੇ ਸਾਹਜਪੁਰ ਬਾਰਡਰ ਤੇ ਪੁੱਜਣ ਦੇ ਉੱਦਮ ਦੀ ਸ਼ਲਾਘਾ ਕਰਦਿਆਂ ਐਲਾਨ ਕੀਤਾ ਕਿ ਮੁਲਕ ਦੇ ਕਿਸਾਨਾਂ ਦੀ ਏਕਤਾ ਤੇ ਸੰਘਰਸ਼ ਦੀ ਬਦੌਲਤ ਮੋਦੀ ਸਰਕਾਰ ਨੂੰ ਕਾਲੇ ਕਾਨੂੰਨ ਵਾਪਸ ਲੈਣੇ ਹੀ ਪੈਣਗੇ।
ਕਿਸਾਨ ਆਗੂਆਂ ਨੇ ਆਖਿਆ ਕਿ ਟਰੈਕਟਰ ਮਾਰਚ ਦੌਰਾਨ ਹਰਿਆਣਾ ਤੇ ਰਾਜਸਥਾਨ ਦੇ ਕਿਸਾਨਾਂ ਤੇ ਆਮ ਲੋਕਾਂ ਵੱਲੋਂ ਮਿਲੇ ਹੁੰਗਾਰੇ ਨਾਲ਼ ਉਹਨਾਂ ਦੇ ਹੌਸਲੇ ਹੋਰ ਬੁਲੰਦ ਹੋਏ ਹਨ । ਉਹਨਾਂ ਐਲਾਨ ਕੀਤਾ ਅੱਜ ਇਹ ਕਾਫਲਾ ਇੱਥੇ ਹੀ ਰਾਤ ਭਰ ਰੁਕਣ ਉਪਰੰਤ ਕੱਲ੍ਹ ਸਵੇਰੇ ਵੱਖ-ਵੱਖ ਪਿੰਡਾਂ ਚ ਮਾਰਚ ਕਰਦਾ ਹੋਇਆ ਟਿੱਕਰੀ ਬਾਰਡਰ ਵੱਲ ਰਵਾਨਾ ਹੋਵੇਗਾ। ਸ੍ਰੀ ਸ਼ਿੰਗਾਰਾ ਸਿੰਘ ਮਾਨ ਆਖਿਆ ਕਿ ਟਰੈਕਟਰ ਮਾਰਚ ਚ ਸ਼ਾਮਲ ਕਿਸਾਨ ਕਾਫਲੇ ਵੱਲੋਂ ਬੀਤੀ ਰਾਤ ਰਵਾੜੀ ਟੋਲ ਪਲਾਜੇ ਉੱਪਰ ਰੁਕਣ ਉਪਰੰਤ ਆਲ਼ੇ ਦੁਆਲ਼ੇ
ਪਿੰਡਾਂ ਚੋਂ ਵੱਡੀ ਗਿਣਤੀ ਕਿਸਾਨ ਵੀ ਸ਼ਾਮਲ ਹੋਏ ਅਤੇ ਉਨ੍ਹਾਂ ਵੱਲੋਂ ਇਸ ਟੋਲ ਪਲਾਜੇ ਨੂੰ ਟੋਲ ਫਰੀ ਕਰਨ ਦਾ ਵੀ ਐਲਾਨ ਕਰ ਦਿੱਤਾ ਗਿਆ। ਉਹਨਾਂ ਆਖਿਆ ਕਿ ਕਿਸਾਨ ਤੇ ਲੋਕ ਵਿਰੋਧੀ ਖੇਤੀ ਕਾਨੂੰਨਾਂ ਨੂੰ ਰੱਦ ਕਰਾਉਣ ਲਈ ਜਿੱਥੇ ਮੁਲਕ ਦੇ ਵੱਖ-ਵੱਖ ਸੂਬਿਆਂ ਦੇ ਕਿਸਾਨਾਂ ਦੀ ਏਕਤਾ ਤੇ ਲਾਮਬੰਦੀ ਜ਼ਰੂਰੀ ਹੈ ਉਥੇ ਕਿਸਾਨਾਂ ਦੀ ਸੱਜੀ ਬਾਂਹ ਬਣਦੇ ਖੇਤ ਮਜ਼ਦੂਰਾਂ ਦੀ ਇਸ ਘੋਲ ਚ ਸ਼ਮੂਲੀਅਤ ਵੀ ਅਣਸਰਦੀ ਲੋੜ ਹੈ ਜਿਸ ਖਾਤਰ ਮਜ਼ਦੂਰ ਜਥੇਬੰਦੀਆਂ ਦੇ ਨਾਲ-ਨਾਲ ਕਿਸਾਨਾਂ ਨੂੰ ਵੀ ਯਤਨ ਜੁਟਾਉਣ ਦੀ ਲੋੜ ਹੈ।